سواقين مستفزين (شوية فضفضة)

[miam0502788391]

مع سيرى يوميا على طرق مصر المباركة ربنا يحفظها آمين الواحد ضغطه بيرتفع من شوية سواقين عليهم شوية سلوكيات تودى فى شوية امراض من عينة الضغط المرتفع والذبحة الصدرية
واقول لكم على شوية منها
شوف عندك يا سيدى الفاضل :
1- هذا انسان ماشى وكأن الطريق ورثه عن جده الكبييييير يقوم يمشى فى نص الطريق بالظبط وعلى مهله هى الدنيا طارت ولا طارت ولا توكنش الدنيا طارت وطبعا لأن حضرتى مستعجل (ليه مش عارف) فأقرب منه وكلاكس فى كلاكس ولا هو هنا وبعدين بعد محاولات فاشلة ان سيادته ياخد يمين الطريق الحمد لله محاولة تنجح بس طبعا بعد ما يكون رفع ضغطك ووتر اعصابك

2- هذا انسان زى اللى قبله بالظبط سوى انه ماشى بالليل مش بالنهار وطبعا لأن ضعيف النظر ليلا ونور العربية مش قد كده يقوم يمشى فى النص على الخط المتقطع ليه بقى اصله خايف من اليمبن علشان الترع والقنيان او الطريق عالى شويه عن الترابة والشمال خايف يخبط فى الجزيرة اللى فى النص وطبعا ماشى على مهله لأنه خايف فجأة يلبس فى اى حاجة قدامه واكيد اكيد لا يمينه ولا شماله ممكن يعديك فتقوم تقلبله نور عالى وبعد مدة قد تطول او تقصر يفهم ان حضرتك عاوز تعدى يقوم ياخد يمينه بس على مهله اوى وهوخايف.

3- الثالث بقى ده سواق نقل تقيل وهذا غير معترف اطلاقا ان الحارة اليمين مخصصه له هو اللى يعرفه ان الطريق حارة شمال وبس ويا حبذا بقى لو سيادته جارر وراه زعتوره قصدى مقطورة وانت عليك لو عاوز تعدى تعدى من على اليمين وانت بقى ونصيبك ممكن تلاقى واحد تييييييييييت طلع لك فجأة او وانت فايت على بلد تلاقى توكتوك تييييييييت ماشى عكس الاتجاه ومركب زينون وجاى فى وشك عينى عينك ولا إحم ولا دستور بدون اى حياء وكأن ده هو العادى او فى الآخر تستسلم وتفضل ماشى ورا النقل التقيل ده على مهلك برضه ويفضل ان يكون معاك ترمس شاى او قهوة علشان متنامش

4- السواقين محترفى عكس الإتجاه ولا يحلوا لهم السير كده الا بالليل يا سلام بقى لو الطريق مضلم ولا كمين ولا عسكرى مرور وخووووش يا عم الحج عكس الاتجاه وسيبها على الله يوم ما يحصل حاجة هيموت واحد ولا اتنين يبقى نصيبهم كده وقضاء وقدر , الغريبة ان الفئة دى بتحترم نفسها اوى لما يعرف ان فيه كمين او عسكرى واقف تلاقيه لف من قدام وقطع المسافه كاملة ورجع لف تانى ومشى مظبوط هقول ايه ناس تخاف متختشيش

5- الفئة دى لا تعترف بأن هناك اشارات ليليه حمراء وكشافات نور امامية دى معمولة زينة وفقط فى السيارة وأى تشغيل لها يعتبر تبذير واسراف فلمهاش لازمة ويمشى بالليل من غيرها ومش هيحصل حاجة هو مش غلطان حضرتك اللى غلطان علشان المفروض تشوفه فى الظلمة

الحمد لله فضفضت شوية من اللى جوايا
اشوفكوا على خير

[tarek elbadry]

هههههههههههههههههههههههه
انا كنت فاكر انى بعانى من الموضوع دة لوحدى

[Good09]

كلنا هذا الرجل (د محمد )

[snoop]

حضرتك نسيت حاجة مهمة الستات هما بيلعبوا جمباز فى الشارع مش بيسوقول عربيات والغريب انهم بيسووقوا احدث انوواع العربيات ومبيعرفوش لا يركنوا ولا يسوقوا مهزلة والله انا كل يوم دمى بيتحرق لما بنزل اسوق فى الشارع لما خلاص حاسس اننا حختفى ههههههه

[mohamed ibiza]

حضرتك نسيت العالم المستفذه عديمة الاخلاق اللي بتخبط عربيات الناس و تبوظها و هي واقفة في مكانها و تسيبها و تمشي بدون ما يسأل علي صاحبها او يسيبلك ورقه تحت المساحة او اي حاجة !!!!!!!!! ( حصل معايا امبارح ) !!!! انا بعد 4 سنين تقريبا سواقة في شوارع مصر اقدر اقول اني كرهت نفسي و كرهت السواقه و كرهت الشوارع و كرهت الشعب و كرهت مصر نفسها !!!!!