صوت تكتكه بعد ضبط التاكيهات .... ؟؟؟؟؟؟؟؟؟ هتجنن

[zing0]

السلام عليكم
أولاً العربيه مكنتش بتشتكى من التاكيهات و رحت غيرت كاتينه من شهر راح الميكانيكى أعاد ضبط التاكيهات من نفسه !!!
بعدها سمعت صوت نقر أو تكتكه و مفيش سحب
رحت لميكانيكى غيره يضبطها تانى, الباشا ضبطها بصفيحه منشار (أصل الفيللر بتاعه كان ضايع) !!!
رحت لميكانيكى ثالث (جارنا) راح ضابط العادم و ساب الحريق, صوت المكنه عالى جداً و برضه مفيش سحب.

توكلت على الله و سألت و شوفت فيديوهات و بصيت عالكتالوج و صحيت بدرى و حاولت أضبطها بنفسى ( عادم 25-حريق 20 /// فى الكتالوج بيقولوا كله على 15)
النتيجه: ---------------------
- صوت المكنه هادى و سحب ممتاز و مفيش سخونيه الحمد لله
- صوت تكتكه مستمرة بتظهر لما العربيه تسخن شويه ( تأخد حرارتها الطبيعيه)

عاوز أعرف فى أى ضرر لو طنشت الصوت ده, خاصه إن الشتا داخل و الجو هيبقى بارد
و لا لازم أعيد الشغل ثانى؟ و أيه الخطأ؟
العربيه لادا
منتظر ردودكم

[محمد فيصل]

عليك بإستخدام زيت من نوع جيد
جرب مواصفة العبقرى carsadmire زيت موبيل دلفاك mx3مع معالج زيت ابرو

إن شاء الله تجد كل الخير

[zing0]

يعنى المشكله فى التزييت مش فى ضبط التاكيهات نفسها؟؟؟
يعنى ضبط التاكيهات طلع بريئ؟؟؟

أنا كنت حاطط شل أحمر 20/50 و عليه أبرو
و بقاله 3000 كيلو, يعنى المفروض أغيرة اليومين دول بس لزوجته كويسه
كنت ناوى أستنى عليه شويه كمان
شكراً أستاذ محمد, و برضه مستنى أراء أخرى

[zing0]

معلش يا جماعه
أنا غيرت زيت من يومين
و ضبطت التاكيهات تانى على 25 كله
و برضه فى صوت تكتكه (نقر مستمر)
و صوت العربيه بقى خشن عن الأول (الـ 20/25)
بس كنت بأشم ريحه بنزين محروق بعد الـ 70 كم/س, دلوقتى راحت الحمد لله , بقت فوق الـ 100

أنا هأتجنن بجد من صوت النقر ده
أنتوا بتضبطوا هلى كام؟؟؟؟؟؟؟؟

الميكانيكى إللى جنبنا بيقوللى كله على 30
و الإخوه هنا كانوا بيقولوا 20/25
و الكتالوج بيقول كله على 15
و أنا حالياً ضابطه كله على 25
عاوز واحد متخصص يرد عليا ينوبه فينا ثواب

عاوز حل للمشكله دى و بإذن الله هأحاول تصويرها فيديو و صور و أعمل بيها تقرير للإخوه هنا علشان نعرف نضبط التاكيهات بأمر الله من غير ميكانيكيه

[Hisham.Elgazzar]

المشاركة الأصلية كتبت بواسطة zing0 معلش يا جماعه أنا غيرت زيت من يومين و ضبطت التاكيهات تانى على 25 كله و برضه فى صوت تكتكه (نقر مستمر) و صوت العربيه بقى خشن عن الأول (الـ 20/25) بس كنت بأشم ريحه بنزين محروق بعد الـ 70 كم/س, دلوقتى راحت الحمد لله , بقت فوق الـ 100 أنا هأتجنن بجد من صوت النقر ده أنتوا بتضبطوا هلى كام؟؟؟؟؟؟؟؟ الميكانيكى إللى جنبنا بيقوللى كله على 30 و الإخوه هنا كانوا بيقولوا 20/25 و الكتالوج بيقول كله على 15 و أنا حالياً ضابطه كله على 25 عاوز واحد متخصص يرد عليا ينوبه فينا ثواب عاوز حل للمشكله دى و بإذن الله هأحاول تصويرها فيديو و صور و أعمل بيها تقرير للإخوه هنا علشان نعرف نضبط التاكيهات بأمر الله من غير ميكانيكيه

بص يا أستاز محمد طلاما ظبطتها كلها على 25 يعنى ظبطه كل المواسم (مش مقتنع بالكلام ده )
وانت متأكد من ظبط الكاتينة ولا مقدمة ولا مأخرة يبقى خلاص
استخدام البنزين ال80 ولما بيكون وش السلندر قديم بيبقى صوته عالى
ده طبيعى حتى ف اى عربية تانية لما الموتور بيقدم لازم صوت التنقير ف الوش بيزيد
ايام ماكان معايا عربية 131 كان صوتها زى مواتير الديزل وادخل بنفسك وشوف الفديوهات بتاعتى على التيوب
ودلوقتى انا بعتها خلاص وتركت مجال العربيات نهائى الحمدلله
ياريت ونصيحة منى بلاش تدب مفك فى عربيتك تحت البيت عندك الناس نفوسها بقت زى الزفت

قبل ما ابيع العربية كانت مكسرة كرونتين وآخر كرونة كنت قبلها بظبط حاجة ف الموتور لقيت البعيد نط ف الكبوت وبيقوللى " أنت بتصلح عربيتك بنفسك !!!!!!!!! " ومن ساعتها العربية اتجننت وجابت كرونة مكملتش اسبوع بعد مشوفت وشه ..........
رفعتها تحت البيت لحد ما صلحت الكرونة ومشيتها

الخلاصة اظبط التاكيهات متخليهاش مفتوحة ولا مقفولة وتوكل على الله وياريت تخليها على كدا طلاما العربية عزمها كويس ومش بتاكل بنزين ولا زيت متجيش جنبها
صحبى كان معاه سيات 133 موتور 127 وكان بيظبط على 25 ازاى اللادا ال1600 تتظبط على 25 !!!!!!