العودة   مصر موتورز مجتمع السيارات > تعديل السيارات والاكسسوارت > تعديلات رفع الاداء

تعديلات رفع الاداء car performance tuning - قسم خاص بتعديلات رفع أداء السيارة من محرك وأجهزة تعليق وفرامل الخ ...


إضافة رد
 
أدوات الموضوع
  #1  
قديم 22-11-2010, 01:49 AM
الصورة الرمزية عصام غنايم
عصام غنايم عصام غنايم غير متواجد حالياً
من انا؟: حاصل علي ليسانس الآداب والتربية ودبلومة الدراسات العليا فى الاداره و متزوج ومعايا فارس ومريم وزينه
التخصص العملى: تصميم الموبليا
هواياتي: صيانة وتعديل السيارات
 
تاريخ التسجيل: Jan 2009
الموقع: دمياط
المشاركات: 537
عصام غنايم has a reputation beyond reputeعصام غنايم has a reputation beyond reputeعصام غنايم has a reputation beyond reputeعصام غنايم has a reputation beyond reputeعصام غنايم has a reputation beyond reputeعصام غنايم has a reputation beyond reputeعصام غنايم has a reputation beyond reputeعصام غنايم has a reputation beyond reputeعصام غنايم has a reputation beyond reputeعصام غنايم has a reputation beyond reputeعصام غنايم has a reputation beyond repute
افتراضي تعديل المواتير بين الواقع والخيال

ناس كتير محتاره نفسها ترفع من اداء مواتير سياراتها ومش عارفين يبدأوا منين وايه اللى بيرفع القدره بجد وايه اللى اونطه وشكل ملفت وصوت عالى وخلاص
ايه اللى يستاهل ادفع فيه فلوس وايه اللى مايستاهلش

لذلك

قررت انى اعمل موضوع اوضح فيه كل التعديلات الممكنه للمواتير ومدى تأثير كلاٌ منها ومدى ايجابيته العمليه

بسم الله نبدأ

اكتر تعديلين يرفعوا القدره لأى محرك هما

1 التيربو والسوبر شارجر


ودول فكرتهم تتلخص فى ضغط الهواء الداخل للبساتم يعنى بالبلدى كده ( الموتور الاستوك عباره عن واحد بياكل براحته اما الموتور المتربن عباره عن واحد بياكل بس فيه حد قاعد يدفس الاكل فى زوره ) فعند تساوى وقت الاكل مين فيهم هيكون اكل كميه اكبر ؟

وطبعاٌ الاكل الاكتر بيدى طاقه اكبر

من ناحية العمليه فهو عملى بدرجه كبيره عند استخدام تيربو مناسب لحجم موتورك

فالتيربو ذو الضغط العالى مع محرك صغير بيؤدى الى انهيار سريع للمحرك ( زى واحد بنيانه ضعيف وبياخد منشطات هيحصله ايه ؟ )

لذلك انا انصح بيه لمن يريد زيادة قدرة محركه



2 النيتروس

وده عباره عن غاز مكون من ذرة نيتروجين وذرتين اوكسجين عند درجة حرارة الجو بيبدأ بالتفكك وذرات الاوكسوجين بتبقى حره ونشطه ومستعده للتفاعل والاندماج مع اى ماده تقابلها واللى بتكون فى الوقت ده الوقود فناتج التفاعل ده بيكون انفجارى الى حد ما + ان التفاعل ده بيخرج كميه كبيره من الطاقه وده السبب ان النيتروس لا يمكن استخدامه الا على عدد دورات عالى نسبياٌ لان لو الموتور اخد شحنة نيتروس على RPM منخفض بيكون الناتج انفجار المحرك فوراٌ

لذلك لا احبه ولا اعتبره من التعديلات العمليه لزيادة القدره لخطورته الشديده

اى غلطه فى توصيله او استخدامه نتائجها كارثيه + تكلفته تركيبه العاليه + احتياجه للشحن بعد استخدامه ( وغالباٌ فترة استخدامه لا تتعدى الدقائق لمعدوده فى المره الواحده )

اذن فهو غير عملى

ولا انصح بيه اى شخص يريد ان يرفع قدرة محركه



التعديل الفعال من بعد التيربو والنيتروس

هو

استبدال كومبيوتر العربيه بأخر رياضى

وهو وضع كومبيوتر رياضى للعربيه يستفيد من كل ذرة وقود داخله للمحرك والاستفاده القصوى من تصميم المحرك فى اخراج قدره اكبر

بغض النظر عن

1 استهلاك البنزين
2 المعايير البيئيه
3 العمر الافتراضى للمحرك

والتعديل ده برغم تكلفته الا انه فعال ولو لاقيت كومبيوتر رياضى لعربيتك توكل على الله واشتريه

التعديل ده فعال

وانصح به



كمان الريمابنج ( REMAPING )


او تعديل سوفت وير الكومبيوتر الموجود بالعربيه فعلاٌ

وده له ناس متخصصه نادرين اوى فى مصر والغلطه بموته يعنى غلطه يبقى الكومبيوتر راح

لازم اللى يعمله يبقى محترف اوى لخطورته

لذلك لا انصح بيه



كمان من التعديلات الخاصه بكومبيوتر العربيه

اضافة شبايه رياضيه

بمعنى ان كتير من كومبيوترات العربيات الحديثه بيبقى فيه مكان لأضافة شبايه لرفع الاداء ودى كل وظيفتها انها بتضحك على كومبيوتر العربيه فبتاخد كل القرايات اللى جايه من مختلف الحساسات وتفبركها علشان الكومبيوتر يدى قرارت ملهاش علاقه بوضع العربيه الفعلى بل بوضع مثالى يخرج عنده كل امكانيات الموتور فى حدود الاستخدام الآمن

تعديل جايز لو لاقيت الشبايه المناسبه لموتور عربيتك من مكان موثوق منه



اما بالنسبه للفلتر الرياضى

فطبعاٌ كلامى هيتعارض مع تفكير ناس كتير بس لازم اقول رأيى فيه بصراحه

فاشل فى رفع القدره ويمكن فى اغلب الاحوال بيضيع الاداء خالص

ازاى الكلام ده ؟؟؟؟!!!!!!!!!

هبسطهالكم

لو حابب تشد مع حد او تجمع بسرعه تعمل ايه ؟

تدوس الادواسه للآخر فجأه وتفضل دايس عليها ولا تدوس شويه شويه بس بسرعه

طيب ليه لما دوست الدواسه للآخر العربيه اتخنقت واتنيلت على عينها

بكل بساطه

لانك قضيت على سحب البساتم للهواء فتحت البوابه على اللآخر فدخل كمية هواء اكبر من قدرة المحرك على تصريفها فبالتالى المحرك بيتخنق

بالبلدى كده واحد بيشرب وبيبلع براحته وفجأه رحت قالب الكوبايه كله فى بوقه ايه اللى هيحصل ؟
اكيد هيشرق وهيتوقف تماماٌ عن البلع

لذلك الشركات المصنعه للسيارات عند تطويرها للكربراتير لتزويد ادائه
لم تكبر بوابته
بل اضافة بوابه اخرى
وايضاٌ لم تجعل البوابتين يفتحوا فى نفس الوقت ( لنفس الفكره السابق شرحها )
بل جعلت البوابه الثانيه تفتح عند السرعات العاليه فقط عند احتياج الموتور لها وعند قدرته على تصريف الكميات الكبيره من الهواء والوقود الداخله ليه

طيب ايه علاقة كل الدش اللى فات ده بموضوع فلتر الهواء الرياضى ؟!

العلاقه بينهم وثيقه لأن الفلتر الرياضى على السرعات المنخفضه بيدخل كمية هواء اكبر من قدرة استيعاب المحرك وبالتالى بيخنق المحرك وبخاصه لو حبيت تقرص مش هتلاقى غير صوت البساتم وهيه بتقول حرام انا بشرق بس بصوت عالى

لذلك انا لما بقابل عربيه مركبه فلتر رياضى بشد قصاده وانا مطمن انى هضحك عليه وبخاصه فى التجميع حتى لو كان موتوره اكبر من موتورى

طيب ليه الناس متخيله انه افضل لرفع القدره من الفلتر العادى للعربيه ؟

بكل بساطه لانهم بيقرنوه بالفلتر بتاعهم المسدود والمليان اتربه قبل تركيب الفلتر الاسبور و بالفلتر الاسبور السالك

انما لو قارنا فلتر جديد استوك بفلتر جديد اسبور

هنلاقى الاستوك افضل فى الاداء وفى استهلاك البنزين

طبعاٌ الكلام ده عن طريق دراسه والكثير من التجارب العمليه

لذلك لا انصح بيه لمن يريد رفع قدرة سيارته



تعديل الاكسوست او دايرة العادم

فى التعديل ده بنغير جميع مواسير ووصلات وعلب الشكمان بأخرى ذات مقاس اكبر ومصنوعه من الاستلنس المطلى بالنيكل كروم

ليه ؟

1 علشان الموتور يقدر يخرج العوادم بسرعه ويدخل خليط جديد

2 الاستنلس بيسخن بسرعه فبيؤدى وظيفتين مهمين
A طرد جزء كبير من الحراره الناتجه عن الاشتعال فى غرف الحريق
B تحويل اول اكاسيد الكربون السامه الى ثانى اكوسيد الكربون الغير سام

ده طبعاٌ غير الشكل والصوت المميزين

وانا لا انصح بهذا التعديل

ليه تانى ؟!!!!!!!

1 اولاٌ مكلف اوى
2 لازم حسابات تكبير مقاسات المواسير تكون مظبوطه وألا اللى يبزيد عن حده ينقلب لضده
وبيضيع اداء الموتور نتيجه لغياب الباك بريشر
3 نتيجة رفعه لقدرة السياره بسيطه اوى ولا توازى تكافته وتعبه



الاستبدال

وفيه بنستبدل اجزاء الموتور الداخليه بأخرى رياضيه

مثل

( بساتم اكبر , كامات الرياضيه , وش سلندر 16 صباب 2 كامه , ريداتير اكبر , الخ )

بيرفع كتير فى الاداء

ولاكن

انت وحظك يا تصيب يا تخيب ( زى بالظبط نتيجة عمرة الموتور )

لو اتعملت صح تظبط الكلام بس لو غلط هتزعل اوى

الموضوع مكلف ومتعب وشغله كتير لذلك

لا انصح به



خراطة ترس الفولام

من التعديلات المؤثره فعلاٌ

الفكره هنا انك بتخرط ترس الفولام من الناحيه الداخليه المواجهه للموتور فبلتالى وزنه بيقل جامد فبيبقى استجابة الموتور اسرع وايضاٌ الموتور انعم

ولاكن فيه مشكله

لازم بعد الخراطه الترس يتعاير على مكنة ترصيص حساسه اوى لان اى ذرة عدم توازن ممكن لاقدر الله تكسر الموتور او على الاقل تخلى فيه اهتزاز غير مرغوب فيه

لذلك لا انصح بيه

طيب ايه تانى فى التعديلات الخاصه بالمواتير



تغيير الرشاشات برشاشات ذات سعه اكبر

غير عملى لانك لو غيرت الكومبيوتر هتلاقى نفس النتيجه ويمكن افضل لانك هتطول زمن فتح الرشاش انما مش هتوسع فتحاته

لا انصح بيه لو لوحده

انما لو مع تيربو يبقى ماشى الحال


غيره



طرمبة بنزين ذات ضغط اكبر

لو لوحدها ملهاش تأثير فعال لأن الموتور متعاير على ضغط الطرمبه الراكبه عليه

فلو زودنا ضغط الطرمبه بدون تصريف مناسب من كومبيوتر العربيه فكده هنأثر بالسلب على عمر الرشاشات

لذلك لا انصح بيه



تركيب موبينه ذات خرج فولطيه اعلى

لو الموبينه عندك سليمه مش هتحتاج ابداٌ للخطوه دى وهتبقى تكلفه على الفاضى ذى ( لمبة البيت عندك منوره على 220 فولت زى الفل طيب لو خليناهم 440 هتنور اكتر ؟ )

اكيد لا بس هتتحرق

لذلك لا انصح بهذا التعديل



تركيب سلوك بوجيهات رياضيه

فكرته تقليل الفاقد فى التيار المار بالسلك عن طريق تخفيض المقاومه النوعيه للتيار المختلفه بأختلاف خامة السلك ومدى نقائه من الشوائب الممانعه لمرور التيار بالسلك وايضاٌ تكبير مقطه السلك لنفس الغرض

كلام زى الفل

بس نيجى بقى لأرض الواقع

1 نلاقى ان الكلام ده يبقى باين ومؤثر فى الفولتيه المنخفضه ( زى مثلاٌ اشارة النت ) مش فى ال 20000 الف فولت الخارجين من الموبينه

2 الكلام ده فعلاٌ يبان لما يكون التيار سوف يمر فى مسافات كبيره من السلوك انما لما يكون اطول سلك عندك طوله 70 سم فأكيد مش هتحس بتأثير خالص

يبقى طقم سلوك بوجيهات اصلى خاص بموتورك يغنى عن القصه دى

يبقى برده

لا انصح بهذا التعديل



تركيب بوجيهات رياضيه

ناس كتير لما تحب تعدل تركب بوجيهات 2 او 3 او 4 شمعه ظناٌ منها انها بتحرك احسن

او يركبوا بوجيهات سبيلت فاير او ngk بلاتنيوم او ايريديوم

كل ده اونطه

طيب ليه

لان كل موتور متعاير ادائه على بوجيه معين بطول معين بمدى حرارى معين بمقاومه معينه وبالكثير من المتغيرات المكتوبه على هيئة رموز على البوجيه وكل رمز له معنى وله دلاله تختلف بأختلاف الشركه المصنعه

فكل مصنع موتور محدد خيارات محدده بالنسبه للبوجيهات التى يمكن ان تركب على موتوره وتعطى افضل اداء

فلما يبقى الموتور متصمم على اساس 1 شمعه ونحط احنا 4 شمعه نبقى بنهرج

انما بالنسبه لموضوع الايريديوم والبلاتنيوم فالموضوع مختلف

ازاى ؟

لما نيجى نركب بوجيه بلاتنيوم او ايريديوم هنجيب البوجيه المناظر لتوصيات المصنع بالنسبه للموتور يعنى كل المتغيرات ثابته ما عدا خامة القطب الموجب فقط

طيب ايه الفايده ؟

الفائده المباشره هى العمر التشغيلى الاطول + احتراق افضل من البوجيه المعيارى بنسبه بسيطه

فلذلك لا انصح بتغيير شكل البوجيه تماماٌ

انما لو بس هنغير لأيريديوم او بلاتنيوم مع الالتزام بتوصيات صانع الموتور يبقى ماش الحال

لا ضرر من ذلك





طيب بعد كل الموضوع الطويل العريض ده نستفيد ايه

او بطريقه اخرى

اللى يحب يرفع من قدرة سيارته يعمل ايه ؟

بالنسبه لانى دمياطى فطبعاٌ بيغلب على طريقة تفكيرى الناحيه العمليه + انى ملتزم بمبدأ جميل اوى هو

( لكل جنيه بتدفعه لازم تلاقى نتيجه تساويه فى القيمه او تزيد عليه شويه يبقى خير برده )

اذن انا عايز ارفع قدرة موتورى 20 حصان مثلاٌ

اعمل ايه ؟؟؟؟؟؟؟؟؟

اروح اجيب فلتر k & n اصلى + طقم سلوك اسبليت فاير + طقم بوجيهات اسبليت فاير ( كده عديت ال 1000 جنيه بدون ما تحس بنتيجه )

ولا اروح اغير دايرة عادم كامله من الرأس للديل بأخرى رياضيه ( كده 3000 جنيه او اكتر رسمى بدون احساس بالفرق اللهم شوية الصداع الى هيجولك لما تسافر بالعربيه )

ولا ايه ؟ ولا ايه ؟

الحلى الخرافى العملى الرهيب اللى انا مقولتوش فى كل ما سبق

هو



تسقيط موتور استيراد ذو عزم وقدره حصانيه اعلى

يعنى لو راكب لانسر 1300 80 حصان مثلاٌ تجيب موتور مايفك 2000 160 حصان والعب يا معلم

او على عربيتى الانوس 1500 كامه واحده 8 صباب 86 حصان

تبيع الموتور بالفتيس بالكومبيوتر ب 2000 جنيه

ونجيب موتور نوبيرا 1600 2 كامه 16 صباب 107 حصان

وتدفع 1000 جنيه فرق وتجيب الموتور بالفتيس بالكومبيوتر وتبقى زودت 20 حصان فى شغل يوم واحد ودور واجرى

ده الكلام العملى انما اركب نيتروس بكام الف واول لما اشغله الاقى البساتم بتقع من الشكمان يبقى حرام عليا


كلام التعديلات الخرافيه وزيادة الاحصنه المهلبيه اللى بنشوفها فى برامج التعديلات فده بره عند االخوجات يا ادهم مش عندنا

لان احنا لانمتلك الامكانات الماديه ولا الاجهزه المساعده ولا العماله المدربه

ده يا رجل واحد جارى عمل طقم شمبر لعربيه كرستاله عند واحد من اشهر ميكانيكية دمياط
العربيه فوتت وهى واقفه تلين

طقم شمبر

طقم شمبر

مش يركب نيتروس


طبعاٌ كل ما سبق رأى شخصى

ولا يلزم اى شخص بتطبيقه

ولاكن هو خلاصة دراسه وهوايه وتجربه

ارجو ان اكون افدتكم



واتمنى الا تنسونى من دعائكم بظاهر الغيب

بالشفاء وسعة الرزق لى ولزوجتى وأولادى
وللمؤمنين اجمعين
__________________

ابو فارس
01006898520
شاهدوا كل جديد على قناتى على اليوتيوب من هنا
رد مع اقتباس
  #2  
قديم 22-11-2010, 02:20 AM
الصورة الرمزية koky_90
koky_90 koky_90 غير متواجد حالياً
من انا؟: لاتحسب البسمه على وجهى فرحا فاالطير يرقص مذبوحا من شده الالم
التخصص العملى: طالب
هواياتي: car وبس
 
تاريخ التسجيل: Oct 2008
الموقع: حدائق القبه (بلدنا)
المشاركات: 1,200
koky_90 has a reputation beyond reputekoky_90 has a reputation beyond reputekoky_90 has a reputation beyond reputekoky_90 has a reputation beyond reputekoky_90 has a reputation beyond reputekoky_90 has a reputation beyond reputekoky_90 has a reputation beyond reputekoky_90 has a reputation beyond reputekoky_90 has a reputation beyond reputekoky_90 has a reputation beyond reputekoky_90 has a reputation beyond repute
افتراضي رد: تعديل المواتير بين الواقع والخيال

طبعا انا عاوز اقولك
انى قرات الموضوع كله وده نادرا لما بيحصل الحقيقه
وبحب احيك عليه بجد
ورايك يحترم الحقيقه ونحن في انتظار المزيد منك بلنسبه مواضيع التعديل لان
هى الشغل الشاغل لكثير من الناس وانا منهم طبعا
بس انت لما ذكرت انواع التعديل اعترضت على تقريبا 80% منهم
ووضحت الاسباب _ وانا معاك في حكايه النيتروس ده بلذات
وقولت اقصر واسهل واريح طريقه للتعديل هى التسقيط
بس في عربيات ملهاش موتير كبيره _ زى مثلا صنى او كيا او فيات .... الخ
وحتى لو لاقيت في موتير بتوصل لـــ10000 جينه بلفتيس والدفيره والاكلام ده

وشكر مره تانيه على الموضوع الجميل ده
( اللهم اشفى مرضنا ومرضا المسلمين اجمعين يارب)
رد مع اقتباس
  #3  
قديم 22-11-2010, 03:24 AM
الصورة الرمزية عصام غنايم
عصام غنايم عصام غنايم غير متواجد حالياً
من انا؟: حاصل علي ليسانس الآداب والتربية ودبلومة الدراسات العليا فى الاداره و متزوج ومعايا فارس ومريم وزينه
التخصص العملى: تصميم الموبليا
هواياتي: صيانة وتعديل السيارات
 
تاريخ التسجيل: Jan 2009
الموقع: دمياط
المشاركات: 537
عصام غنايم has a reputation beyond reputeعصام غنايم has a reputation beyond reputeعصام غنايم has a reputation beyond reputeعصام غنايم has a reputation beyond reputeعصام غنايم has a reputation beyond reputeعصام غنايم has a reputation beyond reputeعصام غنايم has a reputation beyond reputeعصام غنايم has a reputation beyond reputeعصام غنايم has a reputation beyond reputeعصام غنايم has a reputation beyond reputeعصام غنايم has a reputation beyond repute
افتراضي رد: تعديل المواتير بين الواقع والخيال


طبعا انا عاوز اقولك
انى قرات الموضوع كله وده نادرا لما بيحصل الحقيقه
وبحب احيك عليه بجد
ورايك يحترم الحقيقه ونحن في انتظار المزيد منك بلنسبه مواضيع التعديل لان
هى الشغل الشاغل لكثير من الناس وانا منهم طبعا
بس انت لما ذكرت انواع التعديل اعترضت على تقريبا 80% منهم
ووضحت الاسباب _ وانا معاك في حكايه النيتروس ده بلذات
وقولت اقصر واسهل واريح طريقه للتعديل هى التسقيط
بس في عربيات ملهاش موتير كبيره _ زى مثلا صنى او كيا او فيات .... الخ
وحتى لو لاقيت في موتير بتوصل لـــ10000 جينه بلفتيس والدفيره والاكلام ده

وشكر مره تانيه على الموضوع الجميل ده
( اللهم اشفى مرضنا ومرضا المسلمين اجمعين يارب)


بالنسبه للعربيات اللى ملهاش مواتير بديله يبقى ما باليد حيله غش على التعديل بقى

وزى ما بيقولوا الغاوى ينقط بطقيته

انما لعموم السيارات

فالتسقيط افضل حلول رفع الآداء لانه مش مكلف وكمان مش محتاج فنيات ولا خبرات عاليه زى اللى محتجاها التعديلات الاخرى

على العموم انا سعيد ان الموضوع عجبك واتمنى ان بقية مواضيعى تعجبك برضه

واللهم تقبل منك ومنى
__________________

ابو فارس
01006898520
شاهدوا كل جديد على قناتى على اليوتيوب من هنا
رد مع اقتباس
  #4  
قديم 22-11-2010, 04:30 PM
الصورة الرمزية Injection
Injection Injection غير متواجد حالياً
من انا؟: أنسان يعيش و يتعايش
التخصص العملى: تانية تجارة
هواياتي: Everything
 
تاريخ التسجيل: May 2010
الموقع: مصر الدور الرابع
المشاركات: 1,400
Injection has a reputation beyond reputeInjection has a reputation beyond reputeInjection has a reputation beyond reputeInjection has a reputation beyond reputeInjection has a reputation beyond reputeInjection has a reputation beyond reputeInjection has a reputation beyond reputeInjection has a reputation beyond reputeInjection has a reputation beyond reputeInjection has a reputation beyond reputeInjection has a reputation beyond repute
افتراضي رد: تعديل المواتير بين الواقع والخيال

يا أهلا ياباشا, أنا طبعا علقت على الموضوع مرتين ومرضيتش أكمل علشان التعليقات كترت قوى وأنا مكنتش فاهم حاجة من كتر التعليقات, ومارضيتش أتقل على حضرتك أكثر من كده.

أنا فعلا أول مرة أعرف أن اللانوس فيها ماب, شكرا على المعلومة ياباشا, أنا كنت فاكر الماف هو الأساسى فقط.


بخصوص المثال بتاع الفلتر والشفاطة, الفلتر سهل دخول الهواء بس, بس ماأزالش المقاومة تماما, وفعلا زى ماحضرتك قلت الضغط العكسى لازم وجوده, لأن ال air intake شغال بنظام pulses زى الشكمان, لكن التقلقل يحصل لو غيرنا المواسير بمواسير أكبر تأثر على مرور الهواء وتضيع ال flow بتاعه, أنما الفلتر سهل دخول الهواء لا أكثر.


وأنا مكبر المواسير فعلا, وجايب مواسير حضرتك هتتخض لو شوفتها (مركب الفلتر عند الفوج لايت) الماسورة تعبت على ما عديتها من الفتحة اللى فى الحوض , لك أن تتخيل حجمها, وعمليا العربية بتسحب وبتجرى وكل حاجة, بس أنا موافق حضرتك فعلا.


والفلتر مش غرضه الأداء بس, صوته بيعجبنى جدا, رغم أن العربية 85 حصان


وتسقيط المواتير مش وحش للدرجة دى (لو كنت وصلت لحضرتك كده من المشاركة أياها), أنا كان حلم عندى أسقط موتور ليجانزا 2000 وأتربنه وأظبطه شكمان وخراطة وأخليه يطلع فوق ال300 حصان, بس الأحلام حاجة والواقع حاجة, فلوس كتيييير علشان المشروع, ومفيش حد فاهم يقدر يعمل port and polish لوش السلندر أو حتى يوسع السلندرات نفسها والشغل ده


ومش فاكر باقى اللى كنت عايز أقوله, بس كتر خيرك ياباشا على مواضيعك الجامدة, وخاصة مواضيع ال DIY بتاعة حضرتك فى اللانوس بتعجبنى وبتفيدنى جدا.


وربنا يبارك لحضرتك فى بيعة العربية وتلاقى اللى يستاهلها. وتجيب أحسن منها كمان, شكل حضرتك بتعزها قوى.
__________________

حكمة الشهر: ذاكر تنجح, غش تجيب مجموع

عذرا لقلة تواجدى بالمنتدى, تجارة بقى وأخر شهر بتاع الشغل كله.





رد مع اقتباس
  #5  
قديم 22-11-2010, 04:47 PM
الصورة الرمزية Bahi
Bahi Bahi غير متواجد حالياً
من انا؟: اسكندرانى يعيش ويعمل بالقاهرة منذ 1996
التخصص العملى: مدير شركة توكيلات ملاحية وشحن
هواياتي: الصيد البحرى - الزوارق الشراعية خاصة طراز ليزر (Laser) - الزوارق واليخوت
 
تاريخ التسجيل: Oct 2010
الموقع: دريم لاند - 6 أكتوبر
المشاركات: 889
Bahi has a reputation beyond reputeBahi has a reputation beyond reputeBahi has a reputation beyond reputeBahi has a reputation beyond reputeBahi has a reputation beyond reputeBahi has a reputation beyond reputeBahi has a reputation beyond reputeBahi has a reputation beyond reputeBahi has a reputation beyond reputeBahi has a reputation beyond reputeBahi has a reputation beyond repute
افتراضي رد: تعديل المواتير بين الواقع والخيال

فعلا يا عصام بك أنا بستمتع بكل مواضيعك وغصب عنى بقرأها من أول لآخر كلمة بالرغم من عدم انتفاعى المباشر بها لأن مثلا فى حالة موضوعك دة مش حفكر أبدا أغير موتور عربيتى الأوكتافيا اللى يدوبك عامل 70 ألف وبحالتة (صيانة التوكيل لآخر لحظة) وأسقط موتور تانى مهما كان مش واثق فى حالتة 100% الا بعد التجربة ... بس والله شاهد على ما أقول مواضيعك ومشاركاتك لذيذة جدا والواحد مبيشبعش منها فجزاك الله خيرا.
__________________

هشـــام باهـــى
اسكندرانى يعيش فى القاهرة من 14 سنة

رد مع اقتباس
إضافة رد

أدوات الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع

 MasrMotors غير مسؤول عن أي اتفاق تجاري أو تعاوني بين الأعضاء
التعليقات المنشورة لا تعبر عن رأي MasrMotors ولا نتحمل أي مسؤولية قانونية حيال ذلك ويتحمل كاتبها مسؤولية النشر


الساعة الآن 02:39 AM.


Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017