هل استخدمت الكوسة علشان تطلع رخصة.؟

[MIDO-SPICY]

يا باشا بانا عايز اقولك ان ربنا هيحاسبنا اشد محاسبه على اننا ظلمنا الكوسه الفتره اللى فاتت دى كلها
لانه بما انه ماكنش فيه حاجه بتطلع او بتخلص فى البلد بدون الكوسه فكان لازم تبقى اغلى من اللحمه نفسها
ولكن بما ان فيه كوسه .. فالكوسه كانت رخيصه
:CH UBBY~36:

[aymangalal]

انا بقى عملت الرخصة (الثالثة المهنية) بلب الكوسة نفسه
المفروض انى هاعملها عشان اغير مهنة (كنت هسافر بمهنة سائق الى السعودية) دفعت 600 ج عشان الاختبار فقط وباقى التكاليف مشيتها رسمى فهمى نظمى ولكانت لفة مقرفة وغايه فى الارهاق
من مرور اكتوبر ...للتأمينات..... للنقابة..... لمرور بين السرايات..... للكشف الطبى بلمستشفى اللى الجيزة لـ.... لـ......
ويا سلام لو روحت ع الامتحان والظابط اللى بيمتحن ماجاش (مش ماجاش كده وخلاص) لأ ماجاش بعد انتظار 5 ساعات من 9 الصبح لـ 2 بعد الظهر وحلاوته بقى لوكانت القصة دى فى الصيف
الموضوع ده حصل فى شهر 4/2008
واتكلفت حوالى 2000 (بما فيهم الكوسة ام 600 ج لوحدها ----سامحنا يا رب)
اضطرارا مشيت فى السكة دى لانى ماكنتش ركبت عربية فى حياتى وساعة الاختبار
ركبت عربية نص نقل (دى اللى كانت موجوده ساعتها) ركبت وقولت اجيب الاول (على حسب ما سمعت قبل كده وادوس بنزين سنه سنه واخف دبرياج سنه سنه) سنه سنه مين؟؟؟ بنزين ايه ودبرياج ايه ؟؟؟؟ الفتيس عايز 3 جبابرة عشان يجيبوا الاولانى(وانا ساعتها عُصفُر) ماعرفش حاجه واول مره احط رجلى فى عربية ونص نقل كمان
طبعا مامشيتش 1سم وبطلت وانا واقف قالى انزل وروح
بعدها بيومين روحت اتصورت واخدت الرخصة
وسلم لى على غيط الكوسه
بالمناسبة الرخصة حاليا (المهنية) انتهت شهر 4/2011 لانها كل 3 سنين وماشى بيها برضه
وعايز اعمل الخاصة بس بدون كوسة لانى الحمد لله اتعلمت السواقة
لكن خايف يحصل اى حاجه كده ولا كده ويسقطونى(رهبة الامتحان بقى) ويقولولى تعالى بعد شهر
عايز حد يشجعنى

[young..pharaoh]

20 جنيه و أمين الشرطه هو اللي ساق و نجحت

بس الظابط رخم و طلعهالي بنضارة بالعافية

[emadnd]

اخدت رخصتي قانوني والحمد لله بعد 3 مرات سقوط مرة اشارات ومرتين قيادة
مرور عبود

[fineart607]

انا للأسف طلعتها كوسه كانت لازم صنية كبيره ولزوجتى نفس الحوار
اخوها راح من غير كوسة مش طلعها يبقى لازم صنيه كوسة باللحمة المفرومة


طبعا للأسف