فائدة ال تيربو

[elkady0]

ممكن اعرف ايه فائدة التيربو وايه فايدته فى العربيه وكمان اجيبه منين وهل ليه اضرار على الموتور يا ريت شرح بعد اذن حضرتكمptmnlo123per1127ptm nlo123per118ptmnlo123per1 18ptmnlo123per118

[فادى]

التربو ببساطة بيزود الكفاءة الحجمية للمحرك,
بمعنى, بيخلى الموتور اكبر من حجمه الحقيقى,
انت عندك الاحتراق بيتم عبر خليط 14:1 من هواء (14.5) و بنزين (1) تقريبا فى الحالة المثالية, بمعنى انو بيخش ادام كل جرام بنزين 14 جرام هواء.
طبعا كل ما تزود كمية الهواء, كل ما تقدر تزود كمية البنزين, و بالتالى الاحترق يدى طاقة اعلى فى المرة الواحدة, و بالتالى يزيد عزم المحرك و القوة الحصانية.
انا ممكن ارمى بنزين زيادة ببساطة, لكن بنزين زيادة من غير هواء زيادة ملوش لازمة لأنه مش هيحترق.
طب ازاى الموتور بيسحب هواء؟ لما المكبس بينزل و يفتح صمام الدخول Intake, الموتور بيسحب هواء بالضبط نفس فكره ال"شاليمو", بيحصل تفريغ لمكان معين فلازم يتملى بأى مائع, و هو فى هذه الهواء, و عبر نظم الحقن بيتم ضخ رذاذ البنزين بحسب كمية الهواء المسحوبة, بنسبة 14:1 اللى قولنا عليها.
طبعا كمية الهواء المسحوب بتحدد حسب حجم الاسطوانة و كثافة الهواء, لأنه لازم يسحب هواء يغطى المساحة التى فرغها نزول المكبس.
طيب ازاى نزود كمية الهواء؟!
الحل الوحيد هو ضغط الهواء, الحيز اللى عندنا هو هو, طيب احنا ممكن نكبس جواه كمية اكبر من الهواء لأن الغازات ممكن ضغطها, و بالتالى هقدر ادخل كمبية اكبر من البنزين, و يبقى طاقة الاحتراق فى المرة الواحدة اكبر.
ضغط الهواء بيتم عبر التربو أو الكمبرسور.
التربو هو عبارة عن تربينة, بيتم توصيل التربينة بغازات العادم الساخنة الخارجة من المحرك, و تقوم هذه الغازات بتدويرها, و هذه التربينة بدورها بتدور كمبرسور , بتضغط الهواء, أى بتحط كمية اكبر فى نفس الحيز, لأن المعادلة بتقول :
الكثافة = كتلة/حجم.
انا لما ضغطت الهوا زودت كثافته و بالتالى زادت كتلته فى نفس الحجم,
و بالتالى خدت نظريا محرك اكبر من حجمه(لكن مع استهلاك بنزين أكبر).

طيب ايه عيوب التربو :
- طبعا بيقلل من عمر المحرك, لأن الضغط اعلى بداخله.
- لا يعمل الا بعدما يتجاوز المحرك 3000 لفة/دقيقة, لأن غازات العادم مبتقباش كثيفة بدرجة كافية لتدوير التربينة قبل هذه السرعة, و ده بيسمى Turbo Lag, و دى مزعجة فى السواقة لأنك بتحس العربية بطيئة فى الاستجابة.
- أعطاله كتير, و معقدة, و هتواجه مشكلة كبيرة لتعديل نظام الحقن كى يتوافق مع الوضع الجديد.

طب انهى احسن محرك كبير ام محرك صغير بتربو, مثلا محرك 1400 سى سى بتربو هيدينى نفس قوة محرك 1800 سى سى تقريبا من غير تربو, انهى احسن؟
- التربو فيه ميزتين, أولا محرك صغير بتربو ارخص من المحرك الكبير, و تانى ميزة ان وزنه اخف.
- المحرك الكبير عمره اطول, و مفيهوش عيب الTurbo Lag, و مشاكله اقل, و امتع فى القيادة.
على فكرة الاتنين نفس استهلاك البنزين تقريبا.

[Nissan]

http://www.masrmotors.com/vb/showthread.php?t=5377

و الموضوع ده فى نفس الكلام تقريبا بس ممكن يزود معلومتين تلاتة

[elkady0]

والله انا عاجز عن الشكر بجد شكراااااااااااااااااا جزيلا
بس ممكن اعرف هوة التيربو دة بيركب فى مكان غير الشكمان ولا هوة اللى بيبقى راكب فى الشكمان وخلاص كدة
اقصد مفيش حاجة هاتركب تانى وممكن اعرف سعرة كام تقريبااااااااااا

[ahm_eng2004]

الف شكر عالمعلومات القيمة