استهلاك البنزين عالى فى 128

[dr.chemist]

الاخوه الاعضاء عندى عربيه 128 هى 1300 سى سى هى صفيحه البنزين بتعمل معايا بالكتير 140 كيلو يعنى اللتر يعمل 7 كيلو واعتقد ان ده كتير شويه وصوت الماتور عالى شويه وبحس بحراره شويه وانا سايق مع ان مؤشر الحراره مش بيعلى والمروحه بتشتغل .. لو حد عنده فكره عن سبب استهلاك البنزين والحراره يفيدنى .. وشكرا

[m_elmasoudy]

أهلا بحضرتك،، ويسعدنى انى اكون اول من رد على استفسارك..
إستهلاك البنزين الزائد بيكون لعدة أسباب، وعشان ماندخلش فى متاهات هألخص لحضرتك بعض الأسباب اللى ممكن تكون هى السبب فى زيادة الإستهلاك:
1- إعمل كشف على تانك البنزين.
2- كشف على المواسير الخارجة من التانك حتى مدخلها فى الخراطيم اللى بدورها بتدخل على ترومبة البنزين ومنها للكاربراتير
3- ودى أهم خطوة وتكون بعد مراجعة المراحل السابقة وهى الكشف على الكاربراتير عند ورشة متخصصة فى صيانة الكاربراتير.
متهيألى ان الكاربراتير هو المسئول الاول عن ضخ كميات البنزين إلى داخل الموتور.
وربنا يوفقك فى ده كله.. ومستنيين ردك......

[m_elmasoudy]

- بالنسبة لصوت الموتور العالى، ممكن يكون ان الميكانيكى كان معلى الموتور شوية من الكاربراتير، بس عموما ده لا يؤدى لإستهلاك 1 لتر بنزين لكل 7 كيلو، بمعنى ان ده مش هو سبب الاستهلاك الزايد للبنزين.
- وأيضا راجع على مقاييس التاكيهات (ضبط التاكيهات).
- أما بالنسبة لإحساسك بالحرارة وانت داخل العربية فأعتقد ان ده موجود غالبا فى السيارات القديمة نوعاً ما وده بسبب انها مابتكونش متقفلة كويس من ناحية حوض الموتور، أقصد بعكس السيارات الجديدة اللى بتكون معزولة تماما حراريا عن قمرة القيادة. وأيضاً يوجد بعض الحلول لمشكلة الإحساس بالحرارة، مثلاً إنك تغير اللباد (العازل الحرارى) اللى موجود خلف التابلوه، وده أحياناً بتدخل إليه بعض القوارض وتاكله، فتعمل فتحات فيه تحسسك بالحرارة.
ودى آرائى والله أعلم

[dr.chemist]

المشاركة الأصلية كتبت بواسطة m_elmasoudy - بالنسبة لصوت الموتور العالى، ممكن يكون ان الميكانيكى كان معلى الموتور شوية من الكاربراتير، بس عموما ده لا يؤدى لإستهلاك 1 لتر بنزين لكل 7 كيلو، بمعنى ان ده مش هو سبب الاستهلاك الزايد للبنزين. - وأيضا راجع على مقاييس التاكيهات (ضبط التاكيهات). - أما بالنسبة لإحساسك بالحرارة وانت داخل العربية فأعتقد ان ده موجود غالبا فى السيارات القديمة نوعاً ما وده بسبب انها مابتكونش متقفلة كويس من ناحية حوض الموتور، أقصد بعكس السيارات الجديدة اللى بتكون معزولة تماما حراريا عن قمرة القيادة. وأيضاً يوجد بعض الحلول لمشكلة الإحساس بالحرارة، مثلاً إنك تغير اللباد (العازل الحرارى) اللى موجود خلف التابلوه، وده أحياناً بتدخل إليه بعض القوارض وتاكله، فتعمل فتحات فيه تحسسك بالحرارة. ودى آرائى والله أعلم

يا باشا انا عاجز عن الشكر وان شاء الله هكشف على الحاجات وربنا يسهل واعرف السبب

[ziabassem]

أعتقد أول حاجة لازم تبحث فيها هي ظبط كهرباء العربية .. لأن الكهربا العليا بتسحب بنزين كتير بالإضافة أنها بتخلي صوت الموتور عالي .

بالنسبة لموضوع الحرارة .. علشان تخلص من القصة دي روح لسروجي خليه يحط ليك لباد أكتر .. ويفضل بجانب اللباد الل بيبقى فيه عاكس للحرارة (بيبقى ناحية لباد والناحية التانية عاكس حراري "لونه فضي") .

في الأول والأخر استهلاك البنزين الزيادة بيكون ليه أسباب تانية كتير من أهمها :

1. حالة الطريقة اللي أنت ماشي فيه (زحمة - رايق) .
   
2. طبيعة قيادة سائق العربية إذا كانت هادية أو عنيفة (بتحرق على الغيار ولا بتنقل طبيعي) .
   
3. نوعية البنزين اللي أنت بتحطه + البنزينة اللي بتمون منها كويسة ولا لآه .
   
4. ظبط الكربراتير .
   
5. التأكد أن مفيش مشاكل في الشكمان (مسدود - تنفيس) .. لأن ده بيؤدي لزيادة السخونة واستهلاك بنزين عالي .
   
6. التأكد أن مفيش تسريب في دورة البنزين (الخراطيم والتانك) .

ده اللي أنا فاكره في الوقت الحالي .. وإن شاء الله المشكلة مش حتطلع من دول .