النهاردة سرقت عربية ابويا وعملت حادثة

[3bdo]

ألسلام عليكم النهردة حصلى موقف خلانى اتمنى للحظات انى اموت النهاردة كان عيد ميلادى المهم كنت عازم اربعة صحابى عشان بقالى 10 سنين معملتش عيد ميلاد و فى واحد منهم جه بدرى واعدنا على الكمبيوتر شوية وباقى الرجالة كلمونى وقالولى تعالى فى المكان الفولانى عشان منعرفش السكة المهم نزلت انا و صاحبى اللى جه بدرى وقولتله احنا هنروح بعربية ابويا الجديدة خصوصا النهاردة كان عيد ميلادى و(((((كنت))))) مبسوط و قولت هاخد العربية المهم صاحبى قالى لا عشان البواب اللى قاعد فى الجراج ميقولش لابوك وانا اقوله هنطلع يعنى هنطلع فى الاخر قالى خلاص اطلع خدنا العربية وطلعنا بيها وانا دايس بنزين على الاخر و ماشى ومش هاممنى حاجة وكل شوية اجيب 40 واطلع 65 وطبعا كل ده فى شوارع متبهدلة و صاحبى اعد جانبى عمال يعيط ويقولى اهدى حرام عليك لنلبس فى حاجة و وحاسب عشان فى ناس ماشية وحاسب عشان المطب المهم قرفنى ركنا العربية ونادينا على العيال صحابى وجم ركبوا العربية المهم وانا بطلع من الركنة قولت لصاحبى انزل بص لاحسن يكون فيه حاجة مش شايفها نزل زى الحمار ربنا ياخدوا المهم جايب المارشدير و راجع سنة سنة و هووووووووووووووب ايه يا جدعان ببص لقيت صاحبى عمال يلطم ويقولى العربية ادمرت من ورا حسيت انى بموت وجسمى كله اتشل عن الحركة قولتله اركب بسرعة عشان نروح حتة فاضية نبص فيها على العربية عشان الشارع كان زحمة وكله عمال يبصلى روحت طاير بسرعة ودايس بنزين على الاخر الواد اعد عمال ينهج وبيقولى يخربيتك يخربيتك ركنت فى حتة فاضية ونزلت ابص لقيت الاكصدام داخل جوه مكان العمود المهم جبت ورق كرتون ونمت عليها و نزلت تحت العربية و رديت الاكصدام بايدى بس فضلت فى خبطة فى الشنطة افتكرت ان فيه سمكرى جمب الكراج اللى ابويا بيركن فيه روحت واخد العربية وروحتله لاقيته عنده كذا عربية شغال فيهم قولتله سيبك منهم وتعالى بسرعة المهم جه معايا وريته العربيةقالى هنعمل كذا وكذا قولتله هتاخد كام من الاخر قالى انا باخد فيها 150 جنيه طبعا مكنتش عايز اقوله كلمة وحشة بس قولتله لا مش هينفع انت كده بتستغلنى وبعدين الخبطة صغيرة وكدا قالى خلاص هعملها ب 100 جنيه قولتله كفاية 50(مع ان الخبطة صغيرة ومتسواش عشرة جنيه) قالى طيب اركنهالى فى المكان اللى هناك ده وهظبطهالك وانت واقف المهم ساب كل العربيات اللى فى ايده وجه اعد ساعتين يشتغل فيها وانا واقف مرعوب لحد من الجيران يجى يشوفها المهم خلص شغله وقالى اجيبلك واحد يركنهالك ؟؟؟؟
قولتله اه عشان كنت قرفان امسك الدركسيون واسوق و الصراحة كنت كرهت العربيات و السواقة واللى اخترعوا العربيات المهم الواد بص وراه عشان كان هيرجع لورة لقيت العربية مشيت لقدام تلاقيه جايب الفتيس على الدى المهم اتفقت مع الراجل ميجيبش سيرة لحد و السمكرى قال للحارس اللى فى الجراج متجيبش سيرة لحد قاله انا لوا هقول ولا هعيد انا بس خايف ليخبط عربية من الموجودين فى الجراج طبعا كلت تريقة من صحابى مفيش بعد كده واعدوا يحفلوا عليا حتى وانا اقولهم لما تبقوا تسوقوا عربيات تبقوا تعالو اتكلموا المشكلة انهم لما كنت بزود السرعة كانوا عمالين يترعشوا ويقولوا اهدى وبراحة حرام عليك ودى كانت حكايتى وحبيت افيد اى حد لسة بيتعلم السوقة او بيسرق عربية ابوه
اه نسيت حاجة صاحبى اللى كان طالع يبصلى لما لبست فى العمود طبعا كنت قرفان منه وعمال اشتم فيه قالى والله اعد اقولك بس كفاية و كانت ايدى مكلبشة فى العربية عشان مترجعش لورا بس انت مسمعتنيش والمشكلة انى باقى صحابى اللى قاعدين فى العربية مسمعهوش برضه
ملاحظاتى
1- لو بتسرق عربيةابوك او لسة بتتعلم السواقة و جيت تطلع بالعربية بص كويس حوالين العربية لحسن يكون فى خازوق او عامود او اى حاجة ممكن تبوظلك الاكصدام
2-لو عربيتك اوتوماتيك وجيت تركن اعد دوس فرامل سنة سنة واوعى تدوس بنزين
3-خلى دايما عينك على المرايا
4-لما تيجى تنزل واحد صاحبك عشان يبصلك اختار واحد يكون فاهم وخليه لما تقرب من الجزء الصلب يقولك كفاية بصوت عالى
عندى كام سؤال كده
دلوقتى ال 50 جنيه اللى راجل خدها دى كتير ثانيا فى خبطة ثانيا مكان الخبطة فى الشنطة جمب البلاستكة اللى بيتعلق عليها النمر فى حتى متقشرة وداخلة لجوة و باين ان ملعوب فيها بلنار شغل الصنايعية التعبانين والراجل قالى مش هينفع اصلحها عشان عايزة تترد و واللى وراها بالظبط عامود من الشاسيه وقالى بلاش ترشها العربية لسة جديدة ونصحنى اجيب استيكر والزقو عليها تفتكروا اعمل ايه فيها واعمل ايه فى نفسى لانى مدمر نفسيا ومش عارف ازاى العربية اتخبطت منى طبعا انا عارف ان الموضوع ده كمان كام سنة هيبقى نكتة بحكيها لصحابى بس يا جماعة انا مخنوق من نفسى ومش عارف اعمل ايه مع العلم الحج بيذلنى بالعربية ومش عايز يخلينى اسوقها غير كل فين وفين على العموم انا عندى 16 سنة وكلها سنتين واسرق العربية براحتى عشان هيبقى معايا رخصة ودى كانت 3 مرة اسرق العربية فى سؤال تانى يا جدعان انا رجلى تقيلة اوى على دواسة الفرامل والبنزين هل الموضوع ده عند كل الناس ولا عندى انا بس وبالنسبة للسواقة انا بخلى رجلى الشمال على الفرامل واليمين على البنزين ولا لازم ابعد رجلى الشمال عن الموضوع خالص واخلى رجلى اليمين هيا اللى تشتغل

[hamdy said]

اولا لازم تعترف للحاااااااااج اهم حاجة اوك:010104~17 1:

[M.TONSY]

نصيحتى ليك انك تواجه الحاج لانه هيعرف هيعرف
يمكن لما يلاقيك شجاع يقدر الموقف ويسامحك احسن لما يعرف من حد تانى هتكبر فى نظره
وطبعا متكررهاش تانى
وبعدين واضح انك لسة محتاج تتعلم السواقة كويس لانك فى الاوتوماتيك ما بتستخدمش رجلك الشمال نهائيا هى اليمين فقط وبالممارسة والتعليم الجيد هتتعود على حساسية العربية ده اذا الحاج ركبهالك تانى

[Sniper1612]

ولله انا اول معرفت انا عارفك من التوقيع اول ملقيت العربية مكتوب ميتسوبيشى و انا كنت شفت التقرير اللى كنت عاملة و عارف انك معكش رخصة جه فى بالى انو انتا و نزلت اشوف التوقيع زعلت اوى اوى والله و قدر الله و ما شاء فعل و حمد لله على سلامتك و فداك الف عربية المهم تبقى تخلى بالك بعد كدة و متزعلش نفسك ما والدك اللى معاه رخصة و بيسوق اكيد بقالة كتير خبط العربية فى اول يوم جبوها فيه فيعنى مش مشكلة و ولا يهمك اهم حاجة انك متكنش خبط شخص عشان موضوع الرخص و كدة و مرة تانية حمد لله على سلامتك و زى ما الاستاذ تونسى قال حاول تصارحة و برضو مينفعش خالص تستعمل رجلك الشمال فى الاتوماتك لانى ده هيربكك و انت سايق و حاول متككررهاش تانى الا لو قلت لوالدك عشان لو لقدر الله حاجة حصلت يعرف يلحقق

[Elsebily]

انت فكرتني بنفسي بصراحه وانا في ثانوي برده خدت العربيه زيك كده بس انا بقي مخبطش عمود كنت خبطت واحد ورحت القسم ولولا ناس أصحابي كانو بيدربو في القسم كان زمان الحاج عندي عرف بس الحمد لله عدت علي خير ومعرفش والازاز المكسور قلتله انها طوبه وعيل رماها وعامة متقلقش هو ممكن يغلس عليك ويحرمك فتره معينه منها بس انت كده كويس ده فيه ناس اصحابي عملو حوادث وسببو عاهات لناس وكانو بردو واخدين العربيات من ورا ابوهم
المهم بقي بالنسبه لموضوع دواسة البنزين والفرامل بالنسبه للعربيه الاوتوماتيك رجلك الشمال مش بتشتغل فيها خالص لانها تقيله والرجل الشمال وظيفتها في العربيات المانيوال بس مع الدبرياج لكن في الاوتوماتيك خلي رجلك اليمين شغاله بين الفرامل والبنزين علي حسب حاجتك لاي حاجه منهم انما لو جربت توقف برجلك الشمال التقيله هتلاقي العربيه وقفت منك فجأه وأهم حاجه بس متتعودش انك تجري بالعربيه من دلوقتي وخاصة في الاماكن اللي فيها ناس ونصيحتي ليك انك تواجه الحاج لانه كده كده هيعرف (نصيحه من مجرب )