تجاربنا مع الصيانة و قطع الغيار

[Injection]

أنا لسه أمبارح لقيت عجلة نايمة, طلع البلف كان بيسرب وعملته ب 2 جنيه, والأستبن كان نايم خالص, رحت جبت شنبر والراجل ركبه, وخد على الشنبر والتركيب والبلف 30 جنيه.

وكنت برضه مغير تيل فرامل والراجل طلب 10 جنيه مصنعية, الحنية نقحت عليا وأديته 15

والبطارية كانت فاضية جبت الراجل يقومها مشى 100 متر وخد منى 10 جنيه

الموضوع مفيد جدا للناس الغلابة (اللى زيى) علشان محدش يخمهم فى المصنعية, ياريت اللى عنده أى خبرة يكتبها, ويوفر على حد فلوس وحرقة الدم بعد ما يكتشف أنه أتخم.

فاكرين العجل اللى أنا لسه عامله, كنت رحت لواحد قبل كده لحم خرم فى عجلة (اللى غيرتلها الشنبر أمبارح) وركبلى شنبر على عجلة تانية, وعارفين خد كام؟ 55 جنيه بس بصراحة أنا كبرت دماغى لأن مزاجى كان كويس وكنت عارف أنى بتخم وقلت كده خلاص هستريح من هم العجل, العجلة الملحومة نامت منى فى الشارع بعديها بيومين ولحقها الأستبن بعديها بأسبوع.

[نبيل عبدالرحمن]

والله الموضوع ده حلو ومفيد فعلاً للناس أعضاء المنتدى

[abo-salama]

الموضوع حلو جدا وايدى على كتفك

[xabi]

منورين الموضوع ياجماعه..انا النهارده روحت علشان اغير تيل الفرامل(انا كنت بينى وبين نفسى ناوى اجيب تيل صينى يمشينى اسبوع ولا حاجه علشان انا نازل بورسعيد ان شاء الله بعد العيد اجيب شويه حاجات للعربيه ومنها طقم تيل اصلى للعربيه بدل اللى متركب) فلفيت علشان القيه وف الاخر لقيت طقم تيل صينى ب125 جنيه .
الصراحه كنت هعيط من السعراللى الراجل بيقوله..يعنى الصينى ب125.امال لو حبيت اجيب واحد المانى او اصلى اعمل ايه..المهم مجبتوش وقلت اجيبه من بورسعيد.
فطبعا كنت فكيت العجله اليمين علشان افك التيل وطبعا لما لقيت سعره كبير اضطريت انى ابدل التيل اللى جوه باللبره..وشديت فرامل اليد لانها كانت سايبه خالص..واديت للصنايعى 10 جنيه.


بعدها روحت للكهربائى علشان يشوفلى الكلاكس..لقيت الكتاوت بايظه غيرتها بواحده يابانى وظبطت الكلاكس وفصلت الكهرباء عن المساحه اللى ورا علشان كنات بتعلق..ودفع مصنعيه للراجل 20 جنيه

[xabi]

النهارده اخيرا روحت بورسعيد..كنت رايح علشان اجيب شويه قطع غيارواظبط العربيه شويه واخليها تنطق..انا اتصدمت صدمه حياتى النهارده من كل حاجه.
انا كنت عامل حسابى انى اروح اشترى شويه فلاتر وسيركاتينه وكمان تيل فرامل وشويه حاجات اساسيه صغيره وبعد كده باقى الفلوس كنت ناوى امنجه نفسى واظبط العربيه كمان.
قلت لما اروح لبتاع العفشه علشان يركبلى تيل الفرامل وبعدين ابقى الف واجيب باقى قطع الغيار..
طبعا فك العجلتين ولقى التيل كتر الف خيره انه فضل شغال لغايه اللحظه دى والحمد لله انه مبوظش الطنبوره..انا اتفاجأت ان العفشه بتاعه العربيه مدمره تماما من من مساعدين وجلب وكمان بيض وصدادات وكمان كرسى من كراسى المكنه وكمان البلى والكوبلن وكل حاجه كانت بتقول ابوس ايديك ارحمنى.. ياريت محدش يسألنى انت كنت ماشى بيها ازاى!!!
حلم حياتى اللى كنت رايح علشان لقيته بيبخر بسرعه وانا عمال بدفع للميكانيكى علشان يجيب حاجات للعربيه...انا فى حاجات كتيره انا جبتها ومعرفش بتاعه ايه ولا جايه ليه..انا هكتبلكوا انا جبت ايه بالظبط والاسعار..وربنا يستر
90 جنيه كرسى للمكنه(استيراد) الجديد ب 400 جنيه
بليه ب 110..الجديده غاليه جدا
2 جلبه اسكتراب 30 جنيه
تيل فرامل90 جنيه(أسبانى)
180 مساعد استيراد(المانى)
علبه شحم 17 جنيه
70 بيضه وصدادتين
بوجيهات 60 جنيه(3 شعله سن تخين يابانى)
250 جنيه جلب كوبلن على مصنعيه مكبس ومخرطه وصنايعيه وكمان شويه حاجات صغيره كده ..
100 جنيه للميكانيكى بالعافيه
25 جنيه دخان للى كان شغال فى العربيه
25 جنيه ظبط زوايا وترصيص..
وكده تمام اوووى للشغل العفشه فضل شويه فكه صغيرين جبت بيهم:
100 فرن
15 كوريك
60جنيه اكره بمفتاح للشنطه اللى ورا..وكويس ان لعربيه كان فيها بنزين يروحنى لانى مكنش معاياولا جنيه فى جيبى وانا مروح.
ملحوظه:انا ممكن اكون بكتب بعض المصطلحات غلط لانى مفمهش اووى فى الحاجات دى..بس كان معايا واحد قريبى كان فاهم كل حاجه وبقى بيفاصل ولولاه كان زكمانى متقلب فى الفين تلاته اقل واجب.

اغلب الحاجات اللى انا جبتها كانت المانى واسعارها نار نار نار ذى ما انتوا شايفين..مفيش الا البوجيهات.


عندى سؤال اخير:انا بعد ما ظبطت زوايا بساعه كده لقيت العربيه فيها حدفه يمين شويه والطاره جايه ناحيه اليمين..تفتكروا دى من ايه..مع العلم ان قبل التظبيط مكنش فيه الحدفه دى.


محدش يقلى دفعت كام فى الليله دى كلها علشان انا كل لما بعد اللى انا دفعته بتعب نفسيا!!!

واسف انى طولت على حضراتكوا