تجاربنا مع الصيانة و قطع الغيار

[xabi]

المشاركة الأصلية كتبت بواسطة mrastra يا اخى امسك الخشب انت داخل فى 14 كيلو لللتر الواحد كويس بس ما تقلش لحد لحسن تتحسد

كلام فى سرك بقى...اوعى حد من المنتدى يعرف..ههههه

[مهند سالم]

أنا كان عندي مشكلة ضخمة في استهلاك البنزين، العربية بتاكل بنزين بغرابة وخصوصا داخل البلد، بدأت أفكر في حل للمشكلة:
أولا رحت لمركز كاربيراتير محترم في مدينة قباء، نظف الرادياتير وركب جوان رش جديد، وأخذ 95 جنيه، وقالي العربية كدة تمام.
مشيت بيها لقيتها زي الزفت زي ما هي.
قلت قبل ما أروح أتخانق معاهم أروح للميكانيكي يشيك على دورة البنزين يمكن في حاجة بتسرب.
أول ما رحت للميكانيكي لقيت التانك مخروم، طبعا فكينا التانك ونزلنا البنزين في جراكن، وأخذت التانك عشان ألحمه أزير عند بتاع الرادياتير (طبعا الميكانيكي قالي ما ينفعش يتلحم لمبة، عشان ممكن ينفجر)، و دفعت عند بتاع الرادياتير 5جنيه، أنا بصراحة قلت له خمسة، وبعدين اديته سبعة، قال لي: خمسة كويس.
وبعدين رحت للميكانيكي قالي هات معجون حدادي، ومعجن مكان الخرم في التانك، وبعدين ركبه وشيك على الوصلات إلي حولين التانك، وأخذ 20 جنيه.
برده الاستهلاك زي ما هو، رحت للميكانيكي تاني وقلت له أنا بأشم ريحة بنزين، شيكنا على الوصلات تاني، لقينا الوصلة إلا مربوطة في فلتر البنزين مفكوكة، ربطناها وغيرنا الفلتر، وقال كدة تمام، وما أخذش فلوس. قالي: هأعمل معاك واجب.
بس برده لسة الاستهلاك عالي.
قلت خلاص أروح للمركز بتاع الكاربيراتير وأتخانق معاهم، وخصوصا إن أنا لي مراجعة ببلاش في خلال اسبوعين.
رحت وقلت للفني الاستهلاك زي ما هو.
حط الجهاز في الشكمان وبدأ يقيس الاستهلاك، لقى حاجة غريبة:
العربية والعمة مقفولة استهلاكها عالي.
ولما يشيل العمة الاستهلاك كويس.
وده أنا شفته بعيني على الجهاز.
من هنا لهنا اكتشفنا إن باب العمة كان مقفول، وبالتالي الكاربيراتي ما بياخدش هوا، فكل الاستهلاك بنزين بس، وده كان بيعمل رائحة عادم ني، نتيجة إن كمية بنزين كثيرة بتخش ومش كلها بيتحرق، والحمد لله الاستهلاك اتظبط ومشيت. وطبعا ما أخذشي حاجة لأنها كانت مراجعة.

[مهند سالم]

أما بالنسبة للعفشة فدي بق ليها معايا صولات وجولات:
أنا أول ما اشتريت العربية كنت ما أعرفش حاجة، وأول حاجة قابلتني إن في خبط في العربية من ورا ، رحت للميكانيكي بص وقالي دي جلب مقصات. رحت للعفشجي قالي المقصات دي لازم تتغير، طبعا طنشته ومشيت لحد لما لقيت الخبط زاد والعربية بدأت تحدف مني.
طبعا زي الشاطر رحت جبت جوزين مقصات تايواني تقريبا كانوا عاملين 280 جنيه ورحت ركبتهم أخذ مني 30 جنيه.
وبعدين طنشت العفشة خالص لحد لما العربية كانت بتغني سنفونيات.
وقررت إني أضبط العفشة، استشرت واحد معرفة بتاع قطع غيار، نصحني والنصيحة لله إني أروح الأول لواحد بتاع ضبط زوايا يكشف ويقول العربية عايزة إيه بالظبط.
ورحت فعلا وكشف وكتب لي على كل حاجة في العفشة وأخذ 5 جنيه.
طبعا لقيت العربية فيها جوز مساعدين أمامي، وجلب مقصات أمامي وبيض وعلبة دركسيون، يعني من الآخر العفشة الأمامية كلها جابت آخرها.
اشتريت جوز مساعدين ياباني توكيكو، نصحني بيهم الراجل بتاع قطع الغيار، وأكد إنه أحسن من الكيابا، والحمد لله بالفعل اشتريتهم ب550جنيه، وأثبتوا كفاءة. والاستيراد كان عامل 125- 150 للمساعد الواحد ، بالبطاحات بكله، بس أنا قلت: الجديد جديد.
واشتريت جلب مقصات ياباني ب60جنيه. والتايوان كان ب30 جنيه.
واشتريت علبة دركسيون ياباني ب350 جنيه (على فكرة نفس سعر الاستيراد).
واشتريت بيض خارجي، أعتقد كان ب160 جنيه، أو 120 مش فاكر بالظبط. ياباني طبعا.
والعفشجي اشتغل وأخذ 120 بالعافية، بعد ما كان طالب 150 جنيه.
والحمد لله العربية كانت مظبوطة في المشي، حتى من قبل ما أظبط زوايا.
وبعدين رحت أظبط زوايا عند نفس الراجل إلا كشف عليها قبل العفشجي وأخذ 40جنيه، وحصلت المفاجأة.
بعد ما ظبطت ورا وقدام وخرجت من عنده لقيت العربية ولأول مرة من ساعة ما اشتريتها بتحدف يمين بشدة، طبعا رجعت ليه تاني ، وحاول فيها وبرده بعد ما خرجت لقيتها بتحدف يمين بس مش قوي، طبعا عرفت إنه بطيخة، وقلبته ورحت لمركز ظبط محترم بالكمبيوتر.
المركز ظبطها الحمد لله كويس وأخذ حوالي 110، لأن كان فيها ظبط زراجين.
والحمد لله بقت كويسة.
أما بق مشكلتي لما سير الكاتينة قطع، فدي بق المرة الجاية.

[xabi]

اهم حاجه العربيه تظبط ياباشا وان شاء لله ربنا يعوضك خير فى اللى دفع

[Injection]

ما هو الواحد مابيتعلمش ببلاش يارجالة, لازم يتقرص علشان يعرف.

تم تغيير البطارية ال70 أمبير بواحدة 55 مع دفع 270 جنيه زى الباشا, والتبديل بالبطارية القديمة (عارف أنه أضحك عليا, بس كان بمزاجى علشان كبرت دماغى, ومافيش حد تانى قريب).

ونصيجة لأى حد معاه بطارية سائلة, راجع على المياه كل أسبوعين ولا حاجة علشان البطارية متفضاش, وتشتغل بقدرتها كاملة, ولو ناقصة زود مياه مقطرة.

وتم شراء جركن زيت موبيل سوبر 4 لتر ب 65 جنيه لتزويد الزيت.

والبقية قادمة على الشهر الجاى