لاسبيراتير العادى يناسب مصر وصيانته سهلة وبسيطة - اذا تعطل ستبقى السيارة تحتضر حتى تصل بك لمنزلك لكنها لن تموت ابدا
|
أحتضرت النهارده عالصبح ...
أمبارح كنت بايت عند نسايبى و بلف على بنزين فى حلوان, مفيش مش عارف ليه
المهم طلعت على الساعة 8 الصبح النهارده و معايا الجماعة و الأولاد و قولت أشوف بنزين
و يا دوب بأعدى مطب (اللى قدام كمين مدخل مايو) لاقيت العربية بتضرب مدافع و بطلت
زقيتها على جنب و بدأت رحلة البحث عن المشكله....
1- أمبلية مدافع للكربراتير للنظافة (لإن التانك كان عالآخر فقولت ممكن تكون شوائب) و نضفت بك السلانسية ..... لسه
2- يبقى كهربا, لاقيت الأبلاتين لادع, صنفرته و نضفته .... برده لسه
3- يبقى الكوندنسر, طلعت كيس الأبلاتينات و الكوندنسرات القديمة و فكيت الإسبراتير و ركبت كوندنسر و أبلاتين جداد و ضبطت عالفللر و أجرب .... برده لسه مدافع
4- بعد عدة محاولات اكتشفت إن الكوندنسرات اللى بركبها كلها بايظه (اللى بيقولو عليها فرنساوى) و آخر واحد (انجليزى) طلع ابن حلال و عليه أبلاتين فرنساوى
5- نسيت اتجاه الشاكوش بتاع الإسبراتير و اضطريت أجيب الرابع و أضبط العلامات بتاعة التقسيمة و أسقط الإسبراتير و أتأكد من ترتيب أسلاك البوجيهات .... و أخيراً , الحمد لله
صحيح بقالى أكتر من ساعة فى الحوار ده و ظهرى أتنى و أتبهدلت بس الحمد لله أنها مكسفتنيش
و الحمد لله لاقيت بنزين فى وطنية اللى فى المعصرة عالأوتوستراد, صحيح الطابور طويل بس العربية كانت هتشتم و تقل أدبها لو مكنتش فولت
