خلاص بعت الa113 بعد سنة و 19000 كيلو

[احمد الشناوى1981]

العربية كنت شاريها من سنة و كانت عاملة 18000 كيلو و بعتها من اسبوع و العداد 37000 كيلو
طبعا زى كل العربيات الى قبلها زعلان انى بعت عربية بقالها معايا سنه و اكيد طبعا ليها معاية زكريات حلوة و تجربة كنت مبسوط بيها جدا
المهم انا هقول رايى فى العربية فى الفترة دى بس اهم حاجه الناس متاخدش الكلام بحساسية و انا مليش مصلحة لو كانت العربية احسن عربية فى مصر أو كانت اسوأعربية فى الدنيا
1- العربيه فعلا شكلها حلو جدا و ده سواء كان التصميم الخارجى أو الداخلى و فعلاً على الرغم من انها عربيه صغيرة وهاتش باك إلا انها واسعه و الراكب الى ورا يقدر يقعد مستريح حتى لو كان الكرسى الامامى راجع و كمان الشنطه معقولة و ممكن الكنبه تطبق و تدخل فى الشنطه
2- الطابلوه و العدادات شيك جدا و اماكن التخزين كتير و متوزعه كويس و كنت بحس ان العربية اوسع بالنسبه للراكب الامامى من عربيات كتير صالون و ده نتيجه ان الطابلوه كبير و السقف عالى و فعلا اى حد كان بيركب معاية كان بيحس ان العربية شكلها من برة ميديش انها واسعة كده
3- فيها اوبشن كتيير مش موجود فى العربيات الى اغلى منها ب10000 جنية واكتر
وكمان كنت شايف انها من اشيك العربيات فى الفئة دى
4- اداء الموتور كان جميل جدا و تجميعه رائع و كمان ثابته على السرعات
5- بعد فترة صغيرة فعلا حبيت العربية دى جدا و كنت شايفها صفقة رابحة جداً و سعرها خرافة

طبعا لغاية هنا جميل بس طبعا العربية مش كلها مميزات

نيجى بقا للسلبيات الى انا شفتها فى العربية
1- اكبر مشكله انا حسيت بيها هى عدم وجود قطع غيار معمرة للعربية فى السوق و دة سواء كان فى التوكيل او برة و لو قلنا ان قطعه الغيار الاصلية الى نازلة فى العربية معقولة يبقا قطعة الغيار الى بشتريها رايحه فى داهية يعنى حسيت كـأن الحاجه الى بتبوظ فى العربية مش هترجع تانى و هبدا بيها رحلة شرا الحاجه دى علطول
2- على الرغم من الموتور الى كان فعلا تجميعه جميل إلا انه مكانش ناعم زى العربيات الكورى مثلا و ده و لو انه حاجه بسيطه مش فارقه كتير بس كانت مضيقانى منها كمان مش اى حد بيشتغل فيها يعنى مش اى ميكانيكى بيفهم فيها لازم التوكيل او حد يكون اشتغل فى التوكيل قبل كدة
3- الخامات او المكونات بتاعه العربية غير معمرة و رديئة زى مثلا طنابير العجل خلصت و العربية موديل 2009 و السفنج بتاع ضهر الكراسى الى قدام اتقطع من قدام الشاسية الحديد بتاع الكرسى و لما رحت للسروجى علشان اعملة لقيت خامة السفنج زباااااله جدا و كمان الشاسية بتاع الكرسى ضعيف جدا و الى غاظنى قوى ان السروجى لما عالج الكرسي ده لزق السفنج بكلة و بعدين لزق قطعه جلد من بواقى الورشه قدام الحته الى بتقابل الشاسية بتاع الكرسى و بعد كدة الكرسى رجع تماام فقلت لنفسى و فعلا لية من البداية ميكونش فيه حاجه زى حته الجلد دى من البداية كانت تحافظ على الكرسى !!! اة وكمان السنون بتاعه الكرسى الى بتتحكم فى الضهر برضو خامتها ضعيفة كدا و اتاكل منها كام سن كانو بيخلو المكنه تفوت و لما تشوفها متعرفش دى حديد و الا المونيا و الا اية بالظبط
4- اخويا اشترا نوبيرا 1 فى نفس التوقيت الى اشتريت فية الاسبيرانزا و فى البداية كنت شايف ان طبعا اختيارى كان الافضل لان العربية احدث و اشيك من وجهه نظرى و اوبشن اكتر و بنفس السعر لكن بعد سنه لقيت ان انا محتاج اغير حساباتى تانى لان النوبيرا زى ما هى و انا كنت زهقت من الاسبيرانزا الى حسيت انها ضعيفة و بقيت ماشى بداديها علشان ميحصلهاش حاجة
عموما ان رايى ان العربيه دى لو كان لها قطع غيار متوافقة مع اى عربيى تانية كورى او يابانى مع توكيل محترم كانت العربية دى هتبقا ملهاش حل بس بوضعها الحالى هى محتاجه اعاده نظر
طبعا الموضوع للمناقشة بس من غير حساسية

[مهند سالم]

أنا مع حضرتك تماما، الصيني غير معمر.

[mr_astra]

ولا يهمك يا استاذ احمد ........خيرها فى غيرها وربنا بيسبب الاسباب وبامر الله ربنا هايرزقك باحسن منها
وصدقنى اى واحد فى مصر بيشتكى من العربية بتعتة موديل قديم او موديل جديد الناس بحس بيها بتكلم نفسها
لان انا وانت وكتير غيرنا هما فريسة لحكومة متعرفش يعنى اية تحمى مستهلك
من فترة اما سمعت عن اللانشون الفاسد و الفراخ اللى معرفش اية قلت ان مصر بيدخلها اى حاجة بايظة وصلاحيتها منتهية وضحكت ضحكة سخرية انى عاوز رقابة على الواردات الصناعية وتطبيق معايير الجودة ........طبعا بحلم لان الحكومة مش هاممها صحة الناس مش عربيتهم
عارف اكتر موقف بحتار فية ؟
لو عربيتى باظ فيها قطعة غيار اعمل اية واشترى منين وزى تملى ما بقول ان الزبون بين مقصلة الاستيراد وسندان الجديد المضروب ومهما شغلت دماغك واجتهدت الله اعلم بالنتيجة وفى الاخر انت وحظك يا صابت يا خابت
انا مرة غيرت طقم تيل وانا بشترية عارف انة كولة مضروب ساعتها اشتريت اغلى طقم عند البائع اللى محلة متكلف ملايين والناس علية بالطوابير .........افتكر ان التيل دة بعد اسبوع من تركيببة وانا داخل على اشارة سمعت قنبلة طالعة من الفردة واما نزلت بشوف فى اية اكتشفت ان بودرة التيل اتفصلت من القطعة الحديد والعربية طبعا لفت منى
معلش طولت عليك بس انا محروق زيك من قطع الغيار ويا قاسيت منها
عملت عمرة لعربية قبل كدة نفخت بعد شهر .........جبت موتور استيراد قبل كدة بعد 3 ايام نفخ رحت عملتله عمرة نفخ بعد 3 شهور طب اولى بالله عليك اعمل اية

[محمد فيصل]

الحمد لله على خروجك سالماً من النفق الصينى المظلم
وفقك الله الى كل الخير والى سيارة افضل ان شاء الله
:Bra vo:: Bravo:

[احمد الشناوى1981]

يا جماعه العربيه انا قلت انى كنت مبسوط بالتجربة دى و العربية فعلا كويسة بس لو اتعالج موضوع قطع الغيار و الخامات و عموما هى اختيار مناسب لحد مشاويرة صغيره او مبيستخدمش العربية كتير
يعنى واحده ست عايزه تجيب بيها الولاد من المدرسة او دكتور بيروح بيها العيادة و يرجع يركنها تانى كده زى الفل و هو اولى بفرق الفلوس الى ممكن يدفعها فى عربية تانية
المهم ادعولى الاقي عربية كويسة
نفسى فى عربية تكون فى حالة الاسبيرانزا وقت ما اشتريتها