العودة   مصر موتورز مجتمع السيارات > السيارات الكورية والماليزية > Hyundai هيونداى > Hyundai Excel - اكسيل


إضافة رد
 
أدوات الموضوع
  #1  
قديم 19-07-2013, 06:01 AM
الصورة الرمزية sayed2077
sayed2077 sayed2077 غير متواجد حالياً

من انا؟: انا مش فارس ولا فتى احلام انا زحمة وربكه وشغل جنان
التخصص العملى: طالب هندسة قسم اتصالات
هواياتي: الكمبيوتر و السيارات
 
تاريخ التسجيل: Jul 2011
الموقع: القاهرة
المشاركات: 1,405
sayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond repute
مميز التجربه الكامله مع عفشة الاكسيل قطعه قطعه (اقوى مرجع فى عفشة الاكسيل) وشكر خاص لمركز مدحت الباشا لصيانة العفشه

السلام عليكم ورحمة الله وبركاته

طبعا الحمد لله بعد عمل نصف عمرة

روحت عملت الشكمان اللى كان فى الضياع وكان صوته عالى اوووى وعاوز ضرب النار والحمد لله اتعمل وكله تمام الحمد لله حاليا
(الموضوع النهارده بتاع العفشه قووى جدااا وطويل جدااا واللى هيقراه هيعرف حاجات كتير عن عفشة الاكسيل وهيعرف كل مسمار فيها وانا شارحه بابسط ما يمكن ويارب يعجبكم )

نبداء
بسم الله الرحمن الرحيم

فى بداية الموضع الموضوع لازم تعرفوا مكونات عفشة الاكسيل كلها

اولا مكونات العفشة الامامية
1:اتنين مساعد
2:اتنين سوسته
3:اتنين بطاحه
4:بضتين مقص
5:بارتين علبة دركسيون
6:جلبتين مقص حديد
7:جلبتين مقص كاوتش
8:علبة الدركسيون

ثانيا مكونات العفشه الخلفية
1:دنجل (سربنسيه)
2:اتنين مساعد
3:اتنين سوسته

وطبعا زى ما انتم شايفين عفشة الاكسيل محدوده جداااا و اقتصادية درجه اولى بالمقارنة مع اى عربيه تانية ومثال مثلا النوبيرا اللى فيها 700 شداد وكل شداد بجلبتين وياريت الجلب بتعمر بس هبقى اقول لكل بتوع النوبيرا مفاجاءة فى اخر الموضوع بالنسبه للجلب بتاعت النوبيرا

المهم طبعا العفشه كانت عملالى صداع فى دماغى
والعربيه تحس حته اعلى من حته وفى الطريق الداشرى مثلا مع مطبات الهوا الناس اللى قاعده ورا بيحسوا انهم قاعدين فى مراجيح السبتيه هههههههههههه والدنيا كانت ضايعه بصراحه وخبط وترزيع وحاجه وجع دماغ بصراحه
المهم الاسطى احمد حنفى متخصص الكهربا والتكيف اكيد غنى عن التعريف نصحنى بواحد اسمه مدحت الباشا فى منيل شيحه الكلام ده كان من حوالى ثلاث شهور وقالى انت هتروح واسئل فين مدحت الباشا هيقولك اهوه وهتلاقى العربيات واقفه فى الشارع ومنزله عفشتها وكده بس قعد ينبه عليا جامد انى لازم اروح بدرى الساعه 9 لانه بياخد عدد معين وبعد كده خلاص مبيخدش حد تانى وقالى انه اكتر من ممتاز وناس كتير راحوله من المعادى وكله شكر فيه ومصنعيته قليله

المهم نزلت التوفيقية عند ابراهيم البنا
جبت الاتى
1:طقم جلب مقصات امامى كورى ب 80
2:جوز بطاحات مساعدين امامى كورى ب 120
3:بيضتين مقصات ماركة CTR كورى ب 100
4:بارتين دركسيون
ماركة CTR كورى ب 85
5:جوز كبالن تيوانى ماركة MUK ب 240

بعدين جيت سألته على مساعدين خلفى قالى معندوش غير
مساعدين KYB يبانى زيت الجوز ب 250

طبعا انا عارف ان المساعدين الزيت الخلفى مع الاكسيل متنفعش لان الاكسيل مع المساعدين الخلفى الزيت بتتنطط اثناء الجرى خصوصا فى المطبات الهوا فكنت بدور على مساعدين غاز فقالى مفيش

روحت سئلت عند محل بعديه لقيت عنده مساعدين KYB غاز يبانى الجوز ب 400 بس من غير ضمان

فقولت اروح اسئل عند هشام لهيطه موزع معتمد لمساعدين مونرو لقيت عنده المساعدين المونرو الخلفى غاز وصناعتهم بلجيكى الجوز ب 460
ومعاه ضمان لمده سنه المهم جابلى المساعدين لقيتهم صناعه بلجيكى وشكلهم محترم بصراحه فجبتهم وادانى فاتورة ومكتوب فيها ضمان لمدة سنه وقالى حافظ عليها علشان لو المساعدين حصلهم حاجه لا قدر الله تيجى تغيرهم

المهم روحت البيت ونمت وصحيت النهارده 18/7/2013 الصبح الساعه 9.30 ونزلت سخنت العربيه وتوكلت على الله وروحت ماشى كورنيش المعادى وبعدين طلعت دائرى ونزلت نزلة شارع البحر الاعظم ولفيت من اول يوترن اللى عند القرية الفرعونية و خدت الطريق على طوووول فى اتجاه منيل شيحه وفضلت امشى واسئل فين منيل شيحه يقولولى قدام واسئل يقولولى قدام لغاية ما جيت عند واحد سئلته فين منيل شيحه رد عليا بصوت غليظ انت اساسا فى منيل شيحه هههههههههههه فقولتله طيب فين مدحت الباشا بتاع العفشه قالى هتلاقيه قدام على الشمال المهم مشيت بتاع 100 متر لقيت مركز كبير وفوقه يافطه كبيرة جداااا اسمها مدحت الباشا طبعا انا قريتها استغربت على كلام الاسطى احمد كان قايلى هتلاقى العربيات واقفه فى الشارع بس ده مركز كبيرة وحاجه فخيمه بصراحه المهم روحت دخلت لقيت اخر مكان المركز بيشيل حوالى 10 عربيات وكنت انا رقم 10
المهم دخلت لقيت كل عربيه واقف جنبها اسطى وصبى ولقيت جنب كل عربيه مفكات صواميل بتشتغل بضغط الهوا وحاجه فخيمه بجد الله يباركله طبعا كل ده وانا مستغرب لانى حاطط فى دماغى انه معندوش مركز ده شغال فى الشارع المهم جه الاسطى الكبير مدحت الباشا قالى اؤمر قلتله انا جايب عفشة العربيه كلها ماعدا المساعدين الامامى والسوست بس كل العفشه انا جايبها وقولتله عاوزين نظبط علو العربيه وميبقاش فيه جنب اعلى من جنب و نغير الكبالن وقلتله على ورا عاوز اغير مساعدين و فيه طقه جامده موجوده من ساعت ما اشتريت العربيه ومش عارف حلها قالى متقلقش من حاجه مش هتمشى غير لما تكون مبسوط وعامل كل حاجه صح الصح وبصراحه راجل متواضع جداااا وكلامه قليل اوووى وهقولكم عن حاجه شوفتها فيه اول مره اشوف حد كده سبحان الله بجد ... الكلام ده كان الساعه 11 الظهر تماما
جه الاسطى عمرو ومعاه الصبى بتاعه كان الاسطى مدحت قاله فك عفشة قدام كلها وفعلا لقيته مسك المسدس الهوا اللى بيفك الصواميل وفك عفشة العربيه الامامية بالكامل مبقاش فى العفشه مسمار واحد مربوط حتى علبة الدركسيون فكها وعقبال ما فك العفشه الامامية كلها كان صلاة الظهر اذنت وحان موعد الصلاة وبعد ما الصلاة خلصت جه الاسطى عمرو اخد المقصات وعلبة الدركسيون والمساعدين وراكب فيهم السوست والبطاحات و الكبالن واخد كل ده وراح عند قسم خاص بصيانة المساعدين وعلب الدركسيون و المقصات والكبالن وفيه كل العدد الخاصه بصيانه الحاجات ديه مفيش حاجه بيعملوها بره عند خراط اوكده بجد شغل عالى بسم الله ماشاء الله
اول حاجه مسك علبة الدركسيون لقينا كاوتشة مزيكا بايظه جامد ومفيهاش حته على بعض المهم راحوا نادوا على الاسطى الكبير مدحت الباشا وجه شاف علبة الدركسيون قال انها بايظه فقالى عاوز تغيرها ولا ايه قلتله انا هخليها لغاية ما تجيب اخرها وابقى اركب باور واريح نفسى بدل علبة الدركسيون العادى قالى ماشى نعملها صيانه وراح الاسطى عمرو حط المساعدين على مكنة كبس وضغطهم ومسك السوست بمسكات خاصه بيها وفك المساعدين الاتنين ببطاحاتهم وجه الاسطى مدحت الباشا كشف على المساعدين قالى المساعدين الامامى ماندو نوعها مش حلو اوووى بس هى شغاله كويس وقالى كده هتروح تجيب الاتى
من محل جنبنا
وروحت المحل جنب المركز على طول واشتريت الاتى
1:علايه 3 زنبه ب 15
2:علايه 4 زنبه ب 8
3:كاوتشتين جراب مساعد ب 20
4:اتنين صدادات مساعد ب 30
5:كاوتشة مزيكا لعلبة الدركسيون اصلى ب 20
6:علبة شحم ب 12
7:اربعه افيز ب جنية واحد

وجبت الحاجه وروحت على الاسطى عمرو واديته الحاجه راح ماسك علبة الدركسيون وشال البارتين القدام وراح مركب البارتين الجداد وشال كاوتشة المزيكه المتقطعه وراح حاطط شحم وراح مركب كاوتشة المزيكا الجديده وقفل عليها بالافزان و راح فاكك كاوتشة المزيكا التانية وراح حاشيها شحم وراح مركبها تانى وحكمها بالافزان وراح فاكك العلبة نفسها الحديد وحشاها شحم وراح قافل تانى وقالى كده خلاص عملنا صيانة علبة الدركسيون

وبعدين راح ماسك الكبالن وراح شايل الكبالن القديمه وركب الكبالن الجديده

وبعد الكبالن راح ماسك المقصين وراح شال البيض القديم وركب البيض الجديد و بعدين شال الجلب منها وراح مركب الجلب الجديده وقالى كده خلصنا المقصات

وبعدين راح ماسك المساعدين ركب الاول الصدادات وفوقها كاوتشة جراب علشان تحافظ على المساعد من التراب وراح حاطط فى المساعد بتاع الجنب الشمال علاية 3 زنبة وراح حاطط فوقيها السوسته وبعدين حط طبق المساعد وحط البطاحه الجديده وراح رابط على صمولة البطاحه و بعدين حط المساعد كله على بعض تحت المكبس وضغط وشال المساكات اللى كانت ماسكه السوست وبعدين راح رافع المكبس وبكده يكون المساعد الشمال خلص

ونفس الكلام حصل مع المساعد اليمين بس اتحطله علاية 4 زنبة

وبعد ما خلصنا الكلام ده كله راح واخد المقصين وجوز المساعدين وعلبة الدركسيون والكبالن بعد ما كله اتعمله صيانه وراح طالع بيهم عند العربيه

وراح مركب اول حاجه علبة الدركسيون
وبعدين ركب المقصات و بعدها ركب الكبالن تانى واثناء التركيب كان فيه مسماريين بتوع المساعد الشمال بايظين وكان فيه غطا بطاحه اليمين مش موجود قالى روح هات مسمارين المساعد (اللى بيمسكوا المساعد فى الدشمه ) و هات غطا بطاحه بدل اللى مش موجود عندك وهات اربع صواميل 13 المهم فى المركز قسم خاص لبيع قطع غيار العفشه الاستيراد روحت جبت من عنده الحاجه ب 18 جنية
ورحت اديتله الحاجات وراح مجمع كل العفشه اللى قدام تمام تمام وراح مربط كل الصواميل بمفكات الهوا اللى عندهم وحرق عليها جامد بمفكات الهوا (حرق عليها يعنى ربط عليها جامد اوووى ) وراح جايب حاجه اسمها مقاسظبط بيها زوايا علشان اعرف امشى بالعربيه لغاية بتاع الزوايا وراح ظابط و بعدين شحم البطاحات الجديده وقفل عليها غطيانها ونزل العربيه على الارض وكده عفشة قدام خلصت خالص الحمد لله وساعتها كان اذان العصر اذن وحان موعد الصلاه

بعد صلاة العصر جه الاسطى مدحت انا بصراحه عاوز اسميه (أسطورة العفشه ) الله يديلة الصحه يارب قالى بتشتكى من ايه ورا بقى قلتله عاوزين نظبط علو ورا و حكاية الطقه اللى كانت بتحصل من نحية العجلة اللى ورا السواق طقه عامله زى كانك جبت بلاستك ناشف اوووى وكسرته مره واحده قالى بيعمل طرقعه جامده قلتله ايوه هنا بقى الحاجه الغريبه اللى كنت بقولكم عليها ولقيتها فى الاسطى مدحت حصلت راح نزل تحت العربيه مسك العجلة بايده وقال للصبى هز العربيه جامد راح الصبى قعد يهز العربيه قاله لا هز اجمد رحت انا كمان بقيت اهز فى العربيه بعدين راح قال خلاص كفاية كده راح هو قايم وراح حاطط ركبه عند العجله من تحت واديه ماسكه العجله من فوق وهز العجله كانه هيحودها يمين وشمال وبعدين راح قايم و قال للاسطى عمرو يرفع العربيه ويفك العجلتين اللى ورا وهيلاقى حاجه ماسكه فى الدنجل (اللى ماسك العفشه اللى ورا) اسمها مسمار عزم المسمار ده هيلاقيه مفكوك ومش متركب عليه حاجه اسمها طبق (حاجه زى الورد بتاعت الصواميل بس على كبير ) وهيلاقى المسمار سايب فقله يجيب طبق ويركب الطبق على مسمار العزم و يربط بالصواميل وفعلا الاسطى عمرو راح منفذ الكلام اللى قاله الاسطى مدحت بعدين راح الاسطى عمرو فاكك المساعدين وفك السوست وراح جه الاسطى مدحت شاف حالة السوست لقاها كويسه بس ملقيناش علايات ورا
راح قالى عاوزين علايات ورحت جبت زى ما قال من المحل اللى جنبهم الاتى
1: علايتين مرسيدس ب 16 جنية
2:علايتين ستيشن ب 14 جنية

ورحت جبتهم وجبت ورحنا مطلعين المساعدين المونرو الجديده من العلب بتاعتهم وانا ساعتها جيت شوفت المساعد القديم تيجى تضغط عليه بينزل بكل سهولة بس المساعد الجديد بتنزلة 2 سم بالعافيه اكتر من كده متقدرش فرق جامد يعنى بين المساعدين القديمه والجديده وراح حاطط لكل سوسته علايه مرسيدس وعلايه ستيشن واحده تحت وواحده فوق و بعدين راح مركب المساعدين الجديده وربط الصواميل تمام و راح مركب العجلتين تانى

وبكده الحمد لله عفشة العربيه كلها خلصت وساعتها كان فاضل على اذان المغرب ربع ساعه

وكان كل الناس اللى كانت جايه الصبح مشيت وجه بدلها ناس جديده وبعدها الناس الجديده كان خلاص حاجتهم خلصت وبيقفلوا الشغل وانا الوحيد اللى عمل شغل عفشه قدام وورا والعفشه مفيهاش مسمار واحد متفكش
المهم روحت عند الاسطى مدحت الباشا وقولت طبعا بعد اليوم ده كله وفك عفشة العربيه كلها اقل واجب مثلا هيكون 300 جنية
خصوصا انه هو اللى بيشحط جلب المقصات وعمل صيانه لعلبة الدركسيون و كل حاجه فى العفشه

فجيت قولت للاسطى مدحت اؤمورنى وحاطط ايدى على قلبى لقيته بيقولى 150 جنية
انا قولتله ايه 150 ؟؟؟
هو حضرتك متأكد انا فكيت عفشة العربيه كلها متأكد انه 150 بس قالى اه ايه اللى فيها !!! قلتله يعنى حضرتك مش عاوز حاجه تانى قالى هو كل المصنعية بكل حاجه 150
طبعا انا مكنتش مصدق ودانى قمت مطلع له ال 150 جنية واديتهمله وعلى فكره انا كنت اغلى مصنعية فيه ناس كان معاها هيونداى النترا 2011 و كيا كارنز وكدا كان اللى بيدفع 70 واللى بيدفع 80 وانا كنت اغلى مصنعية

وطبعا رضيت الاسطى عمرو ورضيت الصبى الصغير اسمه عبد الله

وكان بصراحه احلى مره فى حياتى عملت فيها شغل للعربيه واكون راضى عن كل شىء 100%

اما بالنسبه للناس اللى بتسأل ايه الغريب فى الاسطى مدحت اللى كنت بقول عليها فى الاول الحاجه الغريبه اللى فى الاسطى مدحت انه لما بتجيله عربيه عاوزه يتكشف عليها الاول علشان يعرفوا الاول ايه اللى عاوز يتغير انه بينزل تحت العربيه يمسك العجله اليمين بايده اليمين والعجله الشمال بايده الشمال ويقولهم هزوا العربيه يقوم قايم ماسك ورقه كاتب فيها الحاجات اللى العربيه محتاجاها سواء جلب او مصات او بيض والكلام ده بيحصل فى اى عربيه جتله قدام عنيا اه والله وازاى كده معرفش كان عندى واحد قريبى كان لسه مشترى سوزكى سويفت انا قلتله على الاسطى مدحت وراحله وبرضوا عمل معاه نفس الطريقه فى عربيته وقاله جلب وبيضه شمال بس وكبالن وبعد التغير جه ركب العربيه وبرضوا مكنش مصدق نفسه ان ديه عربيته وجه يقولى انت باعتنى عند واحد اسطوره وكل المصنعية اللى خدها 80 جنيه ونظام الشغل فى المركز ان الاسطى مدحت يكشف على العربيه ويعرف ايه اللى فيها ويقول للاسطى اللى شغال تحت ايده اعمل كذا وكذا وكذا والاسطى اللى شغال تحت ايده ما عليه غير انه ينفذ الكلام فقط .

نيجى لتانى حاجه حكاية ان الاسطى احمد حنفى لما جه يوصفلى مكان الاسطى مدحت وقالى انه هتلاقيه شغال فى الشارع والعربيات مرصصه فى الشارع

فعلا الكلام ده صح بس المركز ده لسه الاسطى مدحت فاتحه من اسبوعين فقط بدل المحل القديم ونقل كل الشغل اللى كان فى الشارع فى المحل القديم للشغل بداخل المركز الجديد وقفل المحل القديم خلاص وربنا يوسع عليه كمان و يباركله

نيجى بقى لتعليقى عن مركز مدحت الباشا

1:اول ناس يشتغلوا فى عربيتى يحلوا عفشة العربيه كلها حتى علبة الدركسيون من غير ما يكسلوا اى عفشجى تانى هتلاقيه بيقولك سليمه سليمه وزى الفل علشان يخلص يقفل وياخد فلوس وخلاص.
2:انت لما بتروح مبتحتجش زى باقى العفشجيه تروح عند خراط علشان تشيل جلب المقصات وكده هما عندهم كل حاجه .
3:الوحيدين اللى بيعملولك الشغل صح الصح ومش بيخلوك تمشى غير وعفشتك مفيهاش مسمار بايظ بمعنى اخر (بتمشى وانت متكيف )
4:بعد ما بتخلص شغل خلاص وانت ماشى الصبى اللى شغال بيجبلك كل حاجه نزلت من العربيه وبيحطهالك فى العربيه اتوماتك لوحده وانا كنت جيت اطلب منه الكبالن والبطاحات القديمه فقط لقيته قالى انا عموما بعد ما الشغل كله بيخلص بجيلك كل حاجه نزلت وديه حقك انت .
5:بيشتغلوا فى جميع انواع السيارات يعنى انا لقيتهم شغالين فى لانسر وكارينز و نوبيرا وفيرنا و 128 و نص نقل دبابه والنترا وكيا برايد بمعنى اخر شغالين فى جميع انواع عفشة السيارات
6:اسعار المصنعية القليله جداااا مقارنه بالشغل اللى بيعملوه يعنى ده مره ايام ال 128 عفشجى حل علبة الدركسيون وعملها حشو شحم وكدا اخد منى بتاع 80 جنية فى حين ان المركز ده نزل عفشة العربيه كلها والكبالن وكل حاجه حتى علبة الدركسيون والعفشه اللى ورا وكل شىء واخد فى الاخر 150 جنية فقط مع العلم انى كنت اكتر واحد دفعت مصنعية علشان كنت اكتر واحد عملت شغل عفشه وكان اغلب الناس بتدفع 70 و 80 جنية فقط

نيجى بقى لتعليقى على اداء العربيه بعد تظبيط العفشه
1:العربيه اختفت منها اصوات التزيق والترزيع نهائيا
2:العربيه عليت عن الاول وعلوها مظبوط مفيش جنب اعلى من جنب .
3:اصوات الطقطقه اثناء الملفات اختقت تمام الحمد لله
4:العربيه ورا بقت بسم الله ماشاء الله راسيه مش زى الاول قاعده تنطط طول الطريق بجد الله اكبر ربنا يبارك فيها.
5:الدركسيون بتاع العربيه بقى تقيل شوية وده بسبب علبة الدركسيون اللى تم عمل حشو شحم ليها واعتقد انه مع الاستعمال هيرجع لطبيعته تانى ان شاء الله

نقول بقى شوية نصائح لعفشة الاكسيل
1:اول نصيحه لو حد هيشتغل عفشة يروح عند مركز مدحت الباشا وديه اول واهم نصيحه لانى عارف انه هيدعيلى وهيبقى مبسوط فعلا.
2:بالنسبه للمساعدين امامى وخلفى فلازم يكونوا مساعدين غاز وتجيب ماركة KYB او مونرو ولو مش هينفع تجيب غاز يبقى هات المساعدين الامامى زيت بس لازم تجيب الخلفى غاز لازم لازم لازم.
3:اوعى تجيب مساعدين ماندو عندك مساعدين الKYB برقبتها 100 مره وكفاية انها يبانى وسعرها قريب اووى من الماندو مش فرق جامد بس الافضل من ال KYB والمندو المونرو طبعا كفاية انها حاجه اصلى وعليها ضمان عام كامل بس اهم حاجه تشتريها من موزع المعتمد بتاعها اللى هو هشام لهيطه فى التوفيقيه او اى موزع معتمد تانى فى منطقتك ويديك فاتورة مختومه واصليه
4:الكبالن نصيحتى تشترى التايوانى لان جودته عاليه وفى نفس الوقت سعره كويس مش زى الكبالن الصينى سعرها رخيص بس بتبوظ بسرعه ولا زى اليبانى او الالمانى سعرهم غالى والله اعلم مضروبين ولا لا .
5:لو نزلت تشترى حاجت العفشه فعندك ابراهيم البنا اشتريه من عنده مكونات العفشه بتاعت العربيه كلها فى الاغلب مش هتلاقى حاجه مش موجوده عنده لكل انواع الكورى واليبانى واسعاره رخيصه وفى نفس الوقت حاجات نضيفه بجد

والحاجات اللى انا اشتريتها كلها كلها اتكلفت الاتى
1244 جنيه
و مصنعية
150
يبقى كل حاجه
1394 جنية

عنوان مركز مدحت الباشا لصيانة العفشه لجميع انواع السيارت

هتنزل من الدائرى نزلة شارع البحر الاعظم و تاخد او يوترن وتمشى طوالى نحية منيل شيحه لا يمين ولا شمال وهتلاقى الطريق لفافف لف معاه بمعنى اخر متسيبش الطريق امشى طوالى وافضل اسئل وانت عموما هتلاقيها مركز كبير اووى ومتوب فوقيه يافطه كبيرة مركز مدحت الباشا واول ما توصل منيل شيحه لو سألت اى حد فين مدحت الباشا الف واحد هيدلوك

ومفاجائتى اللى قولت عليها فى اول الموضوع للناس اصحاب النوبيرا هى ان مركز مدحت الباشا بيعمل تعديل لجلب النوبيرا بيخليك تنسى جلب النوبيرا ديه نهائيا وجلب العربيه كلها بتتكلف حوالى 210 جنية بس بتنسى بقى خلاص الجلب اللى بتبوظ كل شوية ديه للابد .

وهنا نكون وصلنا لاخر موضوعنا
وياريت تدعولى ربنا يباركلى وييسرها معايا للافضل
وياريت تدعوا اللهم اغفر للمؤمنين والمؤمنات والمسلمين والمسلمات الاحياء منهم والاموات

و
السلام عليكم ورحمة الله وبركاته
__________________

جروب رابطه هيونداى اكسيل على
Facebook
اضغط هنا
-------------------------
للبيع قطع غيار السيارة هيونداى اكسيل
وكل السيارات الكورى
اضغط هنا
--------------------------
سبحان الله وبحمده سبحان الله العظيم
اللهم اغفر للمؤمنين والمؤمنات والمسلمين والمسلمات الاحياء منهم والاموات

سيد عصام
رد مع اقتباس
  #2  
قديم 19-07-2013, 04:10 PM
eng.osama eng.osama غير متواجد حالياً
 
تاريخ التسجيل: Sep 2011
المشاركات: 27
eng.osama has a spectacular aura abouteng.osama has a spectacular aura about
مميز رد: التجربه الكامله مع عفشة الاكسيل قطعه قطعه (اقوى مرجع فى عفشة الاكسيل) وشكر خاص لمركز مدحت الباشا لصيانة العفشه

ما شاء الله عليك وعلى كل انسان عنده ضمير وإخلاص

وبصراحة ده موضوع من أقوى المواضيع اللي قريتها في حياتي وينقصها فقط بعض الصور لتكون رسالة ماجستير
بجد استاذ ولك خالص تحياتي
رد مع اقتباس
  #3  
قديم 20-07-2013, 01:42 AM
cmatcho cmatcho غير متواجد حالياً
 
تاريخ التسجيل: Oct 2009
المشاركات: 810
cmatcho has a reputation beyond reputecmatcho has a reputation beyond reputecmatcho has a reputation beyond reputecmatcho has a reputation beyond reputecmatcho has a reputation beyond reputecmatcho has a reputation beyond reputecmatcho has a reputation beyond reputecmatcho has a reputation beyond reputecmatcho has a reputation beyond reputecmatcho has a reputation beyond reputecmatcho has a reputation beyond repute
افتراضي رد: التجربه الكامله مع عفشة الاكسيل قطعه قطعه (اقوى مرجع فى عفشة الاكسيل) وشكر خاص لمركز مدحت الباشا لصيانة العفشه

شكر ا ليك علي الموضوع الجميل
موضوع مشجع فعلا للتعامل مع المركز
كنت عايز اعرف هل في عربيات سابرانزا كانو شغالين فيها
وهل محل قطع الغيار شغال في اسبرانزا
جزيل الشكر
رد مع اقتباس
  #4  
قديم 20-07-2013, 04:33 AM
الصورة الرمزية elmo7areb
elmo7areb elmo7areb غير متواجد حالياً
التخصص العملى: كمبيوتر
هواياتي: القراءه
 
تاريخ التسجيل: Sep 2010
الموقع: المنصورة / طلخا / دقهلية
المشاركات: 229
elmo7areb is a splendid one to beholdelmo7areb is a splendid one to beholdelmo7areb is a splendid one to beholdelmo7areb is a splendid one to beholdelmo7areb is a splendid one to beholdelmo7areb is a splendid one to beholdelmo7areb is a splendid one to behold
افتراضي رد: التجربه الكامله مع عفشة الاكسيل قطعه قطعه (اقوى مرجع فى عفشة الاكسيل) وشكر خاص لمركز مدحت الباشا لصيانة العفشه

الاحلا من الكلام دة كله .................... انك بتفهم
__________________

رد مع اقتباس
  #5  
قديم 20-07-2013, 05:22 AM
الصورة الرمزية sayed2077
sayed2077 sayed2077 غير متواجد حالياً

من انا؟: انا مش فارس ولا فتى احلام انا زحمة وربكه وشغل جنان
التخصص العملى: طالب هندسة قسم اتصالات
هواياتي: الكمبيوتر و السيارات
 
تاريخ التسجيل: Jul 2011
الموقع: القاهرة
المشاركات: 1,405
sayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond repute
افتراضي رد: التجربه الكامله مع عفشة الاكسيل قطعه قطعه (اقوى مرجع فى عفشة الاكسيل) وشكر خاص لمركز مدحت الباشا لصيانة العفشه


المشاركة الأصلية كتبت بواسطة eng.osama مشاهدة المشاركة

ما شاء الله عليك وعلى كل انسان عنده ضمير وإخلاص

وبصراحة ده موضوع من أقوى المواضيع اللي قريتها في حياتي وينقصها فقط بعض الصور لتكون رسالة ماجستير
بجد استاذ ولك خالص تحياتي
الف شكر لحضرتك استاذ اسامه وفعلا الراجل ده تحفه انا روحت للراجل اللى بيظبطلى زوايا النهارده بعد الفطار لقيته بصلى باستغراب شديد ولقيته بيقولى انت عامل العفشه ديه عند ميين فبقوله لييه ؟؟؟ قالى انا مش شايف حاجه واحده غلط قالى انت كنت عند فنان مش عفشجى وسألنى على عنوانه وازاى يروحله وكدا

والمشكلة انه اتصدم لما عرف انه نزل عفشة العربيه كلها ورا وقدام وعلبة الدركسيون بوكل ده ب 150 جنية مصنعية بس كان فى حالة ذهول
__________________

جروب رابطه هيونداى اكسيل على
Facebook
اضغط هنا
-------------------------
للبيع قطع غيار السيارة هيونداى اكسيل
وكل السيارات الكورى
اضغط هنا
--------------------------
سبحان الله وبحمده سبحان الله العظيم
اللهم اغفر للمؤمنين والمؤمنات والمسلمين والمسلمات الاحياء منهم والاموات

سيد عصام
رد مع اقتباس
إضافة رد

الكلمات الدليلية
مساعدين, اكسيل, عفشة, نوبيرا

أدوات الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML متاحة

الانتقال السريع

 MasrMotors غير مسؤول عن أي اتفاق تجاري أو تعاوني بين الأعضاء
التعليقات المنشورة لا تعبر عن رأي MasrMotors ولا نتحمل أي مسؤولية قانونية حيال ذلك ويتحمل كاتبها مسؤولية النشر


الساعة الآن 03:58 AM.


Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017