ياترى فكرت تحول عربيتك لغاز ؟؟؟

[Payoo]

مش عارف أيه إللي مانعنا من تحويل عربيتنا للغاز ؟

انا لحد دلوقتي مش عارف السبب بس لو حد شجعني ممكن آخد الخطوة دي بجد

انا شايف أن الغاز له مزايا وعيوب

تعالوا نتناقش في المزايا والعيوب يمكن نشجع بعض وناخد خطوة كويسه تخف الضغط من على جيوبنا شوية

[AbOnOrA]

المفروض نفكر فى طريقة نضغط بيها على التوكيلات او اى كان المسؤل فان العربيات اللى بتبقى مجهزة غاز او ديزل تنزل مصر لاكن نحول عربية ملاكى لغاز اعتقد محدش يجيلو قلب يعمل كده

اولا هتاكل مساحة الشنطة
ثانيا هتعقد عمليات اصلاح العربية وصيانتها
ثالثا هتخرج العربية من الضمان وممكن الوكيل ميرضاش يمد ايدة فيها بعد الضمان كمان
رابعا المواتير العادية مش مجهزة لكده وانا اسمع انها لما بتتجهز للغاز مش بتبقى بكفائة وبتقلل من عمر المحرك الافتراضى
خامسا عندنا قصور حقيقى فى محطات تموين الغاز بيعانى منة سواقيين التاكسى فما بالك لو الملاكى كمان حول

بيتهئلى ديه مزايا تخلى الفكرة صعبة اوى للعربيات العادية بس اكيد كل اللى عنده عربيات فوق ال 1600 سي سي لازم يفكر فى كده

[Ahmed Anwer]

أمممممممممم ،،،

أنا فكرت في الحكاية ديه لما روحت بورسعيد

و التاكسي هناك كله فيرنا

و معظمه قالب غاز ،،

و لما سألتهم قالولي عادي مفهوش مشاكل

بس مبنهوبشي ناحية التوكيل ،،

و الصراحة مايجليش قلب أولآ

ثانيا ،، مش مستعد ادلل عليها بعد كده عشان ابيعها :crazy:crazy

[islam_galal]

الاسباب اللي منعتني ان عربيتي 1000 Cc:d

[Payoo]

المشاركة الأصلية كتبت بواسطة AboNoRa المفروض نفكر فى طريقة نضغط بيها على التوكيلات او اى كان المسؤل فان العربيات اللى بتبقى مجهزة غاز او ديزل تنزل مصر

أنا معاك في الجزئية جدا يا "أبو نورا"
وبما اننا نملك ممبر اعلامي يبقى ممكن نعمل إللي علينا ونطالب الوكلاء باستيراد السيارات التي تعمل باغاز الطبيعي والديزيل
وبالفعل قام بهذه الخطوة "وجيه أباظه" وكيل بيجو في مصر وقام باستيراد السيارة "بيجو 407" بموتور يعمل بالسولار
بس أنا كان ليا تعليق على الحكاية دي وهو انه قام باستيراد سياره ثمنها يقترب من الـ200ألف جنيه ومن يقبل على شراء سيارة ثمنها 200ألف جنيه لن تفرق معه مسالة التوفير في البنزين بتاتا
لذلك أرى أنه من الاولى تغذية فئات السيارات المتوسطة التي تحتاج بالفعل للدعم أو لنقل تقليل الاستهلاك

على أي حال يجب أن يحرص الوكلاء على توفر اكثر من نوع للمحركات في موديلاتهم التي يستوردونها لنا

لكن نحول عربية ملاكى لغاز اعتقد محدش يجيلو قلب يعمل كده

أنا مش معاك بقى في الحكاية دي
لأن تحويل السيارة لغاز لا ينقصهات أي شيء على الأطلاق بل بالعكس يضيف عليها
بدليل انك بضغطة زرار تستطيع أن تحول السيارة من غاز إلى بنزين والعكس
أي ان تنك البنزين لا ينزع من السيارة التييتم تركيب غاز لها
وأيضا الأجزاء التي يتم تركيبها بالسيارة لا تؤثر على أي شيء في اساسيتها على الأطلاق
وإن لم يعجبك الغاز فيمكنك بكل سهولة نزع تلك الأجهزة والخراطيم بسهولة جدا جدا

اولا هتاكل مساحة الشنطة

الموضوع ده يختلف من سيارة لاخرى
فعلى سبيل المثال العربية "الاوكتافيا A4" شنطتها واسعة بطريقة مزهله لدرجة لا تتخيلها يا "أبو نورا" لدرجة غن المدام مرة حطت فيها خمسة أولاد(زملاء" باسل" في التمرين) دفعة واحده وكانوا يلعبون طوال الطريق كمان (يعني كانوا قاعدين مرتاحين)
يعني بالنسبة للناس إللي شنطتهم واسعة النقطة دي مش هاتفرق معاهم
ده غير ان في أسطوانات بحجم أصغر للسيارات الأصغر
خش التاني

ثانيا هتعقد عمليات اصلاح العربية وصيانتها

بجد يا وائل مافيش تعقيد ولا حاجه خالص يا وائل خاصة أن الشركة التي سوف تقوم بتركيب الغاز لك سوف تقوم بمتابعة وصيانة محرك السيارة باجهزتها المتخصصة

ثالثا هتخرج العربية من الضمان وممكن الوكيل ميرضاش يمد ايدة فيها بعد الضمان كمان

شوف يا "أبونورا" لما بنتكلم على موضوع الغاز بنتكلم على الموضوع بشكل عام مش بنتكلم على السيارات التي مازالت بالضمان
يعني انا مثلا لما كان معايا "الماتريكس" خرجت من الضمان بعد 11 شهر لاني كنت عديت الـ 60ألف كم
ولو كنت عاوز احول غاز ماكنش هايبقى في أي مشكلة
ثانيا الغاز بيتم تركيبة بمقاييس عالمية مش أختراع مصري وأي تملص من الوكيل يمكن الرجوع لجهاز حماية المستهلك وهو جدير بجعل الوكيل ينصاع لهذا التعديل الذي قمت به بامقاييس العالمية المتعارف عليها

رابعا المواتير العادية مش مجهزة لكده وانا اسمع انها لما بتتجهز للغاز مش بتبقى بكفائة وبتقلل من عمر المحرك الافتراضى

ماهو دورنا بقى أننا نبطل حكاية السمع دي وننزل لحد شركات الغاز ونقوم بعمل ريبورتاج أو حوار مع كبير المهندسين بتلك الشركات ونستفسر منه عن كل كبيره وصغيره للغاز
ويجب أن يكون الكلام مدعم بالأسانيد العلمية والفحوصات المعملية والتجربة العملية

وعلى فكرة انا ركبيت مع سواقين تاكسي ثبل كده وبصراحة بيشكروا فيه جدا جدا
وفي أقرب فرصة إن شاء الله هاسجل حوار مع أحد سائقي الغاز عشان يقول لنا رأيه بصراحة وبدوةن مجامله لأحد

خامسا عندنا قصور حقيقى فى محطات تموين الغاز بيعانى منة سواقيين التاكسى فما بالك لو الملاكى كمان حول

أنا معاك في دي
والنقطة دي بقى تعتبر العامل الأول والاكبر في عدم الأقبال على الغاز

بيتهئلى ديه مزايا تخلى الفكرة صعبة اوى للعربيات العادية بس اكيد كل اللى عنده عربيات فوق ال 1600 سي سي لازم يفكر فى كده

أنا مش فاهم حاجه من الجلملة دي يا ريس (مش عارف يمكن أنا هنجت؟)