مصر موتورز مجتمع السيارات - و أخيرا بعد ما غلبت كل المنتدى معايا إن شاء الله مازدا 3

السلام عليكم
معلش يا شباب بقالي كتير مش بشارك لظروف سفري لأداء فريضة الحج ( ربنا يكتبهالنا كلنا يا رب )
بقالي فترة بتابع بس من غير مشاركات تقريبا
بس أخيرا قررت أكتب بعد طول غياب ( حلوة بعد طول غياب مش كدة ؟ :) )
بعد طول تفحيص و تمحيص و تفعيص في السيارات و بعد ما حيرت كل المنتدى معايا ربنا يجازيكم خير على تحملكم معي و مشاركاتكم همومي و أحزاني و أفراحي أيضا
الخلاصة علشان ما أرغيش كالمعتاد ( زمانكم زهقتوا مني :) )
الميزانية بتاعتي اتحددت من 125000 إلى 13000
و طبعا حلم الكورولا اتبخر و ذهب مع الريح ( حلوة برضه :) )
فكرت في أربع سيارات و نزلت شفتهم في معارض (و دي كانت خطوة حاسمة موضوع المعرض دة )
1- شيفورليه كروز أوتوماتيك 124900
2- كيا كارينز أوتوماتيك 117900 ( تقريبا ) وكيل
3- كيا سيراتو 2011 SX اللي ب 119000 ( برضه مش فاكر السعر دة مضبوط ولا لأ )
4- ميتسوبيشي لانسر بومة 2010 أةتوماتيك وكيل ( سمعت فيها أكتر من سعر ومالقيتش معروض منها إلا خليجي )
طبعا دخت و دوخت مراتي معايا لأني لففتها على المعارض لما رجلها ورمت ( و أنا ليا وجهة نظر في أخذ رأي الجماعة في السيارة قبل الشراء ممكن أقولها بالتفصيل بعدين علشام ماطولش ( مع إني طولت فعلا :) ) )
باختصار

اللانسر كانت مشكلتها معايا في حاجتين 1- تغيير الوكيل و عدم استقرار السيارة في السوق زائد إني مالقيتش إلا الخليجي بس 2- الشكل قديم قوي (من 2003 تقريبا ) بس الميزة إنها ياباني 100% و عربية ماحدش اشتكى منها ( على حد علمي )
الكارينز عربية ممتازة و لكن يتبقى مشكلة الكوري و عدم إثباته للجودة بشكل قوي للإقناع بالشراء و التفضيل على الياباني + شكوى الناس من العفشة و ضعف التكييف لكبر حجم السيارة + عدم وجود ABS إلا في فئة ال HIGH LINE الل ب 129900 و دة سعر غالي جدا الصراحة عليها + إني مش معجب أوي بالسيارات الSUV إلا لوكانت ألماني مثلا و مواتير عالية أكبر من 2000CC
السيراتو نفس الكلام بالنسبة للكارينز + شكوى الناس من العفشة و فقر التقفيل الداخلي و بعض الشكاوى الأخرى الصغيرة
الكروز كانت أحسن اختيار جودة مناسبة + توكيل قوي + حجم مناسب + شكل جذاب و اسم عريق و تكنولوجيا ألماني , و كنت مقدم على الشراء مع نحفظي على زيادة السعر خصوصا إن أول فئة فيها ABS هي ال high line اللي ب 134900 و دة برضه سعر مبالغ فيه علشان أدفعه في سيارة كوري علشان اخد ABS مع حاجات تانية أنا مش محتاجها

المهم
بقدر الله كنت باكلم مندوب شركة في التليفون علشان أسأله على الكروز فقالي على المازدا 3
طبعا في البداية قلتله لأ طبعا دي غالية عليا ( 139000 ) + إن قطع غيارها غالية و مش موجودة
قالي إن فيه عرض دلوقتي عليها خصم 10000 جنيه + توكيلها دلوقتي مع غبور يعني ماتقلقش من الصيانة و قطع الغيار
الفكرة لعبت في دماغي و نزلت اتفرجت عليها لقيتها باختصار سيارة أكثر من رائعة
ياباني 100% + جودة عالية + شكل جذاب + سعر معقول + كماليات ممتازة على هذه الفئة السعرية + وكيل قوي + ثبات على الطريق مشهود له + ...... الخ
بس طبعا الحلو مايكملش
هناك عيب بسيط هو صغر الباب الخلفي للسيارة مما يعطي عدم راحة في الدخول و الخروج من السيارة + الصالون ضيق شوية + تخوف من عدم معرفة أسعار قطع الغيار حتى الان ( لكي يطمأن قلبي) + مركز الصيانة الوحيد حاليا في أبو رواش يعني محتاج سفرية كل صيانة
طبعا مافيش عربية فيها كل المميزات و ليس بها عيوب علشان كدة أنا فاضلت المميزات مع العيوب لقيت إنها أفضل إختيار في هذه الفئة السعرية
بس طالب منكم ثلاث طلبات
1- الدعاء لي بالتوفيق و السداد
2- مشاعدتي في بيع سيارتي لكي أستطيع من اكمال ثمن السيارو ( كنت عامل موضوع في قسم اعلانات بيع السيارات و الظاهر إن مافيش حد عبرني لحد دلوقتي مش عارف ليه , و دة اللينك بتاعه http://www.masrmotors.com/vb/showthread.php?t=41712
3- معرفة أسعار قطع الغيار بالضبط من عند عمو غبور
و في النهاية اسف على الاطالة و أتمنى للجميع التوفيق لأحلى منتدى