عفشة السفينه 132 ( تحت الانشاء )

[محمدصلاح القاضى]

انا الان بجهز لموضوع ممتاز وان شاء الله هيكون مفيد جداا للاعضاء وخصوصا ملاك ال132
لانى هصور عفشة عربيتى حته حته وهشرح شرح تفصيلى للحاجات اللى مصورها
وكيفيه ظبط العفشه وعيوبها ومميزاتها من ناحية كل شىء
وان شاء الله هينول اعجاب الجميع
ياريت تشجعونى وخصوصا بعد ما عملت سيرش على الجوجل عن العفشه واجزائها وملقتش حاجه
ربنا يفوقنى واعرض الموضوع بشكل صحيح يستفيد منه معظم الاعضاء

[mOuStaFa_ERTU]

جزاك الله خيرا على المجهود الرائع وشكرا مقدما
والى الامام دائما

[Hisham.Elgazzar]

موفق بإذن الله

[أيمن الروبي]

ماشي يا سيدي وانا هحاول اساعدك كمان
خد عندك
طقم تيش النص: 250 الماني --- 160بولندي كويس ----- 85تركي تعبان
طنابير امامي 95 الماني
مساتر خلفيه 35 ايطالي
طقم جلب مقصات امامي 3يمين - 3شمال ------ 120ج الماني
طيش النص لما تشتريه يفضل تروح لحداد علشان يلحملك البارات اللي فيه بالكهربه علشان بعد فتره البارات دي بتحل من تيش النص ومتعرفش تظبط زوايا وتلاقي العربيه تحدف في الملفات علشان كل ده حصل معايا وطقم تيش النص باظ وجبت واحد بولندي 160ج ولحمته وركبته
كنت جايب طقم بيض بولندي بس مش فاكر بكام بس كويسين جدا جدا
طقم بلي امامي تركي 90جنيه ----- الماني 230جنيه بس شغلين ميقلوش لأ

:fun_drinking :

[محمدصلاح القاضى]

فى الموضوع هنتكلم عن كل حاجه فى عفشة السفينه ال 132
اولا نبدأ بسرد مكونات العفشه للعربيه
من الامام
2 ديسك فرامل
2 مساعد
2 يايى او سوسته
4 بيضات مقص ( 2لكل مقص ) واحده فوق والتانيه تحت
2 مقص
علبه دركسيون
تيش نص
مناول
2 شداد
عمود ميزان من الناحيه الشمال للعربيه ومتصل بالناحيه اليمين للعربيه


هنبدأ بديسكات الفرامل
بتتكون من :
الديسك وتيل امامى وتيل خلفى وبستم الفرامل وصموله لربط الديسك على البلى الامامى وتثبيته
طبعا طريقه تغيير التيل قدام اسهل ما يمكن من خلال مسمار مكانه فى البيستم من تحت تفكه خالص وبعدين تقرص بالمفتاح على البستم وتطلعه لفوق وبعدين هيبقى امامك التيل الامامى وراكب بواسطه حاجات زى البرشام بيقولوا عليها بسكوته وبعدين عندك التيل الخلفى نفس الموضوع ودا لو عاوز تغيير التيل
لكن عندك مشكله معاه ممكن تفكه وتخشنه كويس عشان اما تدوس فرامل يمسك كويس وبعدين اما تيجى تركب البستم تانى هتزنق بالمفتاح على البستيم عشان يرجع مكانه ولحد ماينزل تحت
وعند تركيب المسمار اللى تحت اللى فكانه علشان نطلعه لو فى بوش فى المسمار مع البستيم وحسيت انه ملقلق تجيب علبه كانز وتقصها وتطبع حتت صاجه منها على المسمار وتركبه ان شاء الله البوش هيروح
لو عاوز تغير بلى الديسكات اللى قدام هتعمل اللى حصل بالظبط لكن قبل ماتفك اى حاجه تدوس فرامل وتخلى حد يفك صمولة الاكس بعد رفع الغطا بتاع الشحم من عليها هوااا المسمار تفك زى الاول وتغير البلى وتركبه تانى واما تجى تقرط على الصموله تخيله يدوس فرامل برضه وتقرط جامد عليها
ثانيا التعليق قدام
وهو دا سر تعب اصحاب وملاك 132 بسب اجزاء التعليق الكتييره اللى قدام
بيتكون كل جنب من :
مساعد وبطحات وسوست و بيض وبارات تيش النص وعلبة الدركسيون فى الجانب الشمال من العربيه ويقابلها هناك مناول
وشدادت
المساعد عيبه بيكون واضح اوووى للكل وهيا اما مرشح زيت من حوالين الاولسيه بتاعه اللى جوا او العربيه ميله من اى جنب كأن الكاوتش نايم
ولو حبيت تغييره فيفضل المرنوو حاجه نضيفه جدااا جدااا وسعر الاتنين حوالى 450 جنيه تقريبا
لكن اوعى تغيير وتركب مساعد هوا من بتاع النص نقل لانه ابن جزمه حديده بيوبظ العفشه نهائى لكن المونرو خفيف وبياخد ويدى بشكل ودى
البيض عيبه ان العربيه بتزيق من قدام وانت ماشى او الدركسيون بيتقل ويخف الحاجات دى كلها ويفضل اما تشترى بيض للمقصات هاته تركى البيضتين ب 60 جنيه وهو موجود فى علبه حمرا والحمد ماشى تمام معايا لانى ركبت الالمانى ومستحملش خالص شهر وفكيته
ثانيا علبة الدركسيون لو مش باور هتبقى 3 بليه ولو باور هتبقى ليها طرمبة باور وخراطيم داخله ليها
تبش النص وهو دا العن حاجه فى العفشه كل اللى فى السوق مضرووووووووووب الصينى زى الالمانى زى التركى زى الاندونيسى المهم تشترى اللى يريحك لانه كله واحد فى الاخر وقبل ماتركب تلحم بارات العجل فيه بالكهربا لانه مع الوقت بيفك
الشداد دا بقى مش ممكن يتقطم لكن يتوعج لو دخلت لاقدر الله فى رصيف او فى اى حاجه
والعفشه من الخلف تتبع غداا