أساسيات قيادة البايك.

[Injection]

مين فينا مكانش نفسه يجيب موتوسيكل فى مرحلة من حياته, وكان نفسه ياخد البايك وينطلق بيه لوحده من غير ما حد يقدر يجيبه.
وبمناسبة أفتتاح المنتدى الجديد, ده فيديو مهم جدا للى عايز يتعلم قيادة البايك على السريع, ولو بتسوق مانيوال كويس وبتعرف تركب عجل يبقى نص ساعة على أى بايك وهتقدر تمشى بيها عادى.
وده الفيديو

http://www.youtube.com/watch?v=CdySkge4aKM&feature=fvw

وده شرح مبدئى للى مفهمش من الفيديو:-

بداية, الموتوسيكل زى العربية بالظبط, فيه دبرياج وفرامل قدام وورا ونقلات.

الموتوسيكل الفتيس بتاعه غير فتيس العربية, فتيس الموتوسيكل أسمه الفتيس التتابعى, لأنه لازم علشان تطلع للرابع تمر بالأول والتانى والتالت, على عكس العربية اللى ممكن تنط فيها من الأول للرابع على طول, ونفس الحكاية مع النقل لتحت, لازم تمر بالتالت والتانى ثم أول وعلشان كده أسمه تتابعى.

طبعا عارفين أن العربية فيها فرامل ورا وقدام بتشتغل بالضغط على دواسة الفرامل, الموتوسيكل فيه فرامل ورا وقدام برضه, لاكن لكل واحدة دواسة أو مقبض لوحدها.

يعنى الفرامل الأمامية ليها المقبض اليمين فى جادون الموتوسيكل, والخلفية ليها دواسة تحت رجل الراكب اليمين.

فى العربية لما بتنقل بتستخدم عصاية الفتيس, فى الموتوسيكل بتستخدم دواسة تحت رجل الراكب الشمال, دى هى عصاية فتيس الموتوسيكل, وفى أغلب الموتوسيكات النقلات كالتالى: لتحت أول ولفوق مور ولفوق تانى ثم تالت ثم رابع وهكذا وأنت طالع.
يعنى الأول بتدوس على الدواسة لتحت, المور فوق الأول ثم باقى النقلات.

وبما أن ده نظام مانيوال, فلازم مقبض دبرياج بتنقل بيه, وده هو المقبض الشمال فى الجادون.

أما دواسة البنزين فهى "بكرة البنزين" الموجودة بالجادون اللى بتلف وكلنا تقريبا عارفنها ومكانها على اليمين , وبيستخدم زى دواسة البنزين بالضبط, بتلفه لقدام بيدى بنزين, وبس.


دى الأساسيات, والموتوسيكل زى العربية بالظبط, نسبة بين الدبرياج والبنزين مع أختلاف طريقة النقل.

ملخص:-


1-فرامل أمامية: المقبض اللى على يمين الجادون.


2-فرامل خلفية: الدواسة الموجودة تحت رجل السائق اليمين.

3-دبرياج: وهو المقبض الموجود على شمال الجادون.

4-بنزين: وهى بكرة البنزين الموجودة على يمين الجادون تحت المقبض الخاص بالفرملة.

وأفتكر دايما أن سواقة الموتوسيكل زى العربية بتكتسب بالخبرة مش كلمة "بعرف أسوق" وخلاص, وتوقع خطأ الغير دايما علشان تتفادى الحوادث

[Jack Box]

الله ينور ياباشا موضوع رائع جدااااااااااااا ومجهود جامد
وبالنسبه لمقبض البنزين اسمها ِAccelerator Roller او بكرة البنزين

[Injection]

العفو ياجاك باشا, أنا قاعد أفتكر فى أسمها مش فاكر, هصححها فى الموضوع.

[issoPolo]

موضوع جااااااااااااامد
و مبروك على القسم الجديد

[Injection]

الله يخليك يا أسلام باشا, بعون الله القسم هيتملى مواضيع, بس من بكره علشان أنا بكتب بالماوس لأن الكيبورد معليهاش حروف عربى.