تأكيدا على اسعار الجاك بى كلاس

[odaoda]

ونصيحة من اخوك الصغير يا استاذ احمد متساعدهمش فالى هما بيعملوة وتجيب جاك كبر دماغك منهم وهات عربية تانية حتى لو الجاك احسن لكن بالسياسة دى التوكيل فعلا بيستعبطططططططططط
وتحياتى ليك ولجميع رواد المنتدى وبعتذر عن عدم المشاركة باستمرار لظروف خاصة

[ahmedchina]

شكرا على النصيحة يا صديقى odaoda و يارب يكون المانع خير
فعلاً انا صرفت نظر و حتى العائلة بعد ما خالص جهزت الفلوس و والواحد قال يجيب جاك اوتوماتيك سهلة فى السواقة للاسرة فى الزحمة دى و بسعر مميز و ماتور متسوبيشى
شكلى كدى هاجيب لوجان إية رايك

[mms]

سيحان الله فى هذا الوكيل . هونايم والله ايه . وازاى يبص لوكلاء تانيين زى الهونداى وغيره . اش جاب لجاب . !!!! . الهيونداى اول مانزلت السوق كان سعرها منخفض بشكل جذاب للغايه . الى ان صنعت اسم اصبح سعرها عادى لهو غالى ولا هو واطى . يقوم وكيل جاك اللى مبقلوش سنه ونص قاعد يرفع فى السعر كان مفيش غيره . هو فاكر ان الناس مجانين علشان يسيبو البى واى دى اللى بسبعين الف ويشتروا الa class ب 69000 . انا لو من المجلس العسكرى كنت احبس اى واحد يعمل كده لانه بلا شك سفيه لا يحسن التصرف فى ماله ......... الان انا بقوه مع الحمله المباركه . خليها تصدى ومودلها يعدى . ولما سعرها يهدى ساعتها نقعد وناخد وندى . لا ن بصراحه . حسبى الله ونعم الوكيل فى هذا الوكيل .

[د.كمال]

الأخوه الأعزاء .....رمضان كريم عليكم ....وأنا سعيد جدا بإنضمام أخ فاضل لنا وهو الأستاذ أحمد شينا .
بالنسبه لسعر الجاك هو 84 الف ومحدش باعها بأرخص من كده لاموزع ولا غيره .
وكيل الجاك جشع طبعا أنا معاكم .....لكن هل باقى الوكلاء مش جشعين
يعنى لما ال byd الفول اوبشن توصل 71 الف دا مش جشع
والرينو اللوجان توصل 71 الف دا مش جشع والمفروض بدون جمارك .
وال m11 أغلا من كده دا مش جشع بالرغم من التقفيل المصرى .
والناس إللى بتقارن الجاك b15 ب الbyd وال لوجان والm11 ....معلش يعنى مفيش وجه للمقارنه .....وهثبت ذلك بالتجربه
ال byd مع واحد صاحبى معايا فى الشغل وهو إشتراها بعد مأنا إشتريت الجاك ب شهرين ....(السياره لاأختلف إن أدائها تمام ) لكن تعالى شوف التقفيل المصرى ...فروق فى الشنطه (على رأى صاحبها بتدخل فيران )
الدوكو فى الاكصدم الامامى والخلفى قشر .....فروق فى الببان....مشعايز أتكلم عن الخامات الرديئه .
اللوجان مع اصدقائى أيضا ....التقفيل مغربى لكن جيد جدا ....لكن عربيه من الماضى ...يعنى تشيل 3 مفاتيح للعربيه وللتنك وللشنطه ....زراير الزجاج فى التابلوه والكلاكس فى دراع الاشاره ....وساده هوائيه واحده للسائق .....بدون إنزار .....سخونه فى الدواسات بسبب دواير التكييف ....أعلا صوت ماتور فى عربيه ..مشعايز أتكلم عن أسعار قطع الغيار ولا الصيانه .....التوكيل انا إتعاملت معاه قبل كده مع عربيتى الرينو اوبتيما (من أسوأ التوكيلات فى مصر ) يعنى لو عربيتك فيها عطل لازم تتصل بيهم الاول ويحددوا لك معاد تروح فيه ......يعنى تركن عربيتك إسبوع أو إتنين وممكن شهر على ماييجى الدور عليك وتروح وتركن العربيه عندهم ولما يخلصوها يتصلوا بيك ........هو ده النظام لو عاجبك ....يعنى بيعلمونا الادب .
ال m11 شكلها حلو ....لكن برده تعالى شوف عيوب التقفيل المصرى ....واحد جارى فى ال6شهور الاولى لشرائها غير مارش ودينامو ومكن زجاج وحساس بنزين وأدخل على قسم الm11 وشوف المشاكل .....الجاك كماليات اكتر من الm11 وخامات افضل بكتير .......اير باج ...abs ebd حساس ركن وغيره .
من وجهه نظرى لو هدفع فلوس أكتر وأشترى عربيه تقفيل بلدها وخاليه من العيوب ذى الجاك أنا الكسبان ...وكل واحد فينا معاه العربيه بقاله سنه وأكتر لو ظهر من العربيه عيب ذى العربيات التانيه يقول ويغلطنى .
وهى الهيونداى rb لماتنزل ب102 الف وبدون كماليات ووسائل امان ذى ال إير باج وال abs , ebd يبقى وكيلها كويس ولا جشع .
عايز أقول إن وكيل جاك ذيه ذى كل الوكلاء الجشعين فى مصر ....لكن هما بيزيدوا عنه فى وسائل الدعايه والتوسع فى مراكز الخدمه إنما الجشع والطمع واحد
وأنا متأكد تماما لو الجاك مع واحد جشع تانى كانت هتنتشر أكتر
عايز أقول للناس بتوع خليها تصدى .....يعنى بقالنا سنتين بنسمع الكلام ده لاشفنا وكيل قفل ولا سوق العربيات وقف ولا العربيات رخصت ولا الناس بطلت تشترى ؟؟؟؟؟؟؟؟................ر مضان كريم عليكم

[odaoda]

دكتور كمال انا فاهم وجة نظرك لكن السعر المناسب للعربية عشان تسوق 80 الف ويجيبوا كمية بكيرة ويدوا للموزعين ويغرقوا السوق وشوف الشغل
لكن بالمنظر دة العربية مش هتنتشر وقطع الغيار هيحتكرها التوكيل وهنحتار للو التوكيل لقدر الله قفل يمكن احنا نقفل عربياتنا وتتركن
انا لما بنصح استاذ احمد انة ميجيبش العربية مش لانها وحشة بالعكس طبعا دى تحفة وعلى ايدى انا مجرب مش بكلم عن سفة
لكن من اجل السعر العربية غالية حبتين رغم انها اوتاماتيك
ولو انى كنت ممكن اراجع نفسى واجيب الجاك فى الاخر
المهم يا استاذ احمد لو عاوز تجيب اوتامتيك كان نفسى انصحك بقدر معزتى ليك لكن تجاربى ملخصة فى الافيو وكانت مانيوال وعربيات اخرى قديمة مش جديدة
بالنسبة للاوتوماتيك افضل الجيتز اوتوماتيك او الفيات بونتو او الدايهاتسو سريون الموتور الصغير واعتقد التلاتة كويسين
ورمضان كريم عليك يا استاذ احمد ويا دكتورى العزيز كمااااااال