مصر موتورز مجتمع السيارات - تقرير عن BYD F3 اتوماتيك

السلام عليكم و رحمة الله و بركاته
أولاً أنا أسف جداً على التأخير في كتابة الموضوع
ثانياً أنا استلمت العربية الحمدلله يوم الاتنين اللي فات 2011-05-09 و كانت عاملة 40 كم ، و هي الان عاملة 790 كم و أنا حجزت صيانة 1000 كم يوم السبت اللي جاي إن شاء الله في مركز القطامية مع إن فيه ناس كتير نصحتني أروح اسكندرية بس للأسف عندي ظروف تمنعني من السفر الايام ديه

أنا هحاول أعمل تقرير وافي عن العربية و مزاياها و عيوبها

نبتدي بالعيوب :

1-الشنطة عشان تتقفل لازم تترزع جامد و رحت عن واحد بتاع أبواب في السابع عملها بس للأسف المفتاح إلي بيفتح الشنطة من جوة بقى أوقات يشتغل و أوقات لأ و كمان الشنطة مفارقة من جانب و الجانب التاني لأ

2-فيه هواء ساخن بيجي من عند الدواسة أو من تحت التابلوه و ديه فعلاً الحاجة إلي مزعلاني خصوصاً إن التكييف بتاع العربية حلو أوي بس بسبب الهواء السخن دة العربية بتاخد وقت عشان تسقع (أنا عارف اني المفروض مشغلش التكييف بس عشان كان راكب معايا ناس كبيرة )

3- العربية فيها رعشة أو غربلة عند سرعة 120 كم فما فوق (مش عارف دة ترصيص ولا إيه )

4-الفوانيس الأمامية مرفوعة أوي لفوق لدرجة اني بحس إن مفيش فرق بن العالي و الواطي

5-أوقات بسمعة صوت ونة بسيطة أوي عند سرعة 60-70 كم (دة عيب ممكن التغاضي عنه عشان أنا ودني حساسة زيادة عن الزوم و ممكن العيب دة يكون عند حد تاني و مش واخد باله عشان ذي مابقول أنا بركز أوي مع العربية)

6- الباركينج سنسور بيدي صوت على أساس اني هخبط في اللي ورايا في حين إن بيبقى فيه لسة مسافة حوالي نص متر

7- إستهلاك البنزين كان مع أول تفويلة 11.7 كم في اللتر ، مع تاني تفويلة كان 9 كم في اللتر

نجي بقى للمزايا
1-العربية ناعمة قوي و صوت الموتور تحت RPM 3 بيبقى ناعم و هادئ و أحسن حاجة اني مش بحس بالعربية على الارض و هي مشية

2-العربية واسعة الحمدلله و الشنطة مشاء الله واسعة قوي

3-عزم الموتور شديد لما بحب اقرص عليه مش بيخيب ظني و العربية بتجيب معايا

4- العربية راسية على الأرض و تحس انها مسكة نفسها

5-عفشة العربية لا هي ناشفة ولا هي طرية و مش بترزع في المطبات

6-إرتفاع العربية عن الأرض كويس قوي و لما حد بيركب ورا مش بتهبط جامد

7- تقفيل العربية إلى حد كبير كويس قوي بإستثناء الموكيت

أخيراً أنا راضي عن إختياري للعربية ديه و لو رجع بيا الزمان لورا حجبها برضه

و أنا جاهز للرد على أي إستفسار