أساسيات القيادة الرياضية .

[Injection]

من أحلى الحاجات اللى أنا شايفها فى مصر, أنك تقدر تعمل تقريبا اللى أنت عاوزه, فى الشارع مثلا تقدر تأمرك وناخد غرز وتكسر يمين وشمال من غير ماحد يكلمك (شتيمة بس) أنما بره هتتسحب على السجن وموال كبير.

الموضوع ده أنا حاولت أجمع فيه شوية معلومات عن القيادة الرياضية والأستعراضية, وهحاول أتكلم عن كل حاجة على قد ماقدر علشان الموضوع مايبقاش ممل.

1- النقل الصحيح: كتير من الناس اللى بتسوق ماتعرفش يعنى أيه عزم ويعنى أيه هورس باور, والأهم متعرفش الموتور بيطلع أكبر عزم ليه أمتى وأكبر هورس باور ليه أمتى, يعنى مثلا موتور اللانوس بيطلع أكبر عزم عند 3400, يعنى علشان تحصل على أفضل تسارع تنقل أول عند 3400 وتانى عند 3400 وبعد كده أنت محتاج هورس باور, واللانوس بتطلع أقصى باور عند 5800, يعنى تنقل التالت بين 3400 و5800 والرابع عند 5800 وهكذا, وده هيديك أكبر أستفادة من قوة الموتور فى التسارع.

2- النقل الرياضى أو (double clutching): كلنا عارفين أن الموتور بيطلع عدد لفات معين حسب النقلة اللى أنت عليها, والعجل بيلف بسرعة معينة هى سرعة الموتور لما تبقى ماشى على سرعة ثابتة, ولما مثلا تبقى على التالت وتنزل للتانى مرة واحدة وترفع رجلك من على الدبرياج من غير متدوس بنزين بتلاقى العربية بطئت مرة واحدة, ده لأن العجل بيلف بسرعة أكبر من الموتور ولما بتسيب دبرياج على التانى (من غير كلام كتير) الموتور بيبطأ العجل وده بيسموه engine braking وبتستعمله فى حالة عدم وجود فرامل.

وأدى فيديو (متفرجتش عليه علشان النت بطييييييئ)

http://www.youtube.com/watch?v=pI3cH...eature=related

المهم, علشان تنقل نقلة صح من غير متخسر وقت فى التسارع وقوة من الموتور, لازم توفق بين عدد لفات الموتور والعجل, يعنى لنفترض أنك هتنقل من التانى للتالت ومدوستش بنزين كفاية, العربية هتبرجل شوية وتستعبط وبعد كده تمشى عادى, النقل الرياضى بقى بتدوس دبراج وترفع عدد لفات الموتور لعدد مناسب مثلا 4000 وتقوم سايب دبرياج, فالعربية مابتخسرش تسارع وقوة, وفيه طريقة تانية بس أخطر على الفتيس, هتنقل من التانى للتالت, بتمور قبل ماتنقل وتزود بنزين الى عدد لفات مناسب وتقوم داخل على النقلة, وده بيخليك تستفيد من قوة الموتور كاملة.

3- الفرملة بالمحرك (engine braking) : لما بتبقى ماشى بالعربية على سرعة معينة, العجل بيلف بنفس سرعة النقلة اللى أنت عليها, ولما تبقى ماشى على الرابع على 120 وتسقط نقلة للتالت, العربية هتبطأ مرة واحدة ل 80, التفسير طويل, وتلخيصا ليه أنت بتساوى سرعة العجل بسرعة الموتور, اللى بتتباطأ لما بتنزل نقلة.

المهم, ماشى على الرابع على 120 ومعاكش فرامل, تقوم جايب تالت وتشيل رجلك من على الدبرياج بشويش من غير ماتدوس بنزين, ولما العربية تستريح تجيب تانى وتعمل نفس الحكاية, بالتعود ممكن تعمل كل ده فى 10 ثوانى وبدل ماتخبط عربية لاقدر الله على 100 تخبطها على 30, بس الحركة دى خطر على الموتور, ومتتعملش الا لو فى موقف حرج, وأكيد كل واحد فينا عملها لما أدى العربية نقلة أقل بدل من أعلى بالغلط.

4- الدريفتينج: الدريفتينج ينحصر فى جملة واحدة "فقدان التوازن", أنت بتعمل دريفتاية بأنك بتخلى العربية تفقد توازنها وثباتها, أما عن طريق شد الهاند على سرعة عالية أو تحود يمين وتستنى العربية لما تحود شوية وتقوم حاود شمال جامد وفيه طرق تانية كتير,كده أنت بدأت الدريفت, وأى طفل فى حضانة يعرف يبدأ دريفت, المهم يقدر يحافظ على الدريفت أد أيه, واللى أحنا بنعمله ده مش دريفتات, ده شد الهاند ودوس بنزين.



ده فيديو جامد موت لتعليم الدريفتينج بعربية أمامية الدفع, وبصراحة ده تقريبا أشد فيديو تعليمى عن العربيات هتشوفه فى حياتك, شوف وأدعيلى

http://www.youtube.com/watch?v=daQNu...eature=related

5- الغرز: الى كل مكن الخياطة اللى فى الشارع, الغرز مش غباء وغشامة, وخش فى خرم الدبوس اللى هناك ده, الغرز فن ولعب وهندسة, الغرزة الصح هى اللى تاخدها من غير متضر حد تانى, وتاخدها وأنت مطمن وكاشف الطريق قدامك, وتحس بجمال الغرزة وبالعربية وهى بتتحرك بكل رشاقة, وتبقى عارف أمكانياتك وقدراتك أيه, علشان متضرش نفسك أو تضر غيرك

للى مايعرفش الغرز, فالغرز هى أنك تدخل من فتحة بين عربيتين بغرض الطلوع من الزحمة, حاجة شبيهة بحرف s أو أحيانا حرف .c

6- السرعة: برضه الى كل المجانين اللى زيى, متجريش فى شارع ميستحملش سرعة, أنسب شوارع للجرى هى اللى مافيهاش فتحات ولا ناس وفيها 3 أو 4 حارات, وصدقنى هتزعل أوى لما تبقى بتجرى وتلاقى واحد ربنا يهديه قام خارج من شارع جانبى مرة واحدة وعربياتكوا تحضن بعض وحصلت معايا وواحد كان بيلف قام فى ثانية واخد شارع 3 حارات بالعرض (عرض عربيته) وربنا ستر.

7- متخليش حد يسخنك أبدا حتى لو كنت راكب فيرارى, أشتغل نفسك بنفسك وبلاش تلعب مع حد, والجرى مع ناس بينتهى غالبا بعربيتين مينفعوش يتباعوا خردة ولسه شايف حادثة قريب, لو غلبت حد فى الجرى مش هتاخد جايزة, ولا هو لو غلبك هياخد عربية جديدة, أنت بتسوق علشان تستمتع, عايز تجرى مع حد ياريت على طريق سريع وتبقى واثق من قدراتك وقدرات عربيتك وذنبك على جنيك لو حصل حاجة.

8- الأمركة (burn out): أنك تأمرك معناها أنك تطلع طلعة سريعة بالعربية والعجل ميلحقش يمسك فى الأسفلت وتسمع صوت صريخ, وده بيحصل بأنك بتزود بنزين لغاية 4000 لفة مثلا وتقوم شايل رجلك مرة واحدة من على الدبرياج.
الطريقة التانية فى عربيات الدفع الأمامى, شد الهاند بريك وأعمل نفس الخطوات اللى فوق, والعربية هتأمرك وهى فى مكانها ومش هتتحرك.



وياريت تعمل الحاجات دى فى رملة أو ميه علشان الأطارات متبوظش

9- دايما خلى نفسك متعاون مع الناس, لو شفت واحد بيدى أشارة وسعله, لو واحد عايز يلف من قدامك أستناه, أنت متعرفش ظروفه أو هو وراه أيه, وأوعى تزعل من حد علشان كسر عليك أو مشافكش وهو بيلف, أنت متعرفش ظروفه أيه ومراته وشغله مطلعين عينه ولا لأ, وألتمس لأخيك سبعين عذرا, والناس اللى بنتريق عليهم أحنا أساسا منهم.

شوية تحذيرات: ندخل فى الجد بقى, الحاجات اللى فوق دى معظمها أن لم يكن كلها للناس المتمرسين فى السواقة, والحاجات دى تتعمل الأول فى مكتن فاضى علشان التعود والسيطرة وبعد كده ممكن فى الشارع, وأحكم على ظروف الشارع الأول قبل ماتعمل أى حاجة.

وأنا كنت بفضفض وأشارك الحاجات اللى أعرفها معاكوا, واللى عايز يجرب يجرب على مسئوليته الخاصة, أنا جربت على مسئوليتى, وزى ماقلت أوعى تضايق حد مالوش ذنب فى الشارع أبدا.

ومش محتاج أقول أن الدريفتات والأمركة بيبوظوا تقريبا كل حاجة فى العربية, وعربيات مصر بلا أستثناء لا هى معمولة للحاجات دى ولا تنفعلها, وهتلاقى العربية جابت ديسك وأسطوانة وكاوتش أسرع مما تتخيل, ده غير الزوايا اللى الدريفتات هتشهيصها.

وبرضه مش محتاج أقول أن السواقة خبرة مش تعلم, اللى بيسوق من 20 سنة لسه بيتعلم, واللى بيسوق من سنتين برضه بيتعلم, وفى الأخر الأثنين سواقين.

ولو حد عنده حاجة عاوز يزودها يقول, وبكرر تحذيرى الحاجات دى بتتعمل على مسئوليتك واللى أبتكر الدريفتات مالوش ذنب فى أنك وأنت بتلعب خيشت فى عربية واقفة.

والسلام عليكم.

[محمد شهاب]

موضوع فى الجون يا معلم
بس ياريت الناس تتعلم




تحياتى للجميع

[ahmed aveo]

eh el gmal dh ya man dh lsa 7ta ma shoftsh el video ommal lma ashofo

[احمد بدر1978]

تسلم ايدك موضوع رائع

[ابو جودة]

تسلم ايدك وفى مثل شعبى بيقول سوق على مهلك ترجع سليم لاهلك