كافة المعلومات عن جيلي mk2008 بالتجربة 40الف كيلو

[drift]

السلام عليكم ورحمة اللة وبركاتة

انا اشتريت سيارة جيلي mk يوم 7يونيو 2008

من اوائل الناس الي اشترت الجيلي كنت خايف جدااا من الصيني خوضت التجربة

جربت العربية 40الف كيلو حتي الان واحكي لكم مميزات وعيوب الجيلي خلال هذة الفترة

اولا البطاقة الفنية للسيارة

محرك السيارة 1600 سي سي 108 حصان عزم 137 نيوتن
المحرك مصنع باحدث التكنولوجيا اليابانية (تويوتا) وهو نسخة طبق الاصل من محرك تويوتا كورولا 2005

ثانيا: العفشة ونظام التعليق بتكنولوجيا تويوتا كرولا 2005
يعني يمكن تغيير العفشة بالاكمل بعفشة تويوتا ياباني

ونظام الفرامل نفس نظام فرامل اليارس ونفس مقاسات الطنابير ومقاس تيل الفرامل انا بغير بتيل فرامل بتاع يارس
ودي ميزة ان قطع غيارها ياباني وتويوتا ومتوفرة في السوق مع العلم ان العفشة الاصلية ادائها رائع جدااا

ثالثاا:الكماليات :
السيارة مجهزة 4 زجاج كهرباء ازرار بلمسة واحدة
مع سنتر لوك يقفل السيارة بعد سرعة 30كيلو متر للامان
باور ستيرينج هيدروليك وكويس جدااا علي السرعات العالية والمنخفضة
ومزودة بجهاز mp3 مدخل usb مع اربع سماعات عالية الجودة
تكييف قوي 4 سرعات
حساسات ركن خلفية
فوانيس السيارة تعمل بنظام ذكي جداا للضوء ومزودة بعدسات
ومزودة بفوانيس شبورة
وتعمل بنظام تدفئة كرسي السائق والمرايات والزجاج الخلفي لازالة الشبورة ومزودة بمرايات بتحكم كهربائي
ومزودة بوحدة كمبيوتر زكية ecu لتنظيم حركة المحرك .

رابعاا: مواصفات الامان والسلامة بالسيارة :
مزودة بجهاز abs المانع لانغلاق الفرامل علي فكرة فرامل الجيلي مؤمنة امان تام
ومزودة بنظام ebd لتوزيع قوة الفرامل علي الاربع عجلات
ومزودة 2 ايرباج حسب الطلب

خامسا : الشكل الخارجي للسيارة
السيارة مقتبسة تماما من الاوبل فيكترا 2008 من الامام
ونفس حجم السيارة تويوتا كرولا 2007

نيجي لتجربة 40الف كيلو
محرك السيارة قوي في الظروف الصعبة ولا يتاثر بالحرارة ومزود بخاصية العزل التام وهي supur cilant صوت المحرك يعتبر مش موجود والموتور ناعم جداا والسحب بتاعة عالي

العربية ثابتة جدا جدا جدا علي السرعات العالية انا قفلت امبيرها 195 دة اخرها وكانت بتتعامل مع ظروف الطريق لان العفشة بتاعت العربية فيها ليونة

العربية الباور بتاعها اول مابتيجي جديدة من المعرض كان سيء للغاية لكن بعد 1000 كيلو تليين اتحول 180 درجة وبقا حاجة تانية

السيارة موفرة في البنزين نسبيا

ومن عيوبها بتحتاج تزبيط في طقم الدبرياج كتير
والعيب الاخر صوت ونة بيظهر من الفيتيس دة مش عيب دة لان بلي الفتيس حجمة كبير علشان كدة بيعمل ونة لكن دي من طبيعة الفتيس مش عيب فية

علي فكرة الفتيس ادائة رياضي جدا الكبالن بتاعتها كويسة جدا لان انا من هواة الستعراض بالسيارة بكنت بجرب كل حاجة فيها

والكبالن لسة زي الفل وشغلت التكييف لمدة 4 ساعات متواصل واداء الموتور مية مية

وبينزل فيها جنوط 14 وكاوتش 185علي 60 بيديها ثبات رائع

قطع غيارها معقولة
الفانوس الامامي ب390
والفانوس الخلفي 190جنية
وفلتر الهواء 35
وفلتر البنزين 25 جنية

لو عايز تجيب اي قطع غيار في المحرك جبها من برة التوكيل وتكون قطع غيار تويوتا كرولا 2005 هتلاقيها في كل مكان وكذلك العفشة

وعلي فكرة الشنطة بتاعتها واسعة وكويسة والتابلوة بتاعها زي تابلوة اليارس مميز بعداداتة اللي في المنتصف شكلها شيك جداا

واللي عايز يشتري جيلي يتوكل علي اللة وربنا يباركلة فيها ومعلش انا مش منسق الموضوع لانة كتبتة بسرعة وهاعرض ليكم بعد كدة الصور لما اصور العربية باكملها

ارجو ان الموضوع ينال اعجابكم والسلام عليكم ورحمة اللة وبركاتة

[alref]

كويس و الله نسمع كلمتين حلوين عن الجيلي
انا كنت رافض فكرة الصيني تماما و لسه مش بفكر فيه
بس يمكن مع الوقت الأحوال تتعدل و يبقي كويس
زي الكوري كده من 10 سنين..ماحدش عارف الصيني هيعمل ايه بكرة

ربنا يباركلك فيها و يكفيك شرها

[ehab 49]

الف شكر علي الكلام بانصاف علي العيوب والمميزات الي في السيارة بس منتظرين صور العربية !!!

[AbOnOrA]

شكراً يا دريفت على الريفيو الجميل ده ptmnlo123per112

وربنا يبارلك فيها يارب بس ايه اخبار التوكيل كويس معاك ولا ايه ؟

[Mohamed Dahab]

بجد الف شكر موضوع جميل بس بعد اذن حضرتك ليا سؤال يعنى اه الدبرياج محتاج ضبط كتير
وخلال ال40000 كم حضرتك ضبطه كام مره وازاى وفين وبكام
الف شكر مره ثانيه