تغطية جمعة إستعادة الثورة من تصويري

[Ahmed Anwer]

وصلت الميدان الساعة 4 و نص تقريبا

الميدان النهاردة مكنشي مليان يمكن أقل مليونية عددا شوفتها

منصة حزب الوسط كانت عاملة شغل جامد و كانوا منظمين بكاسكتات و فانلات و بينظفوا مكانهم

و عصام سلطان مولع الدنيا بس معجبنيش كلامه عشان برده مصمم أخواتنا الليبراليين و العلمانين بيقنعوا المجلس يكمل و كده يعني الشيخ حازم كلامه أظرف

و جزء لحزب العدل و حاجة اسمها الإئتلاف الإسلامي و منصة الشيخ حازم ابو اسماعيل بس مكنتش اتخيل إن أنصاره قليلين كده و كذا حزب و ائتلاف مش فاكرهم

و طبعا شباب 6 أبريل باللوجو بتاعهم و فكرة جديدة بتاعت الأعلام العالية زي بتاعت الألتراس هتظهر في الصور و كمان حزب كده مش فاكر اسمه ايه مستخدم نفس الفكرة

رغم الأعداد مش مهولة بس الحماس عالي جدا بيقولوا بيفكرهم بأجواء 25 يناير الأولي

قعدت علي قهوة شوية و فتحت النت و عرفت من تويتر إن فيه مسيرتين واحدة للعباسية و الثانية لماسبيرو

قمت عشان الحق مسيرة ماسبيرو لما قريت عليها علي تويتر و طبعا طنشت مسيرة العباسية عشان ظروف السن متسمحشي بالكر و الفر و المشي للعباسية أساسا

لحقتها علي الكورنيش

و وقفت قدام ماسبيرو طبعا ماسبيرو قدامه سلك شائك بس مكنشي فيه مدرعات و لا قوات كثيفة غالبا فوجئوا جامد

صور أمام ماسبيرو








و الضباط زي ما أنتم شايفين كده كانوا واقفين مبيردوش و لا بيعملوا حاجة

و الهتافات ، الشعب يريد تطهير الإعلام ، أهم أهم أهم الكدابين أهم ، يسقط حكم العسكر ، عسكر يحمي ميحكمشي ، البس بدلة البس بوكسر يسقط يسقط حكم العسكر ،،، آلخ


و رفعولهم الجزم و آلخ و كانوا معجبين أووي بهتاف حنروح و نقول لمين ضباطنا *******

و ساعة كده و قرروا يرجعوا للميدان عشان بدأت بوادر إحتكاك أو حسوا إن فيه حد بيتحرش


و كان فيه عيال عبيطة كده مصممة تشتم الضباط

كان موجود في المسيرة نوارة نجم ، الصراحة أنا كنت بأتهمها إنها بتمثل أنها هبلة زي ما شعبان عبد الرحيم بيمثل إنه عبيط بس تقريبا هيا فعلا هبلة

نوارة نجم







دخول المسيرة الميدان مرة آخري




رجعنا الميدان لقينا الشيخ حازم أبو اسماعيل عامل حركة جامدة جدا





جه متأخر و الميدان كله اتلم عليه و اشعل الحماس في الجماهير و قال كلام كتير المهم فيه إنه ضد اللي راحوا العباسية و إنه لا ينوي الإعتصام اليوم و كلام تاني كتير ممكن تعرفه من المواقع عشان نسيت

و الناس كانت متجاوبة جدا معاه و اشعل حماسها رغم إن معظم المتظاهرين مكنوش سلفيين


و شباب 6 ابريل زي ما باين في الصورة كانوا محتشدين بأعلامهم قدامه بس مرة واحدة أختفوا ، رغم إنه كان بيثني عليهم في خطابه

شعب التكنولوجيا ، بيصور الشيخ حازم بالموبايل و الآي فون و الآي باد و كل الوسائل هههههههه




من الطرائف في خطاب الشيخ حازم ، الناس كانت بتقاطعه بهتاف ( يسقط حكم العسكر ) قالهم معلهشي يا جماعة قولوا (( إن شاء الله ))


و في الآخر قال ما معناه إنه بيتكلم بصفته مواطن و مش عايز أي مكسب شخصي و مشي



لحد ما مشيت مكنشي فيه غير خيمة الإعتصام دي






حاجة اسمها إتحاد المستقلين من أجل مصر ، شكلهم عمال أو حاجة زي كده

و كانوا خايفين أووي بيقولوا الجيش هيطحنا

و الشيخ حازم قال في خطبته إنه مش هيعتصم بس مش هينتظر للجمعة القادمة


و آسف علي ردائة الصور موبايل تعبان و الدنيا ليل

[memodina1]

والله موبايل حلو وزى الفل زيك وكفاية تعبك اصل تسلم يا جميل على الموضوع وفعلا حسيت انى معاكم لما قرات الموضوع لدرجة رجلى وجعتنى لما فكرت فى المشى دا كلة

[Mr.Mostafa veto]

انا مش عارف اقول ايه على الاجواء السياسية اللى البلد عيشا فيها
يارب احمى مصر

بس اللى انا عارفه اكيد انى بشكرا جدا على التقرير ده

جزاك الله خيرا

[fourseasons]

للأسف كل الناس بتتكلم فى السياسة مفيش واحد اتكلم عن مستقبل مصر الصناعى ,الزراعى,التعليمى,الخخخخخ .طب و بعدين مش يمكن الناس ديه لو اتكلمت فى حاجة ذى ديه الناس حتبصلهم.لاكن للأسف دول ملهمش غير فى الكلام و بس و بصوت عالى كمان اما خلونا و دنا صفرت.قبل كده كان الحزن الوطنى و من اجلك انت..و تقريبا كان قصدهم على جيمى بأنت ديه,ودلوقت الوشوش اختلفت بس هوا هواه الكلام بس بشكل تانى"من اجل حياه سياسية افضل,من اجل انتخابات برلمانية حرة من اجل مرشح الرئاسة.طب و بعدين مفيش حاجة و محدش يقولى و النبى اصل المجلس العسكرى و اصل مش عارف ايه.طب الناس ديه معلش يعنى لو بكرة قالوا طب يا جماعة يلا انتخابات عارفين ايه الى حيحصل.حتلاقى دول بيشتموا فدول و دول بيكفروا دول و دول بيجهلوا دول.طب وبعدين طب فى حد يوحد ربنا قال يلا نعمل مليونية نظافة مصر مثلا و كل واحد ينزل من بيته معاه مكنسة و كياس ونعمل مسيره مثلا من التحرير لحلوان نظافة مثلا و الله محتلاقى حد حيروح غير قلة قليلة.عارفين ليه عشان الناس ديه مش فلحة غير فى الكلام و بس و الناس خلاص مبقتش طايقه تسمع كلام و دش فى السياسه خلاص ودنا صفررررتتتتتتتتتتتت:36_2_1 6:.طب احنا انشاء الله حنشتغل امتى يعنى و لا خلاص الكل عامل اضراب على راى النكتة الى بتقول "واحد اجنبى سأل و احد مصرى قاله:الأطباء عاملين اضراب و المدرسين عاملين اضراب و العمال عاملين اضراب .طب مين الى شغال رد عليه المصرى و قاله الناشطين السياسين و الجبهات و القوة السياسية و برامج التوك شو"الى خاربينها" دول الى شغالين فى مصر دلوقتى و عارفين دول شغالين بأيه؟ ببقهم بس و اديهم مرفوعة و ودنهم مسددودة.ربنا يرحمنا و يرفع مقتوه و غضبوه عنا

[young..pharaoh]

للأسف كل الناس بتتكلم فى السياسة مفيش واحد اتكلم عن مستقبل مصر الصناعى ,الزراعى,التعليمى,الخخخخخ .طب و بعدين مش يمكن الناس ديه لو اتكلمت فى حاجة ذى ديه الناس حتبصلهم.لاكن للأسف دول ملهمش غير فى الكلام و بس و بصوت عالى كمان اما خلونا و دنا صفرت.قبل كده كان الحزن الوطنى و من اجلك انت..و تقريبا كان قصدهم على جيمى بأنت ديه,ودلوقت الوشوش اختلفت بس هوا هواه الكلام بس بشكل تانى"من اجل حياه سياسية افضل,من اجل انتخابات برلمانية حرة من اجل مرشح الرئاسة.طب و بعدين مفيش حاجة و محدش يقولى و النبى اصل المجلس العسكرى و اصل مش عارف ايه.طب الناس ديه معلش يعنى لو بكرة قالوا طب يا جماعة يلا انتخابات عارفين ايه الى حيحصل.حتلاقى دول بيشتموا فدول و دول بيكفروا دول و دول بيجهلوا دول.طب وبعدين طب فى حد يوحد ربنا قال يلا نعمل مليونية نظافة مصر مثلا و كل واحد ينزل من بيته معاه مكنسة و كياس ونعمل مسيره مثلا من التحرير لحلوان نظافة مثلا و الله محتلاقى حد حيروح غير قلة قليلة.عارفين ليه عشان الناس ديه مش فلحة غير فى الكلام و بس و الناس خلاص مبقتش طايقه تسمع كلام و دش فى السياسه خلاص ودنا صفررررتتتتتتتتتتتت.طب احنا انشاء الله حنشتغل امتى يعنى و لا خلاص الكل عامل اضراب على راى النكتة الى بتقول "واحد اجنبى سأل و احد مصرى قاله:الأطباء عاملين اضراب و المدرسين عاملين اضراب و العمال عاملين اضراب .طب مين الى شغال رد عليه المصرى و قاله الناشطين السياسين و الجبهات و القوة السياسية و برامج التوك شو"الى خاربينها" دول الى شغالين فى مصر دلوقتى و عارفين دول شغالين بأيه؟ ببقهم بس و اديهم مرفوعة و ودنهم مسددودة.ربنا يرحمنا و يرفع مقتوه و غضبوه عنا

محدش بيتكلم في مستقبل زراعي وصناعي عشان حكومة كل اما نكلمها يقولك انتقالية

بعدين ما في افكار زراعية زي ممر التنمية و مياه الصحراء الغربية و تحويل النيل الأبيض و بحث عن مضاعفة انتاج القمح .. الخ

ما الحكومة تفتح الملف اللي عايزاه و تقول هو ده مشروعنا القومي ..

و في دولة بتتبني و انتخاب مجلس شعب ( سلطة تشريعية ) هتحدد كيان دولتك كله

عشان كدا في تركيز علي السياسة شوية ..

اما الاضرابات عشان ناس مش عارفه تعيش و حكومة مصممة علي الاستفزاز

لو في حسن نية و في فعلاً ثورة غيرت .. كنا شوفنا حد أقصي للأجور

وعلي فكرة أنا كنت من المعارضين للمظاهرات بس المجلس و الحكومة كل يوم أسوأ من اللي قبله

- - - - - - - - - - - - - - - - - - - - - - - - - - -

و شكراً استاذ أحمد أنور ع التقرير

تسلم وربنا يحميكم