عضو جديد بستروين ax

[aymangalal]

السلام عليكم اخوانى الافاضل محتاج مساعدتكم بحكم خبرتكم
وفقنى الله فى شراء ستروين ax (بالمناسبة الصح ستروين ولا سيتروين؟؟)
مو 95 1400سى سى دواخل فبريقة وحالته جيده جداَ يعنى مش محتاجه مصاريف بإستثناء التكييف و هى دى العقبة اللى قدامى دلوقتى المفروض ان اصلا فيها تكييف بس الراجل اللى اشتريت منه قالى ان الكمبروسر بتاعها بايظ وشاله وماعرفش باظ منه ولا هوه مشتريها كده؟؟ بخلاف ذلك كل حاجه لغاية دلوقتى تمام وقالى ان التكييف بحاجاته يعمل حوالى 1000 جنيه اكتر او اقل حاجه بسيطة استيراد طبعا وقالى فى واحد عند ايهاب جلال بتاع الستروين صقر قريش عنده صنايعى اسمه طارق ممكن يركبهولك ويظبطة ويخليه تمام فى حدود السعر المذكور
فهل الكلام ده مظبوط؟؟؟؟ دى اول حاجه
تانى حاجه هوه كان عارض العربية على 18500 وانا خلصت معاه بالعافية على 17250 هل متوسط السعر بالنسبة للحاله كويس؟؟؟
اسمع طبعا ان قطع الغيار مش منتشرة بجانب انها غاليه شويه بالنسبة لباقى الماركات
لكن فى نفس الوقت اللى عجبنى انها فيها امكانيات كتير من اول الحجم لغاية سعة الموتور مرورا بالكماليات الاصليه اللى فيها بالاضافة الى ان قطع الغيار معمرة مش مستهلكة زى الفيات وانا ما قررتش انى اشترى الستروين بالذات الا بعد ما جمعت عنها معلومات وسألت ناس مجرباها واتعاملوا معاها ..عشان كده رسيت عليها بعد ما فكرت فى الفيات والبيجو
طبعا ماحدش عارف قيمتها غير اللى يركبها واللى بيشتغل فيها غير كده اى حد هيحكم عليها بالسمع انها وحشه ويحذر من اقتنائها لكن انا توكلت على الله واشتريت لانى ناوى ماغيرهاش لفترة طويلة وان شاء الله هطلع منها ادخل فى زيرو وستروين برضه
معلش طولت عليكم لكن دى اول مره اشترى واركب عربية فى حياتى يعنى عندى جهل تام بكل ما يخص العربيات عموما والستروين خصوصا
اتمنى مساعدتكم واتوجيهاتكم ونصاايحكم
وبإذن الله هقولكم على التطورات اول بأول عشان امشى معاكم صح
والف شكر ليكم مقدما

[mostafa2000]

الف مبروك علي العربية
وربنا يبارك لك فيها
وعلي انا اول عربية امتلكتها كانت الستروين ax
وكنت جايبها زيرو وفضلت معايا من 97 الي 2003
وبصراحة عربية ممتازة جدا عكس ما يشاع عنها ولحد دلوقتي مع اخويا
وبالنسبة لقطع غيارها متوفرة وباسعار تعتبر معقولة
اهم حاجة تاخد بالك من الصيانات بتاعتها

الف مبروك علي العربية يا استاذ ايمن وربنا يديك خيرها ويكفيك شرها وتقبل تحياتي

[احمد بدر1978]

الف مبروك على العربية
خد بالك من مواعيد الصيانة

[محمد زكي]

الف مبروك وربنا يكفيك شرها
انا كمان اول عربيه ركبتها كانت ستروين وكانت نفس مودي عربيتك وبردو 1400 وكانت معانا من الزيرو الاول كانت مع اخويا وبعدين انا خدتها بس للاخدتها متبهدله علي الاخر عشان كده متعقد منها ولكن ده لايمنع انها عربيه كويسه وبالنسبه لقطع الغيار موجوده في الحرفين وفي شارع دمشق عند نافع او العشماوي .
بالنسبه لسؤالك عن السعر كده كويس قووووووووي لو حلتها زي ما انت بتقول انا عربيتي كانت متبهدله خالص وبعتها من سنه ب 15 الف .
بالنسبه بقي للتكيف انا اعرف واحد بتاع تكيف الصراحه ممتاز جدا في جسر السويس عند الف مسكن جمب بنزينة موبيل المجل اسمو ( الابيض ) وصاحب المحل اسمو المهندس عصام انا كنت محتار برعربيتي الكيا وودتها للمراكبي الي بردو في جسر السويس بس حسبي الله ونعم الوكيل بهدلني معاه غيرلي 2 كمبروسير وبردو مفيش فيده وجه في الاخر يقلي هو التسقيع اخرو كده حتي لو جبت واحد جديد فسبتو وخدت فلوس بس طبعا بعد ما اخد منها مبلغ ورحت للمهندس عصام وهو راجل محترم جدا جدا ومن اول كمبروسر ركبو الحمد لله العربيه تمام والتكيف تلاجه ولو تحب انا ممكن اجي معاك كمان .

واخيرا مبرك العربيه وتحت امرك في اي حاجه واسف علي الاطاله