كل شئ عن الأسبويلر.

[Injection]

السبويلر أو spoiler بالأنجليزى كلمة جاية من الفعل spoil ومعناه يفسد أو يبوظ, وهى دى وظيفة الأسبويلر, أنه يغير من طريقة مرور الهواء على العربية علشان عامة يديها ثبات أكبر.

طبعا معظمنا أن لم يكن كلنا عارفين أننا مش عايشين فى الفراغ, ومعظمنا برضه يعرف أن الهواء زى المياه بالظبط, وسط بيقاوم حركة أى جسم بيتحرك فيه, وطبعا تقدر تلاحظ ده لما تخرج أيدك من الشباك وأنت ماشى على 100, الهواء "بيزق" أيدك لورا وبيقاوم سرعة تحركها (اللى هى نفس سرعة العربية).

الهواء حوالين العربية بيمر من فوقها ومن أى فتحة فى جسمها, الأسبويلر كل وظيفته أنه يستفيد من مرور الهواء فوق العربية ويحوله من مقاومة بلا هدف الى ثبات زيادة للعربية على السرعات العالية.

الأسبويلر عامة ليه هدفين:-

1-بيزود ثبات العربية, لأن شكله المنحنى بيخلى الهوا يمر من فوقه ويضغط عليه, وبالتالى يضغط على العربية, فبتقرب من الأرض وثباتها يزيد نتيجة للضغط اللى السبويلر عامله.

2-فى العربيات الدفع الخلفى السبويلر لما بيضغط على العربية بيضغط عليها من الخلف, وبما أن العربية دفع خلفى, فده بيزود التصاق الأطارات الخلفية بالأرض وبالتالى بيحسن من سرعة العربية القصوى وأستجابتها للضغط على البنزين.



وأهم حاجة لازم تتقال (أو أهم حاجتين) هى أن الأسبويلر فيه ناس بتقول ماينفعش لعربيات الدفع الأمامى, لأنه زى ماقلنا فى النقطة اللى فوق بيضغط على العجل الخلفى, وده بيخلى العجل الأمامى يرتفع عن الأرض شوية وبالتالى بيقلل من سرعة العربية والقوة الواصلة للعجل.

تانى حاجة الأسبويلر مبيؤديش وظيفته غير على السرعات العالية, يعنى مش هتجيب أسبويلر وتبقى ماشى على 60 وتقول ثبات العربية أتحسن, محاسن الأسبويلر (حلوة محاسن دى) بتظهر عند وفوق 80 لأن مقاومة الهواء لسرعة العربية ساعتها بتكون كافية لأن الأسبويلر يضغط على العربية زى ماقلنا.


حاجة كمان , معظم أن لم يكن كل الأسبويلرات اللى موجودة فى مصر يا بتبوظ أيروديناميكية العربية, يامنظر بس ومبتعملش أى حاجة .

والأسبويلر لو الميل بتاعه زاد عن زاوية معينة, بيقى فرامل هواء بمعنى أنه بيعمل زى أسبويلر البيوجاتى بالظبط (اللى بيميل 90 درجة مع الفرملة علشان يوقف العربية بمقاومة الهواء) وبيبطأ العربية على السرعات العالية ونفس الحكاية لو الميل قليل, بيأثر تأثير بسيط بس غير ظاهر وبيبقى منظر بس زى الأسبويلرات اللى بتتركب على ال128.


ندخل فى الجديد بقى, الأسبويلر نوعين, فيه سبويلر أمامى وأسبويلر خلفى, الأمامى هو الشفة اللى معظم الناس بتركبها عند السمكرية للشكل, بس ده بيعمل مع العجل الأمامى زى الأسبويلر الخلفى بالظبط, وبيزود أيروديناميكية العربية, وبيبقى ليه زاوية ميل برضه, وبتشوف ه كتير فى مقدمة عربية الفورملا وان



على فكرة الأسبويلرات اللى بتنزل مع العربية ليس لها فائدة ومجرد منظر وخلاص ماعدا العربيات الرياضية طبعا زى الأيفو.



والأسبويلر فى مصر سعره بيتراوح من 100 للحاجات الأستيراد بتاعت العربية الأصلية أو أسبويلرات السمكرية وحتى 3000 جنيه حسب الماركة وبلد المنشأ والقدرة على التحكم فى ميل الأسبويلر وطبعا التاجر اللى بتتعامل معاه.

ولزيادة الثبات لأقصى حد, الأسبويلرين الأثنين بيتركبوا مع بعض, علشان ثبات العربية كلها يزيد مش الضغط يبقى على نص أه ونص لأ, وعلشان العجل يلتصق أكثر بالأرض على السرعات العالية.

وأشكال الأسبويلرز كتير, بس كلها بتؤدى نفس الوظيفة مهما الشكل أتغير.

والأيرودينامكس علم كبيييييييير , وده رابط لموضوع الأستاذ سام رام عن الأنسيابية والثبات
http://www.masrmotors.com/vb/showthr...?t=5644&page=1

والى اللقاء فى موضوع ممل أخر

[احمد بدر1978]

تسلم ايدك
جزاك الله خيرا

[Injection]

العفو ياباشا, نورت الموضوع.

والله بجد انتا ملكش حل اتكلمت عن حاجه بحلم اني فعلا اعملها عندي في العربية تسلم ايديك ورجليك يا انجيكشن ويسلام لو تعرف تجيبلنا صور شوية اسبويلرات واسعرها تبقي انتا كدا ليك عندنا كانزايه يا معلم

[Injection]

الله يخليك ياكورسير, عيب البيبسى عليا أنا ده أنت ضيف برضه.

الأسبويلرات أشكالها وأنواعها كتير جدا ومالية الحرفيين هاند ميد أو صينى أو حاجات من النضيف.
وشارع دمشق برده فى تشكيلة أسبويلرات جامدة جدا جدا بس أقل حاجة ب200 ويمكن الأسعار زادت دلوقتى, وهناك بقى هتلاقى اللى أنت عايزه.