مشاكل بالايمجراند خطيره

[sayif]

عزيزي

هي سيارة حلوة

1500 سي سي غير موجودة في بلدي العراق

غبور يبيع هونداي هنا تختلف عن الموجودة في مصر

نفس الشيء


منصور شفرولية يبيع موديلات مش موجودة بمصر

تحياتي

سيف

العراق

[مصطفي توني]

انا مبدئيا كنت محتار بين اللوجان والافيو وفي لاخر رسيت علي الامجرندا
لان فعلا سعرها قليل بالنسبة للامكانيات الي فيها وانا علي فكرة معايا فيرنا وحسيت بفرق رهيب بين العربيتين

بخصوص الملاحظاتا الي حضرتك قولتها احب اقولك كلمة واحدة بس انت هتقارن عربية مثلا معدية ال200000 جنيه بعربية 80000 جنيه ازاي؟
الخامات دي مش ممتازة ومش وحشة يعني علي قد الفئة السعرية بتاعتها مش اكتر
وبعدين انت مينفعش تحكم علي اي عربية غير لما تركبها وتجربها كام شهر
الفيرنا قبل مااجيبها في 2008 كان كل الناس بيشتكو منها عشان الامان والثبات وكده وكلام تاني كتير لما تركب العربية هتحس انها كويسة جدا مقارنة بسعرها

انت مينفعش تشتري عربية ب80000 الف جنيه وعاوز امكانيتها زيها زي عربية ب200000 الف جنيه مش كده ولا ايه؟؟؟؟؟؟

[medoking2006]

المشاركة الأصلية كتبت بواسطة مصطفي توني انا مبدئيا كنت محتار بين اللوجان والافيو وفي لاخر رسيت علي الامجرندا لان فعلا سعرها قليل بالنسبة للامكانيات الي فيها وانا علي فكرة معايا فيرنا وحسيت بفرق رهيب بين العربيتين بخصوص الملاحظاتا الي حضرتك قولتها احب اقولك كلمة واحدة بس انت هتقارن عربية مثلا معدية ال200000 جنيه بعربية 80000 جنيه ازاي؟ الخامات دي مش ممتازة ومش وحشة يعني علي قد الفئة السعرية بتاعتها مش اكتر وبعدين انت مينفعش تحكم علي اي عربية غير لما تركبها وتجربها كام شهر الفيرنا قبل مااجيبها في 2008 كان كل الناس بيشتكو منها عشان الامان والثبات وكده وكلام تاني كتير لما تركب العربية هتحس انها كويسة جدا مقارنة بسعرها انت مينفعش تشتري عربية ب80000 الف جنيه وعاوز امكانيتها زيها زي عربية ب200000 الف جنيه مش كده ولا ايه؟؟؟؟؟؟

كلامك صح بس للاسف عشان الدولار الى كل يوم سعرة بيعلى ده بوظ الدنيا والجمراك كمان بس مش عارف ليه المصريين وده حقيقة يحب يشترى ارخص حاجا وتبقى اعلى جودة طب ازاى

[ahmedkolaly]

السيارة عامله معايا 5500كم فقط ومع ذلك اليكم الاتى:-
- نور الاستوب بتاع الفرامل بيعلق بعد غلق السيارة وعشان يطفى لازم ادوس عالفرامل كذا مرة
- صوت طرقعه فى الدبرياج لما انزل بيه للاخر
- ترشيح زيت اعلى وش الموتور وترشيح زيت ايضا من ماستر الدبرياج السفلى ومغرق الدنيا بزودو كل فترة كبيرة
-السحب ضعف جداً ورعشه اثناء تشغيلها واثناء الغلق العربية بتترعش زى مواتير اجاز لما تدور
- المساعد الخلفى يمين هبط وعلى فكرة عشان عارف الرد انا نافخ نتروجين وبشيك عليه كل اسبوع العفشة رديئه عموما جداً جدً
- كمبروسور التكييف انتهى تماما وكل مرة اروح التوكيل بيزودو فيريون ومغروهوليش مع انى من اول الناس اللى اشتكت من التكييف وعودة خروج الهواء الساخن من فتحات التكييف فى التابلوة
- وجود فواصل فى الكنسول دى اكتشفتها مؤخراً
- زحف عند الفرملة بالاخص العجلة الامامية يمين كنت هلبس اكتر من مرة
- وجود ريم على وش مياه الريداتير بكثافه
- صوت عالى بمكنه الباور وده بيوضح جداً عند الركنه
- ردائة الدهان ووجود تقشير اعلى الاكصدام وبعض اجزاء السيارة الداخلية والخارجية
- استهلاك عالى فى البنزين
- صوت الماتور او الماكينه بقى خشن
- الغيارات عموماً بقت بتعض
وذهبت للتوكيل اكثر من 11 مرة وكل ده من رصيد اجازاتى فى العمل يعنى عطلة على الفاضى عدم وجود فنيين على مستوى من الخبرة او العلم بالشىء تقاعش عن الخدمة المطلوبة بطىء شديد وانتظار اكثر من اللازم وعلى ذلك لم يتم عمل اى شىء من المنوه عنه اثناء الاستقبال
- معاملة دون المستوى وحدوث مشاجرات فى بعض الاحيان مع العملة والفنيين
- اهمال شديد عند تجربة السيارة لانى عند تجربة سيارتى من قبل المهندس التوكيل على الطريق خارج التوكيل كان هيخبط السيارة فى عربية نصف نقل كبيرة مسرعه وكان هوا اللى غلطان بالاضافة اننى لاحظت القسوة الشديد على السيارة اثناء تجربتها من جانب الفنيين وايضا وجود شحم واثار متسخه بالصالون عموماً واسلوب غير لائق فى التحدث عند التعليق على ذلك
انا مقدم شكوى فى حماية المستهلك وجارى اتخاذ الاجراءات
ولله المشتكى ......................... .احمد القللى

[medo_nice]

انا اول مره اشارك بموضوع في المنتدي اسمي محمد من حلوان / محاسب
الحاجة الاولي / احب ارد علي الاستاذ احمد واقوله اني احترم كلامه كتير وبقدره ولكن اللي حصل معاك في التوكيل مبالغ فيه ده لو بسكلته مش هيبقي توكيلها بالشكل اللي انته بتقوله ده وانا لا سمح الله مش بكذب كلامك ولكن ممكن موقف وحش حصل معاك ضايقك فكان تأثيره علي الوصف اللي انته كتبه ده بالإضافة الي ان غبور مش اسم عادي في سوق السيارات علشان يوصل للمستوي ده ايوه ممكن يكون فيه بعض الاهمال واللامبالاة كعادة المصريين في كل مجال مش بس السيارات
الحاجة الثانية / احنا عوزين نشجع بلادنا ونقومها علي رجليها وده كانت اهداف الثورة علي ما اعتقد في 2011 ولا انا ناسي ياريت حد يفكرني طيب التقفيل المصري ضعيف في السيارات تمام ازاي ممكن يعلاه ويقوي اكيد لما كل المصريين يشتروا المنتج المجمع بمصر وتزيد نسبة مبيعاته تبدأ تزيد الارباح والحوافز بتاعت الفنيين المصريين اللي في مصانع التجميع ويزيد وتقل نسبة الاخطاء ويزيد الاهتمام صح ومثال علي كده المنتج الصيني عام 2005 و2006 و 2007 و 2008 حتي 2013 يوجد فروق مش فرق واحد ولا اثنين في الجودة والشكل وسعر المنتج كمان زاد صح ولا غلط طيب اول موبايل صيني نزل مصر كان شكله ايه مش كان زي اللاسلكي اللي مع ظباط المرور ورغم ذلك اتباع وانتشر لأنه كان رخيص وفيه كل الامكانيات وبعد كده اتغير من حيث الشكل والجودة وبقي بخطيين ويحسب للصين انها اول دولة عملة الخطيين وكرتين ميموري ثم بعد كده قامت نوكيا وسامسونج وال جي بالتقليد اقصد من المثال ده ان بلدنا لسه مش قدره تصنع سيارة او منتج ينافس المنتج الصيني او الاوربي وبدأنا نقوم بالتجميع والتقفيل في البداية زي بداية الصين ولازم يكون الاداء ضعيف والخبرة قليلة لاكن مع الوقت وزيادة الطلب والانتاج الجودة والاداء يعلاه
انا النها ردة معايا سيات كوردوبا 2002 كاملة مانيول طبعا مينفعش اقارن بينها وبين الصيني لاكن عربيتي مثلا مستعملة حاليا بتعمل من 40000 الي 45000 ج حسب الحالة والكيلو متر وده عربية اوربي اسباني الماني جديدة 120000 ج فول اوبشن قطع غيارها غالية ومش متوفرة خاصتا في حلوان علشان اجيب حاجة بنزل التوفيقية لو جديد او مدينة السلام جديد واستيراد طيب النها ردة لو عربية صيني تقفيل مصري موديل السنة جميع الكماليات الحديثة بـ 84000 ج وفيها بعض العيوب في التقفيل ومع الصيانات الدورية بتتحل مش شايف أي عيب في ده لان ولدي كان جايب عربية في عام 2004 تقريبا كيا برايد سيدان زيرو وموديل السنة وكوري تقفيل كوري من معرض ابو غالي وبعد ما استلم العربية ومشينا في الطريق لاقي عداد السرعة مش شغال رجعنا للمعرض قال روح التوكيل في العبور رحنا كشفوا لاقوا الدراع بتاع الكيلو متر فيه اكس مكسور عيب صناعة وتم تغيره علي حساب التوكيل ومشينا وتمام التمام
وعربيات اوربية مع زملائي في الشغل زيرو وكان فيها مشاكل بسيطة وتم حلها في التوكيل
اقصد من كلامي عوزين نبقي مع بعض كلنا ايد وحدة انا لو مكانك يا استاذ احمد بدل ما اعمل شكوي نجمع العملاء اللي عندهم مشاكل كتير ونجتمع مع مدير التوكيل او مع رئيس المجموعة او ابو غالي ذات نفسه لو حكمت الظروف نحسسه اننا بنشجع المنتج المجمع بأيدي مصرية و بنشجع العمالة المصرية بس في سلبيات كتير لازم تتعالج والمشاكل الموجودة تتعالج علشان نرتقي باقتصاد بلدنا وبعمالة وفنيين بلدنا والا هنفضل محلك سر لما انت تقاطع المنتج المجمع محلي وانا اقرا كلامك اخاف منه وابعد انا كمان طيب وبعدين نجري علي المستورد هل ده الحل انا عن نفسي هبيع عربيتي وهكمل واشتري الايمجراند وانصح أي حد تاني بيها طالما ان اساسيات العربية ممتازة من حيث الثبات والامان والسحب والكماليات أي حاجة تانية سهلة وبسيطة ومتنساش ان البي واي دي اول ما نزلت مكنش حد بيبصلها بطرف عين دلوقتي نجحت تاكسي وبالتالي تنجح ملاكي و الاسبرانزا كانت نفس الموضوع والتوكيل سئ في المعاملة دلوقتي انتشرت وأي ميكانيكي بيشتغل فيها وقطع غيار عند البقال وبعدين جميع شركات السيارات الكبيرة والعالمية فتحت مصانع قطع غيار في الصين وبتنزل قطع الغيار الاصلي والصيني صح يعني لو انت معاك تمن الاصلي هتركبه طيب لو مش معك هتركب الصيني وتمشي حالك او تركن العربية لما تيجب الاصلي اذا العربية اوربية ومكونتها ممكن تكون صيني
عوزين نفكر بشكل عملي زي الناس بتوع بره ( انا معايا كام ويركبني ايه وبمواصفات ايه ) لما اقارن اقارن بين العربيات في نفس الفئة السعرية والكماليات المتوفرة عليها علشان المقارنة تبقي عادلة يعني مينفعش اقارن ايمجراند بـ اوبل او تويوتا كرولا او جيتا او كارينز لاكن ممكن اقارنها مع البريليانس والبي واي دي والاسبرانزا معلش هطول عليكم شوية بس ده والله اول مشاركة ليا استحملوني
يعني مثلا لانوس شيفروليه صيني مية في المية الفان السابعة راكب شيفروليه صيني ميه في الميه يعني الراجل بتاع الاوبل الالماني بقي بتاع صيني صح فيه ناس بتوع قطع غيار اعرفهم كويس وفيه صداقة طويلة بيحلفو ان فيه قطع غيار الاوبترا والافيوا صيني ومكتوب عليها كوري وعليها العلامة بتاعت جينرال موتورز المائية يعني مضروبة واللي ضربها الوكيل نفسه يعني بيضرب نفسه بنفسه قلت ليه كده قالو لو كتبلك صيني صراحتنا هتسيبها وتاخد الكوري ومصنعه اللي في الصين يقف فكتب كوري وهي صيني علشان يشغل الصنيين اللي في مصنعه طيب بزمتك يا استاذ احمد تتعامل مع ده ولا مع اللي قال انها صيني صراحتنا ومصنعها هنا في مصر وعمالة مصرية حتي ولو فيه بعض السلبيات في الصيانة والمعاملة
بالإضافة ان اكيد في قطع غيار كوري ممكن تركب علي الايمجراند من الالنترا مثلا او النيو اكسنت او الماتريكس انا صحيح مسئلتش بس اكيد فيه لان ده مش ممكن يعدي علي واحد زي غبور انه يبقي مأمن نفسه في حالة نقص قطع غيارها يقدر يستعين بقطع غيار عربياته الثانية ويمشي حاله ويحافظ علي توكيله وكده كده هيبيع وكسبان ومدام ركبت قطع غيار الكوري او الياباني يبقي فيه ايه تاني تقلق منه
وللامانة برضوا تاجر عربيات مخضرم قلي ان الايمجراند والبي واي دي هيبقي ليهم في مصر مستقبل كبير جدا فوق ما تتخيل في خلال سنتين من دلوقتي وبكره افكرك يا محمد بكلمي ده قلت والله وجهة نظر تحترم خاصتا انك تاجر بقالك 20 سنة في العربيات بس حبيت انقل المعلومة ده ليكم
في النهاية ارجو ان تكون وجهة نظري واضحة للجميع وربنا يوفقنا جميعا في اختيارات ويكفينا الشر فيها ويجلب لنا الخير اللي فيها