لو سمحت ؟؟؟؟ إركن فى مكان تانى

[momen_bondok]

طبعا العنوان مثير للدهشة وانا قاصد ذلك لمشاهدة الموضوع

الواحد بجد على آخرة من موضوع ركن العربية دة

كل ما تيجى تركن في مكان واحد يقول لك معلش يابية علشان المحل بس طب أنا مالي ومال المحل ؟؟؟؟

واحد تانى تيجى تركن في مكان والله ولا أمام محل ولا حاجة يجى يقولك معلش يابية فية عربية جاية دلوقتى ؟ طب أنا مالي أنا جيت لقيت المكان فاضي ؟؟؟؟؟

واللى حصل معايا قبل اذان العشاء مباشرة جيت اركن فى شارع فية ميكانيكى والمهم انى بركن بعيد عنة خالص دة على الصف التانى فلقيت الاسطى بلية جاى بيقولى فية عربية جاية هنا طب انا مالى انا جيت لقيت المكان فاضى ما اصل الاسطى طلع يجرب العربية وجاى على طول طب بردو انا مالى انا جيت لقيت المكان فاضى فقال لى براحتك طبعا ولا سئلت فية واغلقت العربية وطلعت البيت

الموضوع دة اكيد بيحصل معانا كتير وفية منا اللى بيصمم وبيركن وفي اللى بيخاف على عربيتة من الميكانيكى ولا حتى اى صاحب محل وبيشوف حتة تانية

انا راكن وعارف انة ممكن يعمل حاجة فى العربية بس ولا يهمنى المهم حقى ما يضعش بايدى وربنا معايا بعد كدة

انا عرفت اللى بيحط طوب او اى شىء مكان العربية علشان محدش يركن (الموضوع دة حرام فى الشريعة الاسلامية حتى لو كان تحت بيتك) لان انت نهاية بيتك هو خط التنظيم اللى الدولة بتحددة عند بناء العمارة لانك بعد كدة بتاخذ من حق المسلمين

انت بتعمل اية لما يقابلك موقف زى دة ؟؟ قول بصراحة

[HaMaDa-ToUBaR]

بصراحة دى بقت حاجة تقرف فعلا وبتكرة الواحد فى نفسة

بس انا عن نفسى قبل ما بركن فى اى مكان بنزل استأذن من صاحب المحل الاول بالادب والذوق وبكلمتين حلوين ونادر بصراحة لما حد اعترض ... يعنى بمعنى تانى احرجهم بدل ما هما يحرجوك

بس الاصعب من دة كلة والى انتشر بطريقة غريبة فعلا ... مافيا الجراجات كل ما تيجى تركن فى اى مكان فى الشارع تلاقى واحد طالعلك زى ال........ وعاوز 10 جنية عافية وطبعا لو مدتلوش حاجة هتلاقى عربية متنفضة من العلامات ومتشوة من اولها لاخرها

دة انا مرة وقفت العربية عند جامعة القاهرة والله بالضبط 10 دقايق ودة عاوز 10 جنية ويانى لو فكرت بقى تقولة لية ياعم 10 جنية ولا اديتة اقل ولا حاجة

قلة ادب بقى من هنا وتلقيح كلام من هنا للصبح بجد انا لما بيجى القاهرة بيتحرق دمى وبحمد ربنا انى مش ساكن هناك وقالى كان زمانى عملت مصيبة

بردة الواحد لما يكون فى بلدة واغلب الناس عارفاة بتبقى عزوة وحاجة حلوة مش كل مكان اروحة الاقى نفسى مقطوع من شجرة

[تامر ديزل]

اللي حضرتك عملته هوا الصح لان الناس بقت حاجه صعبه جدا
عن نفسي المشكله دي مش بتواجهني كتير ف دمياط الا في دمياط القديمه لان شوارعها زحمه وضيقه ومليانه عربيات لكن لما بيحصل بعمل زي حضرتك بالظبط ولابسال في اي محل او عربيه جايه ... بس دي مش فتونه يعني ... دي من الزهق لاني لو طاوعتهم كلهم هفضل الف بالعربيه ساعات لحد ما مكان يفضى وتصدف انه ميكونش ليه واحد حاجزه

[AMMI]

الموقف ده بيواجهنى كتير لدرجة ان واحد من الجيران جه يقولى انت راكن مكانى فقولتله انا جيت لقيت المكان فاضى مش معقوله اسيبه واروح اركن بعيد ( طبعا بعد ما اديته اللى فيه النصيب ) علشان مبحبش ان اللى بيهرتل مع العلم لو حصل وسيبته بتيجى عربيات غريبه عن الشارع وبتركن عادى. وده خلانى اتريق علطول على اى حد يتكلم على ان الناس لبعضها وجدعنة ولاد البلد والكلام الفاضى ده.
الحل ان المفروض بعد الثوره ما حصلا تحصل ثوره فى فكر الناس. والناس تحترم بعضها ويعرفوا ان ده ضد الدين والقانون. والحل الأخر ان يتم نقل جميع الورش خارج الكتله السكنيه وليكن عن طريق تخصيص شارعين بهم محلات وتكون كل منطقه بها مكان خاص للورش مثل الحرفيين. وذلك لأن عدم وجود ركنات من ضمن اسبابه وجود الورش والتى تحجز اماكن لعربيتين وتلاته وتفضل فاتحه لفترات متأخره من الليل حتى لو لم يوجد شغل عندهم ( عاملانها قهوه )

[momen_bondok]

المشاركة الأصلية كتبت بواسطة HaMaDa-ToUBaR بصراحة دى بقت حاجة تقرف فعلا وبتكرة الواحد فى نفسة بس انا عن نفسى قبل ما بركن فى اى مكان بنزل استأذن من صاحب المحل الاول بالادب والذوق وبكلمتين حلوين ونادر بصراحة لما حد اعترض ... يعنى بمعنى تانى احرجهم بدل ما هما يحرجوك هى فعلا طريقة كويسة انك تستاذن بس ازاى استاذن واحد فى حاجة مش من حقة اصلا بعد كدة كل ما تيجى تركن لازم تستئذنة وإلا يقول لك اى حاجة والسبب هو حضرتك خاصة انك اللى اديتة الفرصة دة بس الاصعب من دة كلة والى انتشر بطريقة غريبة فعلا ... مافيا الجراجات كل ما تيجى تركن فى اى مكان فى الشارع تلاقى واحد طالعلك زى ال........ وعاوز 10 جنية عافية وطبعا لو مدتلوش حاجة هتلاقى عربية متنفضة من العلامات ومتشوة من اولها لاخرها دة انا مرة وقفت العربية عند جامعة القاهرة والله بالضبط 10 دقايق ودة عاوز 10 جنية ويانى لو فكرت بقى تقولة لية ياعم 10 جنية ولا اديتة اقل ولا حاجة قلة ادب بقى من هنا وتلقيح كلام من هنا للصبح بجد انا لما بيجى القاهرة بيتحرق دمى وبحمد ربنا انى مش ساكن هناك وقالى كان زمانى عملت مصيبة بردة الواحد لما يكون فى بلدة واغلب الناس عارفاة بتبقى عزوة وحاجة حلوة مش كل مكان اروحة الاقى نفسى مقطوع من شجرة جزاك الله خيرا على المشاركة وانا سعيد بردك حضرتك

الرد فى الاقتباس