طوابير البنزين في المنيا تنتقل من داخل المدينة الى قلب الطريق الصحراوي

[Ahmed AlGamal]

ازمة البنزين الفجة في المنيا و معاناتي بسببها زي اي منياوي طالع تييييت اهله :-

بقالنا اسبوعين ما فيش ولا بنزينة في المنيا نزل فيها بنزين غير مرتين مرة في في بنزينتين مختلفتين واحدة 80 و التانية 90 (الكوبري العالي) .. انا ما ينفعش احط 80 ( بنزينة الغاز الجديدة) و مع ذلك عديت على البنزينة اتفرج و الاقيلك طبورين على طول الطريق الزراعي وربنا عينك ما تجيب اول الطابور الواحد فوق ال 200 او 300 عربية انا في الاول ما كنتش مصدق ان ده طابور البنزين لان مش منطقي بس لما كملت مع الطابور لقيته داخل على البنزينة و ايه كمان ؟؟ ده مافيهاش بنزين بس الناس راكنة عربياتها في الطابور و بتروح تنام و بيتصلو ببعض لما عربية البنزين تيجي خصوصا سواقين التاكسي ... اما ساعة البنزين ال 90 في ده كان قريب بعد ما الازمة كانت جابت اخرها .. انا ما روحتش من اساسه لان قالولي انه هلاك و خناقات و حتى لو وقفت البنزين هيخلص قبل ما يجي دوري لان برضه بتبقى العربيات مركونة قبلها بيوم على حسب اخبارية معاد نزل البنزين في البنزينة و معظمهم بيبقى تاكسي ... المهم النهاردة التانك دخل في الاحتياطي .. ناس كتير قالتلي على بنزينة الطاقة اللي على الصحراوي بس انا كنت بقول مش معقولة هضرب المشوار ده كله عشان املالي 30 35 لتر و اضيع منهم 5 في المشوار بس النهاردة قلت مابدهاش و اهو الميزة برضه في انها هتبقى رايقة و من غير طوابير .. و طلعت لقيت الطوابير اللي كانت تحت بقت فوق على الصحراوي ... طابورين واحد كان 36 عربية و التاني قده او اكتر و مسدسين اتنين في البنزينة كلها مسدس لكل طابور و استنيت ساعتين في عز الشمس في الصحراء القاحلة الساعة 2 الظهر لما كنت هاخد ضربة شمس .. طب طالما طوابير بطوابير ما ينزلوها تحت جوه البلد بدل ما نضرب مشاوير و نروح في الصحرا ... هو احنا كفرة ليه كده بس

[sherifabden]

سلملي على الازمة النفسية والنهضة
حكومة فاشلة

[memodina1]

الغريب انى كل ما اقول الكلام دا يطلع واحد يقولك البنزين موجود دى ازمة مختلقة اعمل اية فى الناس دى

[ahmed208]

الازمة في كل مكان عندنا في المنصورة من كتر الخناقات بنزنتين او ثلاثة ولعوا

[Ahmed AlGamal]

المشاركة الأصلية كتبت بواسطة ahmed208 الازمة في كل مكان عندنا في المنصورة من كتر الخناقات بنزنتين او ثلاثة ولعوا

برضه هنا في المنيا حصلت مرتين ثلاثة بس مش حرايق رهيبة او انفجارات يعني .. كانت بتتلحق علطول .. اللي انا مش فاهمه ازاي يوصل بواحد الغباء انه عشان بيتخانق يروح مولع نار او يتسبب في حريقة و يموت مئات هو من ضمنهم و لا بتبقى ايه اسباب الحرايق ده ؟؟