مين إللي إتقرص من تاجر عربيات

[TELEBK]

السلام عليكم ورحمة الله وبركاته
كل سنه وكل الأعضاء طيبين ، ياريت لو أي حد إتقرص من تاجر سيارات في بيع في شراء ينقل لينا التجربه بتاعته علشان نعرفها ومنقعش فيها ، وناخد منها درس ، وإيه الدرس المستفاد من التجربه ديه .
مع خالص شكري وتقديري

ياااااااااااااااااااااااا ااااه يا عم خالد

فكرتني بايام اما كنت خرنج علي راي ابو الليف مع تجار السيارات


انا اتقرصت مرتين ولحقت نفسي في التالته لانها كانت تابت


اول مره لما قررت اني اشتري عربية مستعمله علشان اتعلم عليها واجيب حاجه زيرو تعيش معايا


فمكنش قدامي غير العربية ال 128 كان تفكيري كله فيها


المهم روحنا لمعرض جنبنا بتاع عربيات مستعمله وصاحبه تاجر طبعا


المهم رسيت علي عربية 128 حمرا موديل 80

المهم جيبت واحد ميكانيكي من طرفي علشان يشوفلي العربية ايه نظامها

وطبعا لاني لسه جديد فمكنتش فاهم يعني ايه ميكانيكي يبعني للتاجر

المهم الميكانيكي قالي العربية زي الفل و10/10 وفبريكة وجربها معايا وقالي 100 فل و 14

المهم بعد ما اشتريت العربية قصدي ادبست فيها ب 16500 +500 جنيه للتاجر + 150 للميكانيكي الله يسامحه


المهم بعد فترة عرفت ان العربية كانت عاملة يجي 100 حدثه ورشه دواخل وخوارج

ديه كانت اول نصبه وخسرت في العربية ديه يجي 10000 جنيه في ظرف 8 شهور فقط


النصبه التانيه

بردك محرمتش من النصبه الاولي وفكرت ابدل ال 128 بعربية شاهين واقسط الباقي المهم

طلع صاحبها ظابط في الجيش وميتقلعش من اللي في رجلك ونصاب عالمي شقق وعربيات

المهم انا اتنصب عليا في الحوار ده في يجي 1500 جنيه ورجعتله الشاهين هانم بتاعته وخدت ال 128 بتاعتي

اللي حصل ان بردك محرمتش من التجار بتوع العربيات ورحت معرض تاني قريب مننا شوية ولاقيت عربية شاهين موديل 2001 لونها ابيض عجبتني المهم جيبت واحد حبيبي اوي وعزيز عليا شفها قالي العربية زي الفل مفيهاش الهوا المهم اتفقنا اني هديله ال 128 والباقي بالتقسيط ومضاني علي وصلات امانه وخلي بالك من وصلات امانه ديه علشان هنرجعلها بعدين


المهم قولت مفيش مشكلة خلاني مضيتله علي وصلات امانه بالباقي وخلاني بصمت كمان

المهم العربية كانت لسه عامله عمره فطلعت بيها في نفس اليوم اللي خدتها فيها علي طريق الاسماعليه علشان الين العربية المهم كان معايا صديق عمري كان معاه عربية شاهين بردك المهم واحنا ماشيين في صوت ونه جامده اوي فصاحبي قالي ديه كارونه يا معلم مع العلم ان صاحب العربية ده قالي انه لسه مغيرها

المهم ديه كانت اول خبطه 4000 جنيه تمن الكارونه

الشك بقا لعب فيا وروحت تاني يوم الصبح علي السمكري والميكانيكي اللي كنت بتعامل معاهم في ال 128 قالولي العربية اولا ملاكي كفر الشيخ وهيطلع عين اهلك علشان تجيبها القاهره

وديه كانت تاني مصيبه

تالت مصيبه بقا ان البارومه كانت واكله الشاسيه بالكامل والطبل بتاعت ال 4 الباب

رابع مصيبة ان العربية كانت شغاله تاكسي في كفر الشيخ وحولها لملاكي والسمكري بتاعي وراني مطرح الشبكه اللي كانت محطوطه علي سقف العربية


المهم انا لبست في العربية ديه لبسه سودا واللي لبسني فيها صاحبي اللي جه شاف العربية وقالي ديه زي الفل مفيهاش الهوا


المهم عملت مشكله مع صاحب العربية وبقا بيهددني بوصلات الامانه اللي مضيتها علي نفسي وبصمت عليها كمان

المهم قولت امري الي الله وخلاص قررت اني مرجعهاش المهم روحت اوديله الورق بتاع العربية عندي لاقا فيها 6 توكيلات لاقيته بيزعق وهيموت وقالي ان علشان يسجل باسمه لازم يدفع 1000 جنيه وقالي تجيبلي 1000 جنيه حالا قولتله ده عند امه يا ادهم وكمان كان عايز ياخد البطارية اللي في الشاهين علشان لسه جديدة

المهم من هنا لهنا قالي كل واحد ياخد عربيته نفض المشوار ده وتدفع الشرط الجزائي الكلام ده طبعا موجه ليا

قولتله لما تشوف حلمة ودنك لاقيته ابتدي يبتذني بوصلات الامانه وقالي لو مدفعتش الشرط الجزائي هسلم الوصلات للشرطة وهي تشوف سكتها معاك

طبعا والدي لما شاف الوضع كدا قالي خد ال 1000 جنيه وارميهم في وشه وهات الوصلات الامانه بتاعتك وهات عربيتك المهم طبعا لولا وصلات الامانه ديه مكنش هيشوف مني اي حاجه




النصبه التالته


بعد نصبة الشاهين حلفت اني مش هركب الا زيرو المهم روحت لمعارض بتبدل العربيات القديمة بعربية جديدة ورسيت علي الاسبيرانزا وملقتش معرض بياخد وبيدي معايا زي المعرض اللي في جسر السويس المهم اكتشفت في الاخر انه مديني سعر عالي في ال 128 بس مزوده في حاجات زي سعر العربية ولحقت نفسي وبعد ما جت موافقة البنك علي شراء الاسبيرانز روحت خالع من الموضوع

الدروس المستفاده من الكلام ده كله تتلخص في الاتي

اوعي تامن لاي تاجر حتي لو ابوك

اوعي تمضي علي اي حاجه زي وصل امانه او ما شابه وخليك دغري افضل

اوعي تجيب ميكانيكي او سمكري يبصلك علي العربية وتسيبه مع التاجر لازم تبقي زي خياله وعينك علي عينه هو والتاجر علشان بيبقي في زي حركات كدا ما بينهم بتبقي ترجمتها خلاصني وهشوفك في البيعه ديه

لازم تختبر العربية بنافسك متسبش حد يجربهالك

وديها عند ميكانيكي تاني وسمكري تاني غير اللي جه معاك علشان تبقي متاكد انك صح

الاهم من ده كله صلي صلاة استخارة قبل ما تشتري

اياك تشتري عربية ارقامها خارج محافظتك

اياك تاخد شهادة مخالفات مر عليها اكتر من 14 يوم

اياك تاخد عربية فيها اكتر من توكيل

لازم تعمل عقد مسجل باسمك افضل بكتير من التوكيل

وربنا يسترها عليكم جميعا

[TELEBK]

متشكر لحضرتك يا استاذ أحمد ، والله شوية مواقف تنفع أي حد عايز يشتري عربيه جديده أو حتي قديمة ومستعملة ، وده معناه " إدي العيش لخبازه ولو اكل نصة " ، يعني أوري العربية لواحد فاهم زي ميكانيكي وإتنين وتلاته وسمكري وإتنين علشان إعرف آخد قرار صح وكويس ومرحعش أندم عليه .
بأكرر شكري

الشكر لله يا عم خالد ده احنا واحشنا مواضيعك الجميلة ديه وربنا يسترها عليك وعلينا وتقبل تحياتي