تجربة صيانة تويوتا كرولا شاملة بإشرافي من غير التوكيل.

[dr_eslam_66]

السلام عليكم ورحمة الله وبركاته
انا حبيت أنقلكم تجربتي بعد الصيانة لما عربيتي عملت 200 الف كيلو وأهو كلنا نتشارك الآراء.
نوع السيارة: تيوتا كرولا 1.8 موديل 2002 XLI (الجير أوتو والباقي كله مانيوال زي الزجاج والمرايات ومافيش سنتر والكلام دا كله) أنا قولت بس أوضح الفرق لأني فيه ناس بتبقى فاكرة الـ 1.8 دي الي هيا كاملة.
الأعراض الي خلتني أبدأ عملية الصيانة: أولا السيارة موديل قديم بس الحمد لله أنا مش مخليها محتاجة أي حاجة دايماإيدي فيها على طول وبتمشي معايا أحلى مشي أحسن من الزيرو كمان,
بس مش لدرجة إني أعمل السيرفيس في التوكيل فا علشان كدة ممكن كلنا ناخد بالنا من عربياتنا برى التوكيل ليه لأ الموضوع فعلا أوفر

• أولا بدأت أحس برجة في العربية بعد السرعة 100 وبتختفي على 130 والرجة في كامل جسم العربية مش في الدركسيون وبس.
• فيه صوت صفارة في الفرامل وأنا دايس بريك أو لأ فا موجودة ولاكن بمازاجها أحيانا مستمرة وبتزيد مع ضغط الفرامل لدرجة إني بقفل الشباك من إستمرارها بتعصبني وأحيانا مختفية خالص ولا ليها حتى صوت مع الفرامل.
• مع نقل الجير بالأخص من الP لل R بتحصل رجة خفيفة كدة.

الخطوات المتخذة لمحاولة إحتواء الموقف:
أولا أحب أوضح إني من فترة قريبة قوي كنت لسة مغير الكاوتش بـ (يوكوهاما بنفس المقاس الأوريجينال ماغيرتوش) والبطارية بـ (أسيديلكو جافة نفس الي بتنزل فيها هنا) طبعا أنا ماغيرتهمشي نزاهة لا طبعا كانوا جابوا آخرهم.

• أول حاجة مدايقاني هيا الرجة لأني دايما ماشي بسرعة وكمان علشان فلوس الكاوتش كانت لسة حرقاني قوي بصراحة.

روحت للراجل بتاع الكاوتش وغنيت قصيدة أبو المراجيح إزاي يبقى طقم الكاوتش جديد وعندي رجة المهم الراجل ماكدبششي خبر وركب معايا وجربنا العربية وفعلا إقتنع بالرجة ورجعت الورشة فكيت الفردتين الي ورى وعيدنا الترصيص وركبناهم وقالي إفتح الكبوت وقعد هوا جوا العربية ووقفني قدام وقالي بص هتشوف إيه,
هوا كان بيغير الجير على كل الغيارات وأنا لقيت المكنة بتتحرك حركة كبيرة مع كل غيار.
قالي أنا مارضيتشي أزعلك فا عيدت على الترصيص بس روح غير قواعد المكنة.

• ماكدبتش خبر طلعت على واحد بتاع قطع غيار أصلية إشتريت تلات قواعد بس مش اربعة لأني الرابعة أنا كنت شايفها بحالة ممتازة وروحت ورشة تانية ركبتهم وطبعا إستغلني شوية في مصنعية التركيب بس هعوضها منه لاحقا حسب ما هنعرف مع بعض.

فعلا العربية إرتاحت خالص والموضوع بدأ يبقى هادي مافيهوش أي رجة بس ستل لسة فيه صوت مش عاجبني.
روحت بعديها بيجي إسبوع جه معاد تغيير الزيت بتاع المكنة فاقولت بالمرة بما إني في حملة صيانة وفوقان للعربية ليه لأ قومت غاسل الماتور بالمر (فيه عندهم مكنة بتغسل قلب الماتور بزيت يضخ ويخرج من الماتور فوريا) الواد حس إني عيل فرفور وحب يشتغلني (ماهو برضو مافيش حد هوا الي بيقول إنه عايز يدفع فلوس أكتر, علشان ياعني قولتله إغسل الماتور مش هوا الي قعد يزن عليا) المهم حاول يقنعني إني أغير زيت الجير لأنه محروق وأنا بصراحة بيني وبينكم أنا مش عارف الراجل دا بيتكلم بجد ولا بيشتغلني قولت أفكني منه وأسال برة, وفعلا بعد الإستشار من بعض الأصدقاء قالولي دا وضعه سيء للغاية.

• تاني يوم طلعت على نفس محل قطع الغيار وإشتريت جركن زيت جير تيوتا أوريجينال وفلتر زيت للجير بوكس ورجعت على نفس الورشة الي ركبتلي القواعد وقولتله غيرلي الزيت والفتر وهاو لما رفع العربية وفك الكارتيرة بتاعت الزيت عايز اقولكم إني الزيت أولا محلول خاااالص أقرب للمية وغير لونة الإسود القاتم وفيه حاجات زي برادة الحديد الرفيعة كدة المهم غيرته وكله تماما التمام الراجل ماسبقشي معايا بإتفاق لاأول لأني خلاص كدة أنا بقيت زبونه فا أنا كمان قولتله أنا مش هديلك فلوس دلوقتي لما أبقى أخلص شغل نبقى نتحاسب وخدت العربية وقولتله هجيلك في ظرف يوم يومين نكمل شغل.

كدة الحمد لله كله إتغير وكله جديد ماجيبتش حتة واحدة حتى إستيراد والدنيا هديت وإتظبطت كدة بس المشكلة إني فيه صوت جوا الكبوت مش عاجبني أنا كنت فاكره بسبب الرجة بس للاسف بعد العربية ما ثبتت الصوت موجود ومش عارف أحدده المهم بالصدفة كدة قولت أملى مية القربة بتاعت المساحات والماتور كان داير لاحظت إني سير الكاتينة فيه بينه خلوص كبير من احد الجانبين وبين حرف الترس الي هوا راكب عليه بتاع الماتور وإنه بيتحرك حركة نسبية ولاكنها متوافقة مع ترنيمة الصوت الي بسمعه, دا أنا حتى قفلت الكاست وكان هاين عليا أسكت الشارع كمان لأني فرحت قوي إني قفشت السبب, بطلت الماتور وبصيت على السير ألاقيه متفت ومحروفه منسلة وفيه حتت منه إتمسحت خالص حاجة كدة توجع القلب.

• طبعا كالعادة ماكدبتش خبر وتاني يوم طلعت على محل قطع الغيار وإشتريت السير وطلعت على نفس الراجل تاني قال يإيه هوا أنا وحشتك, الممهم قولتله أنا عايز أغير سير الكاتينة وأنا واقف كدة جه في دماغي البوجيهات فاقولتله فكلي بوجيه أبص عليه لو سمحت وإذا بالمنظر المهول البوجيه فعلا مصدييييييييييييي أنا إتصدمت بصراحة بس بردو فرحت لما لقيته ناشف خالص ومترب تراب جااااف وماعليهوش أي عرق زيت.
• طبعا كالعادة ماكدبتش خبر وطلعت على محل قطع الغيار وإشتريت أربعة بوجيه زي الي كان راكب بالظبط مع إني الراجل عرض عليا أنواع كويسة وأحلى ولاكني مش من هواة تغيير القطع الأصلية.

الحمد لله غيرت سير الكاتينة والبوجيهات وقفلت حسابي مع الورشة بس الحمد لله أنا حسيت إني خدت بتاري من السكعة الأولانية بتاعت قواعد المكنة.
كدة الحمد لله وأخيرا حسيت إني فعلا رجعت الماتور تاني زي ماكان 1800 ياعني وحاسس بيهم الحمد لله.
بس للأسف لسة بسمع الصفارة المستفذة.

• وبردو كالعادة ماكدبتش خبر وطلعت على ورشة تانية المهم فكيت الفردتين الي قدام لقيت التيل مش خلصان لأ دا ناقص يقفش على الطنبورة بالبريك نفسه مش التيل, طبعا حاجة تحزن لأني الطنبورة إتخربشة وبقى فيها شوية ريجة كدة مش عجبتني, قومت ماكدبتش خبر بردو كاعادة قومت قايل للواد إعمل اللازم فك الطنبورتين ووداهم المخرطة يتنعموا وجيبت تيل أوريجينال برضو وغيرت كل حاجة وكله تمام والحمد لله.

الحمد لله أنا خلصت إنتوا مستنيين إيه تاني كفاية كدة انا تعبت من الكتابة وكمان من كتر المصاريف.
ياااااه الموضوع متعب فعلا.
الدروس المستفادة بقى في الآخر بعد الرغي دا كله:
لو عربيتك محتاجة صيانة روح وديها التوكيل وإستلمها صاج سليم لأني الموضوع مش بس إنك هتوفر قرشين لأ إنتا هتتعب مع اللف والدوران وثانيا هترجع تكتب موضوع طوييييييييييييييييييييل قوي على مصر موتورز والناس هتزهق منك.
فا على إيه الطيب أحسن.

[m elbekh]

شكرا على الإفادة والتجربة ومتزعلش من الكتابة او التجربة لان الكل بيستفاد

[محمدازهرى]

[COLOR="Red"]الله ينور
[/COLOكل ده ومش مخليها محتاجه حاجه ههههههههه
R]

[تامر ديزل]

موضوع جميل اوي .. وبعدين الناس تزهق ازاي ؟ كلنا غاويين نصلح عربياتنا بنفسنا ..والله عفارم عليك وشوية شغل ميه ميه ...

[M.TONSY]

حاسس بيك والله فى دوختك ورايح وجاى بس كده افضل لما تبقى شايف وعارف ايه اللى اتعمل فى عاربيتك احسن من اشتغالات التوكيل