|
مقارنات لمساعدة الأعضاء فى المفاضلة بين الأنواع المختلفة من السيارات |
|
أدوات الموضوع |
#1
|
||||
|
||||
إزاي تختار عربية بالإستعانة بالمنتديات و مواقع التواصل
هأحاول ألخص في الموضوع ده خلاصة خبرتي في التعامل مع المنتديات و السوشيال ميديا من 2007
ربنا كرمك و معاك قرشين عايز تشتري بيهم عربية جديدة العربيات غالية و الفلوس جبتها بطلوع الروح عايز تحطهم في أحسن حاجة و متندمش ،، الانترنت طبعا أسهل طريقة تعرف بيها أكبر عدد من الأراء بس خلي بالك مش أحسن طريقة !! الانترنت بطبيعته عالم إفتراضي مش شرط الرأي اللي فيه رأي أمين ،، ة هأحاول أوضح من وجهة نظري هوا مفيد في آيه و إزاي تستخلص فايدته و تضيف عليها ،، أول حاجة أنتا أدري واحد بمتطلباتك ، إمكانياتك المادية ، تفضيلاتك في السيارة يعني دايما دايما تلاقي لو بتقارن بين عربيتين مثلا كوري و ياباني ،، تلاقي خمسين واحد طالع يقولك دي ياباني أحسن ،،، طيب ما أكيد أنتا عارف !! أكيد البراند يفرق ، بس العلمي إنك بتقارن Apple to Apple معظم رواد المنتديات و المواقع عندهم خبرة بالسيارات فبلاش تقارن سيارتين مش من نفس الفئة متقارنس SUV ب compact car مثلا ،، أنتا كده بتتعبهم و هتجيب لنفسك الكلام تحذير تاني : متروحش تسأل في الجروب أو المنتدي الخاص بالعربية ،، هتلاقيهم قالولك عيبها إنها بتغير كاوتش و بطارية أما أدائها لولا إنها مبتوصلش 260 كانت تبقي أفضل من البورش طبعا فيه ناس كتير موضوعية و بيقولوا علي العيوب و المميزات بما يرضي الله ،، بس برده ممكن يهون أو يهول متسألشي عن الأداء ممكن واحد يولع في عربية عشان فيها نتشة في الفتيس الأوتو بتظهر كل سنة مرة ،، و أنتا و لا يفرق معاك فيه واحد شايف العربية رهوان و أنتا بالنسبة لك بطة !! الأداء ده موضوع نسبي تماما يختلف من شخص لآخر ،، طبعا أنتا كده هتقولي آيه يا عم طيب خلاص مأنتا ما خليتش و لا ميزة للرجوع للمنتديات و المواقع ،، اسمعني بقه هأقولك آيه ،، و أوصلك زيتونة الموضوع الشكل ، الوسع الداخلي ، التابلوه ، فئات العربية ، الكماليات ، آلخ دي حاجة بسهولة تعرفها من زيارة المعارض ، و في نفس الوقت حاجة نسبية شخصية مالهاش لازمة ترجع للنت ،، اتعب شوية أنتا مبتشرتيش عربية كل يوم غير إنها فسحة و متعة شخصية ،، و يا ريت تعمل تيست مع التوكيل تسأل عن توافر و أسعار قطع غيار عشان التجربة تكون متكاملة موضوع أسعار و توافر قطع الغيار دي من الحاجات اللي ممكن تعتمد فيها علي المواقع و معلومات الناس برده و إن كنت أفضل تسأل بنفسك الأداء ،، لازم لازم لازم تجرب العربية ، اتصرف بأي طريقة أعرف ناس اشتري عربيات و باعوها بعد شهر لأن أدائها مكنش زي اللي في دماغهم ،، و دي مينفعش ترجع فيها لأراء الناس ،، لازم تجربتك الشخصية لأن الموضوع نسبي زي ما قولتلك ،، العزل ، صوت الموتور ، الثبات ، السحب ، العفشة ،، آلخ ،،، عناصر تقييم تختلف من شخص للتاني حسب تطلعاته و استخدامه و خبراته ،، كمستهلك عادي أنتا ميهمكش أرقام تسارع و قوة محرك و كام سي سي ، و نوعية عفشة صح ؟؟ اللي يهمك إحساسك النهائي بده كله ، و ده مبيتعرفش غير بالتجربة ، فكك من الأرقام نيجي بقه لأهم نقطة و اللي تعتبر أهم حاجة في قرار شراء العربية و دي نقطة تميز المنتديات و المواقع ، و مفيش بديل ليهم غير بصعوبة ،، مشاكل العربية !!! أنتا مش عايز تشتري عربية و يطلع عينك حتي لو التوكيل محترم ، سدة نفس و عطلة زي ما قولت في الأول متسألش أصحاب العربية مباشرة يعني ،،، طبعا أنتا أول حاجة هتيجي في دماغك تعمل سيرش علي مشكلة / مشاكل / عيب في السيراتو مثلا ،، ده كويس و غالبا هيطلعلك نتيجة من نوعية كارثة في السيراتو ،، أخيرا بعت بنت **** ،، هذا ما حدث مع التوكيل النصاب ،، و تخش عالموضوع يجي لك قرفة و تكره العربيات كلها ،، ده مش مقياس و لا يعتمد عليه لأن ممكن تكون حالة فردية أو عيب صناعة أو عيب استخدام ، أو حتي عميل بينتقم أو منافس بيشوه ،، تعمل ايه بقه ،، الموضوع محتاج صبر و وقت طويل شوية ،، عامل زي الجاسوس أو محلل البيانات ،، هتخش علي جروبات العربية علي الفيس بوك و منتداها في المنتديات ،، تبتدي تقري أكبر كم ممكن ، و من خلاله توصل لأكتر شكاوي متكررة ، هتكتشف إن الملاك نفسهم بيتكلموا عن إنها مشكلة متكررة و الحلول اللي وصلوا ليها مع نفسهم أو مع التوكيل ،، كده أنتا حطيت أيدك علي عيوب العربية تبتدي تحطها عالميزان ،، مفيش عربية بدون مشاكل ، الفكرة المشاكل دي مقبولة بالنسبة لك ؟ هتتعايش معاها و لا مشاكل كارثية أو تفرق معاك شخصيا أنا مثلا لما جيت أشتري عربيتي فلوانس 2012 قريت كتير جدا لحد ما وصلت غير لعيوب الأداء اللي قولنا نسبية لعيبين فنين كانوا شبه مؤكدين في الموديل ده كانوا كاوتشة المساحة بتتقطع بسرعة و عوامة البنزين بتخطرف قراية عداد البنزين اللي هوا مشكلتين لا تذكر بالنسبة لفئة العربية ، و التوكيل كان بيحلهم فاتكلت علي الله ،، و يستحسن تتأكد من النتيجة اللي وصلتلها بسؤال ملاك العربية ساعتها هيكون الهدف التأكد من ابعاد المشكلة فقط أنا عارف إني صعبت الموضوع عليكم بس قرار شراء سيارة مش سهل و يستاهل التعب ،، أتمني أكون افدتكم ،، |
#2
|
||||
|
||||
رد: إزاي تختار عربية بالإستعانة بالمنتديات و مواقع التواصل
بص انت قدمت خبرة طويلة فى صورة وجبة دسمة ممكن تكون صعبة الهضم لبعض الناس فعلاً انا نفسى نسيت اسم المنتدى اصلاً بس مش ديه المشكلة ولا السوشيال كله عموماً مشكلة الحكاية كلها فى الورد اوف ذى ماوس او الكلمة اللى بتتقال وتتصدق وتخش الدماغ وديه ممكن تسمعها من صاحبك او من اخوك وممكن ع القهوة فى نصحية من واحد متعرفوش لواحد تانى متعرفوش زى ما ممكن من خلال المنتديات برضو
الفكرة كلها امتى بتصدق اللى بتسمعة او تقراه وامتى لاء وطبعاً الناس مختلفين فى النقطة ديه مابين ناس بتسمع وتصدق بسهولة او بودانها فقط ودول اللى بتيقال عليه ودنى وبين ناس بتسمع وتصدق بعقلها وتجاربها ودول بيعملو حسابات معقدة كتير كلها نسبية برضو زى اللى انت عملتها ديه ومش كل حسبة تنفع لكل حد |
#3
|
||||
|
||||
رد: إزاي تختار عربية بالإستعانة بالمنتديات و مواقع التواصل
كلامك صح جدا، أنا عن نفسي قبل ما أدور بحدد احياجاتي ثم العربيات اللي بالسعر المناسب وفيها احتياجاتي والمهم قطع الغيار وتواجدها بره التوكيل وأسعارهاوبعد كده ابدأ أدور على النت بس بصراحة الأول في مواقع أجنبية عشان دول بيجيبوا المفيد وغاليا التحيز بيبقى أقل من عندنا بعد كده أشوف الآراء وبتبقى زي ما حضرتك قولت منها اللي يرفع العربية السما ومنها الي ينزلها الأرض،وبعدين أشوف المعروض بعيني عشان أحدد هل اختياري كان صح وانا عارف إن خطوة النزول متأخرة بس دا علشان لما تنزل تبقى واثق من اختيارك والنزول نظرا لظروف الشغل مش سهل.
__________________
مع تحياتي المــــــفــــــــكــــــ ر اللهم أرنا الحق حقا وارزقنا اتباعه
وأرنا الباطل باطلا ووفقنا لاجتنابه |
#4
|
||||
|
||||
رد: إزاي تختار عربية بالإستعانة بالمنتديات و مواقع التواصل
اللي هوا أقوي وسيلة تسويق عالإطلاق و يسوي ملايين بس أنا حطيت معيار رقمي تحليل عدد تكرار المشكلة ده علي فكرة ممكن يكون مش دقيق أووي لأن مثلا ممكن تكون موديل معين بيظهر فيه عيوب متنوعة كتير مش عيب او اتنين ثابتين ده ليه مدلول علمي إن العربية دي فيها عيب تجميع و برده مينفعش استدل مباشرة يعني اكيد حجم عيوب التجميع في الفيرنا مثلا هيبقي اكتر بمراحل من عيوب تجميع الفلوانس لأن الأولي مبيعاتها أكتر بمراحل، ساعتها هاحط النتيجة العددية في مقارنة مع عدد ملاك السيارة و باقي معايير التقييم اعتبرتها شخصية نسبية كلامي هنا للمستخدم المحترف مش المبتدئ |
#5
|
||||
|
||||
رد: إزاي تختار عربية بالإستعانة بالمنتديات و مواقع التواصل
اختلف معك في نقطة الرجوع للمواقع الأجنبية مواصفات السيارات مختلفة + طبيعة شوارعنا و بنزينا مختلفة دي حاجة لازم ترجع فيها لتجارب السوق المحلي |
|
|