تم تجديد الرخصة (بدون فحص) و هذه هى الاجراءات 12/11/2011

[damdam41]

تم الحمد لله تجديد الرخصة لعام قادم من مرور اكتوبر و كانت هذه هى الاجراءات (انا عارف ان الموضوع موجود مواضيع شبيه به لكن قولت يمكن حد يستفيد منه)

1- شراء ورقة بيانات مخالفة المرور (بجنيه) و تملى البيانات

2- الذهاب الى الارشيف لاستخراج ملف العربية

3- الذهاب للمراجع لختم ورقة البيانات بختمه الخاص

4- الذهاب لرئيس الوحدة لختم الورقة بختم النسر

5- اخذ الورقة و معها الرخصة و صورة البطاقة ( لمالك العربية ) و الذهاب لنيابة المخالفات و بعد الكشف على المخالفات لو مافيش مخالفات بتدفع عشرة جنيه و تاخد الرخصة و ورقة البيانات تانى و معها ورقة تفيد بعدم وجود المخالفات اما لو فيه مخالفات فبتروح تدفعها فى الخزنة الاول

6- تروح بعد كده على شباك دفع الضريبة (الرسوم) و كانت 236 لعربيتى 1500 - تاخد ورقة الضريبة و تروح للخزينة تدفعها و تاخد ايصال الدفع و تجيب منه نموذج بعشرة جنيه

7- تروح على التامين و تشوف اى شركة تامين و تدفع التامين الاجبارى و كان ادامى مصر للتامين و بيت التامين المصرى دفعتها و كانت 108

8- تاخد كل الورق ده و ترجع على شباك اللى خدت منه رسوم الضريبة و تعطيه للراجل اللى بيشوفه و يتاكد من كل حاجة و يبعته للمراجع اللى بينده على اسمك و يعطيك ورقتين تاخدهم و تروح للكمبيوتر و تديهمله و تستنى رخصتك

اهم الملاحظات :
- الموضوع كله بيخلص فى ساعتين زمن لو الدنيا خفيفة و اكتوبر الحمد لله اخف مرور من حيث الزحام لكن هو ممكن ياخد يومين يوم لحد لما تاخد المخالفات و يوم تكمل باقى الاجراءات
- لو الموضوع هايخد يومين يبقى فى تانى يوم لما تخلص الورق كله و ترجع تانى على شباك تحديد الرسوم ابقى الاول ارجع للارشيف تانى يطلعلك ملف العربية تانى علشان بيحتجوه
- عربيتى موديل 99 سعة 1500 ضريبة 236 و تامين 108 لمدة عام
- لو انت مش صاحب العربية يبقى تاخد معاك صورة بطاقة صاحب العربية و الافضل بطاقته كمان تكون معاك

[محمد فيصل]

مبروك التجديد
مبروك خروجك من المرور سالماً

[ahmed-yousri]

صورة بطاقة صاحب العربية!!!!
الله يطمنك.
دانا معايا 4 توكيلات ل4 اشخاص من صاحب الرخصة لحد اسمى
انا بردو مرور اكتوبر..
طب ما اتعرفتش على حد ( ينجز )
وسؤال فنى :
الرخصة بإسم المالك الاول ( قبل 4 بعده ) تنتهى 7 2012 والفحص بعدها بسنه
اولاد الحلال نصحونى ما انقلش ملكية الا بعد انتهاء الرخصة عشان نقل الملكية فيه انهاء للرخصة واعادة فحص..ايه رأيك فى الكلام ده!!!!!!!!!!!!
واكون شاكر ليك ولكل اللى يفيدونى

[walidelmorsi]

اسوء يوم فى حياتى يوم المرور ياةةةةةةةةةةةةةةةة

: 070104~242::0 70104~242:

[basosi]

المشاركة الأصلية كتبت بواسطة walidelmorsi اسوء يوم فى حياتى يوم المرور ياةةةةةةةةةةةةةةةة : 070104~242::0 70104~242:

وبعد يوم المرور ده لو جالك بيعه بسعر كويس مش حتبيع او حتفكر 10 مرات في يوم المرور ده وحتقول لا يا عم لسة ح طلع شهادة مخالفات للي حابيعله واتعذب لأ مش بايع