|
#1
13-12-2009, 10:19 AM
|
||||
|
||||
تجربة قيادة هوندا بايلوت 2009
السلام عليكم اخوانى الاعزاء
أولا أشكر اخى العزيز شريف منسى على مرافقتى فى تجربة القيادة و ابداء رايه و انطباعاته...و طبعا على اليوم الجميل اللى قضيناه سويا و عمل جولة سريعة على بعض معارض السيارات.... الموضوع: من اسبوع تقريبا كنت بلف مع مجموعة من الاصدقاء على معارض السيارات بالكويت و فى اثناء الجولة لفتت انتباهى سيارة لم تكن فى الحسبان نظرا لانى كنت فاكرها اغلى من التمن اللى هى معروضة بيه بكتير و جالى الانطباع ده لأنى دايما كانت مرتبطة معايا بمقارنة مع اللاند كروزر و النيسان باترول و هى شكلها فعلا يوحى انها كبيرة بس هى فى الحقيقة عربية Cross Over يعنى تتقارن بحاجات احجامها و اسعارها اقل شوية من العربيتين اللى انا ذكرتهم زى مثلا التويوتا البرادو و النيسان الباثفايندر و لكن السيارة على اى حال بحترمها جدا و بتعجبنى جدا لما بشوفها ماشية فى الشارع و حجمها مناسب جدا ليا و للفئة اللى بدور عليها من العربيات .... طبعا العربية هى هوندا بايلوت و التى كانت تسمى مسبقا MRV و لكن تم عمل تحسينات و تطويرات عليها و تكبير فى الحجم ايضا و تمت تسميتها ببايلوت ... مثبطات:- *ضايقنى شوية موضوع انها صناعة امريكانى مش يابانى بس دى مش مشكلة العربية فى الاخر هوندا و تحت تكنولوجيا و ضمان هوندا .. *واحد صاحبى معاه اختها الصغيرة CRV و نفسه يغيرها و لما سالته عنها طلع عاوز يغيرها و يجب المانى ,, يعنى مثلا طوارق او X5 ... الحاجات دى .. يا رب اوعدنا جميعا .. و قالى انه زهقان منها و من كل اليابانى و نصحنى بالابتعاد عن البايلوت.. منشطات:- *العربية فى الاصل عاجبانى و فى الاخر انا اللى هشتريها او لأ و كمان نفسى اخد الاحساس بتاعها و اعرفها و اقارن بينها و بين جيبات سقتها قبل كدة زى الانفوى و التريل بليزر و الباجيرو و البرادو و للاسف كلهم ماسبوش انطباع كويس عندى و كمان حجمها الخارجى و وسعها الداخلى مناسب جدا بالنسبة ليا *اللى شجعنى اكتر على انى اعمل لها تست درايف هو انى قرات موضوعين عنها فى المنتدى و الموضوعين للاخوة الافاض كنج ميمو و حازم شاهين .. و دول روابط المواضيع للى عاوز يشوف مواصفات العربية و صورها http://www.masrmotors.com/vb/showthread.php?t=11363 http://www.masrmotors.com/vb/showthread.php?t=17013 لأنى هتكلم بس عن التست درايف *طبعا مجموعة الاصدقاء هما فى الاصل اصدقاء اخى العزيز شريف منسى horas3000 و لما لمحتله باملوضوع شجعنى جدا و اتفقنا نروح نجربها يوم السبت 12-12-2009 و بعد تظبيط الموعد مع التوكيل اتوكلنا على الله و انطلقنا الى وكالة هوندا و بعد الرغى المعهود لرجال المبيعات و ذكر محسنات العربية بالتفصيل و كانت اكتر الحاجات اللى لفتت انتباهى هى نظامين Variable Cylinder Management و هو نظام يقوم بتشغيل عدد 3 أو 4 أو 6 من سلندرات المحرك حسب ظروف السير المختلفة التى تمر بيها السيارة و ذلك طبعا لتوفير الوقود و النظام الاخر هو VSA و هو نظام دعم الثبات الخاص بهوندا و هو ما يعادل ESP فى مرسيدس و اخيرا انطلقنا الى السيارو ذات اللون الاسود الخاصة بتجارب القيادة .... تجربة القيادة و انطباعاتها 1- اول ما ركبت العربية حسيت بالراحة على كراسيها و عجبتنى قوى خامتها الجيدة و ايضا جودة التقفيل و قوة الصج عن الهوندا سيتى وطبعا عدادات السرعة و عدد لفات المحرك ذوى اللون الازرق الفاتح المريح للعين و الدريكسيون ذو الازرار متعددة الاستخدام و ماعجبنيش وضع الفتيس اللى مش متعود على مكانه ( بس هو بصراحة موفر مساحة كبيرة بين الراكبين الاماميين و تنفع لحاجات كتير و بعد شوية اتعودت على مكانه) و زراير التابلوه محطوطة بطريقة كويسة و منظمة و سهل التعود عليها و يعيب السيارة عدم وجود شاشة للنافيجيشن مع انها موجودة فى النسخة اللى بتتباع فى امريكا و تم تشغيل السيارة و تظبيط المرايات و الكرسى و الذى منه و انطلقنا.. 2- الانطلاقة بالسيارة و تسارعها مناسب جدا لقوة موتورها و حجمها ووضعها كسيارة جيب و ليست سيدان و عجبتنى بصراحة كنت فاكرها هتبقى اتقل من كدة .. هى طبعا اضعف من الكابريس بتاعتى بس طبعا ماينفعش نقارن بين سحب 3500 سى سى و 5700 سى سى 3-العربية ما شاء الله ناعمة جدا و ممتعة فى تحكمها و العزل الداخلى فيها جيد جدا و نيجى بقى لأكتر نقطة عجبتنى ألا و هى نظام التعليق .... 4- نظام تعليق السيارة ناااااااعم جدا و سلس جدا ... لدرجة انى كنت بفادى نقرة و البياع قالى لأ ماتفاديهاش ادخل فيها قلتله قشطة (و انا مالى هما اللى خسرانين  ) و دخلت فى النقرة ماحسيتش بأى حاجة خالص .. منتهى النعومة و السلاسة ... ما شاء الله و بعدين عديت كذا مطب و نفس الاحساس بالنعومة و الهدوء ... و فيه ملاحظة تانية على نظام التعليق هقولها و نيجى دلوقتى لاختبار الثبات5- الثبات ... بعد ما عجبنى نظام التعليق جيت فى دخلة يمين و لفيت الدركسيون سنة و دست على الاخر علشان اشوف مدى فعالية نظام الثبات الخاص بهوندا... المهم العربية انطلفت تمام الى اليمين بدون زحلقة واحدة مع بعض الميل اللى مقبول جدا طبعا بالنسبة لعربية بالحجم ده و جيت تانى عملت الحركة دى على ارض مبللة و نفس الاداء الرائع بدون اى زحلقة ... ما شاء الله نظام الثبات فعال جدااو يعتمد عليه ... اما الملحوظة اللى قلت عليها و الخاصة بنظام التعليق هى طبعا ميل السيارة و لكنه مقبول جدا مع وجود سلاسة التعليق و راحة القيادة .. 6- ثم اخيرا وصلنا الى طريق مفتوح و شغلت الاوفر درايف و جبت الدواسة على الارض و انطلقت السيارة باقصى سرعة بنفس الانطلاقة المعهودة و بعدين قعدت اتمايل بين الحارات يمين و شمال و ماحسيتش بقلة ثبات واو بقلق من الموضوع ده ... كنت ماشى عادى و العربية ماشية عادى .... برده عجبتنى جدا ....ثم جاء دور الفرامل ... 7- الفرامل ... لما كنت فى الطريق المفتوح دست فرامل على الاخر و كنت ماشى ساعتها على 120 العربية وقفت تماما فى مسافة معقولة بفعل نظامى ABS , EBD بدون زحلقة مع ميل شديد للأمام و يمكن نقطة الميل للأمام ضايقتنى شوية بس هى برده مقبولة جدا بالمقارنة مع الانفوى مثلا او التريل بليزر .. اللى يحسسوك انهم هيتقلبو خلاص بعد كدة تركت الدركسيون للقائد حورس المنسى علشان يسوق هو كمان و يقول انطباعه اللى طبعا مستنينها فى مشاركته ...و قعدت وراه و احنا نفس الطول تقريبا فا كان الكرسى ضيق سنة بس برده مش ضيق قوى ... مقبول يعنى و لكن الملحوظة انى و انا راكب ورا كنت حاسس اكتر بالعربية من ناحية المطبات و اللفات ... النتيجة الاجمالية .... العربية حلوة جدا و تعتبر من افضل السيارات فى فئتها ور بنا يبارك لكل اللى هيشتريها ,, و انا لو ربنا سهل ان شاء الله و قررت اشترى هتكون منافس قوى جدا فى اختياراتى بين سيارات هذه الفئة انا حاولت اختصر على قد ما اقدر علشان الموضوع مايبقاش طويل قوى و ممل ... لكن لو حد من حضراتكم عاوز يستفسر عن حاجة معينة بالتفصيل انا تحت امركم. و شكرا لدخولكم الموضوع و صبركم على انهاؤه ... و السلام عليكم و رحمة الله و بركاته
__________________
 ......................... .. يا ترى جاهزين لتجربة السواقة اللى جاية ؟؟؟؟؟!!!!!!! التعديل الأخير تم بواسطة AbOnOrA ; 18-12-2009 الساعة 09:10 PM سبب آخر: تعديل الراوبط 
|
|
#2
13-12-2009, 11:13 AM
|
||||
|
||||
|
رد: تجربة قيادة هوندا بايلوت 2009
مبروك مقدما يا أبو كمال ! السيارة بالوصف ده تعتبر رائعه ! بل مثاليه للكويت ! أنا مش عارف لتر البنزين
هناك يعادل كام بالمصرى و لكن الكويت كلها مدينه واحده على حتة جهراء على فرنوانيه على عبدلى ! يعنى مش محتاجه قوى 5700 سى سى الا اذا كنت عايز تعمل فيلم مع " فان ديزل " ! و طالما قعدتها مريحاك ( أهم حاجه القعده تكون مستريحه ) يبقى كله تمام ! و بالنسبه للقعده بالخلف ! عمر ما واحد طول عمره مولود أمام الدركسيون ما ح يستريح بالخلف حتى لو راكب " لينكولن " بتاعة أوباما ! ملحوظه أخيره :- لاحظ ان معظم أعضاء المنتدى من مصر المحروسه الغلبانه ! لذلك عند ذكرك أسماء السيارات المتنوعه اللى قدتها أو اللى نفسك تركبها ! كأنك بتتكلم هيروغليفى فى الصين ! Dr. Bolbolan 
__________________
ليت الشباب يعود يوما  فأخبره بما فعل المشيب بى ! ptmnlo123per1127
|
|
#3
13-12-2009, 11:35 AM
|
||||
|
||||
رد: تجربة قيادة هوندا بايلوت 2009
العربية فعلا عاجبانى جدا .. ما شاء الله و مناسبة جدا للكويت و السفر البرى كمان و اعتقد انها هتبقى مش بطالة برده فى البر ...ربنا يسهلها يا رب و الواحد يقدر يجيبها... بالنسبة للبنزين هنا 92 = 60 فلس يعنى 120 قرش تقريبا 95 = 65 فلس يعنى 130 قرش تقريبا و ده اللى انا بتعامل معاه الترا سوبر 100 = 90 فلس يعنى 180 قرش تقريبا نوع كدة مش فاكر اسمه اللى هو بتاع الطيارات تقريبا = 265 فلس يعنى 530 قرش تقريبا ...و طبعا يا دكتور موافق على كلام حضرتك 100 % من ناحية ان اهم حاجة يبقى الواحد مرتاح فى العربية .. دى مافيهاش كلام... اما بالنسبة للقعدة فى الخلف انا ركبت المرسيدس الحوت .. و انا سايق حاسس انى باشا و انا راكب ورا حاسس انى 10 بشوات فى بعض سيارة تبعث على الغرور ركبت الاودى A8 فى السواقة طبعا ملهاش حل .... اما قعدتها ورا مش قد كدة بصراحة ...اقل من المرسيدس بكتييير بس طبعا العربيات دى فى الاحلاااااااااااااااااااا اااااااااام اخرها معانا ركوبة فى السريع او تست درايف و ربنا يرحمنا من الجمارك يا رب علشان نقدر فى مصر نستمتع بالعربيات الحلوة دى و نقدر نفك رموز حجر رشيد
__________________
......................... .. يا ترى جاهزين لتجربة السواقة اللى جاية ؟؟؟؟؟!!!!!!!
|
|
#4
13-12-2009, 02:38 PM
|
||||
|
||||
|
رد: تجربة قيادة هوندا بايلوت 2009
من أحلى تقارير تجربة القيادة اللي قرأتها
تسلم إيدك
__________________
 قال رسول الله صلي الله عليه وسلم( إن لله عبادا اختصهم بقضاء حوائج الناس, حببهم إلي الخير, وحبب الخير إليهم, هم الآمنون من عذاب الله يوم القيامة).
|
|
#5
13-12-2009, 02:47 PM
|
||||
|
||||
رد: تجربة قيادة هوندا بايلوت 2009
__________________
......................... .. يا ترى جاهزين لتجربة السواقة اللى جاية ؟؟؟؟؟!!!!!!!
|
 |
|
|
