حاجه غريبة قوي و تزهق

[samehlila]

بسم الله الرحمن الرحيم
فيه حاجه مزهقاني في المنتدي من فترة بسيطه و هيه ان واحد يعمل موضوع مليان صور و تلاقي واحد بيرد عليه باقتباس و كلمة شكرا يبقي الموضوع 10 او 15 صفحه و تكتشف ان كل الصفحات متكرر فيها نفس الصور و تحتهم كلمة مشكور او شكرا
و الموضوع ده مش في المواضيع بس لا كمان في التوقيعات تلاقي واحد حاطط صورة التوقيع كبيرة خالص و كل ماحد يسأله في الموضوع اللي مشارك بيه يكتب له رد بسيط و تلاقي باقي الصفحه مشغوله بصورة التوقيع
الحكاية دي بتزهق لدرجة اني دلوقت بقيت بفتح اول صفحه في الموضوع و آخر صفحه بس مش كتر الصفحات اللي مافيهاش غير صور التوقيعات
حاجه كمان تلاقي موضوع مهم و واحد مكسل يكتب رد بس عايز مشاركاته تبقي كتير فبيوزع ابتسامات تلاقيه حاطط 20 او 30 ابتسامة نفس الشكل ورا بعض و ياريت يكونوا نت الحجم الكبير ماتعرفش هوه بيتريق علي الموضوع ولا معجب بيه ولا مش بيعرف يستعمل الكيبورد ولا ايه
ياريت المشرفين يلاقوا حل الموضوع ده و يحطوه في قوانين المنتدي
علشان بقت حاجه تغيظ
و الف شكر
م - سامح ليله

[Hisham.Elgazzar]

المشاركة الأصلية كتبت بواسطة samehlila بسم الله الرحمن الرحيم واحد بيرد عليه باقتباس و كلمة شكرا يبقي الموضوع 10 او 15 صفحه و تكتشف ان كل الصفحات متكرر فيها نفس الصور و تحتهم كلمة مشكور او شكرا الحكاية دي بتزهق لدرجة اني دلوقت بقيت بفتح اول صفحه في الموضوع و آخر صفحه بس مش كتر الصفحات اللي مافيهاش غير صور التوقيعات حاجه كمان تلاقي موضوع مهم و واحد مكسل يكتب رد بس عايز مشاركاته تبقي كتير علشان بقت حاجه تغيظ

بسم الله الرحمن الرحيم ، والصلاة والسلام على سيدنا محمد

من زمان اوى الموضوع ده وللأسف الأمثله دى من الناس بتقلل من شعبية المنتدى جدا وبتحسسك ان المحتوى ملوش لازمة
مع العلم ان فيه مشرفين كتير جدا المفروض يقصوا الزيادات والحاجات دى
انا كمان بضم صوتى معاك لكن صدقنى الموضوع مش مجدى لأن كتير اتكلمنا فى الموضوع ده ومفيش استجابة

عمرك ما هتعرف تغير الكون ولا الناس عمرها هتتغير واللى ملاحظه كمان الفترة اللى فاتت ان النفوس بقت زى الزفت وماحدش بيتقبل اى نصيحة من اى حد
عموما انا سياستى اقتبس اللى انا عاوزوا من المشاركة
ومش لازم أساسا أحط توقيع
ولو افترضنا انى عملت توقيع 3 صفحات عشان عندى ورشة ولا محل بقالة يبقى لازم اخود فى الإعتبار الموضوع ده مش كل مشاركة فى نفس الموضوع بتوقيع 3 صفحات واقتباس 30 صفحة
يارب المعلومة تكون وصلت وماحدش ياخدها على سدرو

تقبل تحياتى

[svneleven]

عندكو حق. لكن المنتدي مككن يتصرف و مثلا يمنع التوقيعات الكبيرة أو اللي فيها صور. أنا أعرف التوقيع ده يعني الاسم و ممكن رقم التليفون و الوظيفة و بخط صغير. و المفروض فعلا الناس يا اما تكتب رد مفيد و يعتبر اضافة يا اما ما تكتبش حاجة خالص.

[نبيل عبدالرحمن]

عندكم حق والله ولو بإيدى كنت لغيت التوقيعات الكبيرة اللى ناس بتعملها وهى عبارة عن إعلانات لنشاطاتهم الخاصة ، والدعم الفنى هو اللى بيقدر يعمل كده

[ميدو عمر ايمن]

وكمان اكملك المعلومة علشان نتغاظ كلنا مع بعض اكتر شوية
تلاقي عدد المشاهدات رقم يخضك الف اتنين تلاته وعدد التعليقات 30 او0 4 تعليق يعني يجيلك احباط رسمي متعرفش الي دخل ده مش عاجبه الموضوع ولا مكسل ولا داخل يغيظك وبس ولا ايه متعرفش بالظبط رد يا عم قلي الموضوع وحش اقلك شكرا قلي حلو اقلك شكرا قلي اي حاجة لغاية ما الواحد بيفكر يغني جوه الموضوع " قلي حاجة اي حاجه قول بحبك قول كرهتك "
كفايه كده علشان انا متغاظ جدا من الحكاية دي
شكرا اخواني الاعزاء