حكايتى ...... مع التاكيهات

nktis
: 018A1D~146:

المشاركة الأصلية كتبت بواسطة Hisham.Elgazzar طبعا حضرتك عارف البساتم بتشتغل إزاى وتوصيلها مع الكرنك من تحت فوق بقى فى وش السلندر اه اللى بيميز عربية عن التانية ماهو كل العربيات ميكانيكيا واحدة اللى بيفرق العربية من التانية هو وش السلندر الفيات عاملة وش سلندر خفيف وظريف وسهل الظبط لكن القوة اللى بيأثر بيها على أداء الموتور ضعيفة بالمقارنة مع المواتير الالمانى واليابانى لأن كل واحد عنده التكنولوجى بتاعته اللى عمل بيها وش الموتور العربيات الألمانى بقى عاملين تكنولوجى أحسن شوية والإيطاليين سرقوها منهم اليابانيين بقى محدش قدهم عملوا وش سلندر تحفة بيطلع من مكنة 1600 قدرة 170 حصان الآتى بقى أشكال الوش من جوا على وشرح التاكيهات بإذن الله هنبدأ الأميريكان ماسلز الموستانج ، الصورة اللى جاية دى للوش بتاع السلندر هتلاحظ الشواكيش طالعة نازلة فوق الصبابات والسوست الجامده دى اللى بتساعد انها تحكم الصبابات فى غرف الحريق الشواكيش دى بقى لازم تظبط المسافة بينها وبين الصباب اللى بتدق عليه علشان ماتبقاش محملة ( علشان كده يقولك التاكيهات محملة) أو يكون الخلوص بزيادة فيقولك التاكيهات مفتوحة وفى كلتا الحالتين العربية مش بتبقى مظبوطة - تسخن - تاكل بنزين - تنفخ زيت -تضرب كاوتش الصبابات - وحجات تانية كتير ممكن تعمل بلاوى مع ان ظبطها قمة فى السهولة والعبط تمام كده وخلى بالك ان معظم مواتير الفيات بالشكل ده والشواكيش بتتظبط مسمار وصامولة نوع تانى بقى وده فى معظم العربيات الألمانى زى ماقلتلك ، اللى الطلاينة سرقوها ودى هتلاقيها فى الفولكس والفيات الألمانى والمواتير بتاعت السفينة الـ132 وهى دى بقى اللى لازم تروح للخراط علشان يظبطها ده شكل وش ال132 من فوق بعد فك غطا التاكيهات وده موتور كامه واحدة علوية برضو نفس النظام ركز بقى ، لاحظ ان عمود الكامة ماشى من فوق ( اللى باللون الغامق ومتثبت فى الوش شايف الأجزاء المثلثة اللى بتلمع وعاملة زى الجبنة النستو هى دى حدبات الكامة وظيفتها : العمود ده معمول بالكمبيوتر ومتقسم انه طول ماهو بيلف يفتح الصبابات ويقفلها حسب تقسيمة الصانع وده طبعا بيتزامن مع طلوع ونزول البستم والإشعال وهكذا طيب اه اللى تحت حدبات الكامة بقى ؟؟ الأطباق والكستبانات ده بيبقى فى النوع ده من وش السلندر العمود بينزل يفتح الصباب ويقفله عن طريق الطبق والكستبان الكستبان فوق سوستة الصباب خبط لزق الأطباق بقى هى اللى بتتغير صيف وشتاء بمقاسات معروفه بيتهيألى ان الصورة كده بدأت توضحلك صح ؟؟ علشان كده قابل بقى الصورة دى قطاع عرضى للوش ده بالظبط زى ماقلتلك مثلث الجبنة النستو بالسن بتاعه طالع نازل يفتح الصباب ويقفل بالسوستة لازم بقى المسافة مابين العمود ( قصدى مثلث الجبنة) تكون مريحة لما يكون السن بتاعه لفوق ولو مشكده بتروح للخراط بيشيل الأطباق بطريقة هو عارفها ويغيرها ويظبط الخلوص( المشكلة بقى يا كبير انك لازم تروح بدرييييي عند الخراط وتفتح كبوت العربية فى حته ظله وتبرد العربية تلج علشان يظبط الخلوص صح وماتبقاش محمله ولا مهوية لأنى زى ما قلت لو محملة هتاكل مثلث الجبنة النستو - تاكل بنزين - تهرب زيت لغرف الحريق لو ضغط الزيت جامد _ وبلاوى تانية كتير ) ربنا يكفينا شر التاكيهات أشكال تانية برضو كنت عاوز أقولك عليها النوع ده فى الهوندا الأكورد بحبه جدا لأنه يجمع مابين قوة العزم وسهولة الظبط ولو مش واضح إسألنى هتلاقى الشكل ده برضو فى بعض العربيات الصينى بس الفرق بقى شكل المثلث فى عمود الكامة مختلف لأ كمان ده بيضاوى وشايف المسمار اللى بصامولة الصغير ده اللى بتظبط التاكيهات منه شايف الجمال والسهولة وفى نفس الوقت برضة قوة العزم انا ما بحبش الحال المايل ، بس الكامة المايلة برضو ليها عيوبها وميزاتها ( مواتير شعبى بـ1800 جنية الموتور بالفتيس) والشكل ده فى معظم مواتير ال131 الشعبى ومواتير البولونيز ( مع ان اخر موديل للبولونيز كان نازل 2003) بس فكرته حلوة برضه عمود الكامة تحت ومايل كده ومتوصل بالكرنك وكاتينة(سير) كاوتش مسنن أو كاتينة جنزيز ( علشان كده يقولك المواتير الكاتينة الجنزير خشنة ) عمرها قصير المواتير دى من يومها إتفرج بقى معلش طولت عليك شواكيش شواكيش شواكيش هنا بقى الشواكيش طالعة نازلة بحركة العمدان الإستيك الرفيعة Pushrods اللى تحت دى بتاخد الحركة من تحت عند عمود الكامة ( الكامة السفلية اللى قلتلك عليها ودى سهلة اوى اوى فى ظبطها مفك وبنسة وفيلر اهو كمان شكل تانى ونفس الفكرة إن شاء الله هدعم الموضوع بكام فديو كده لما ربنا يسهل اللى يحب سيدنا النبى عليه الصلاة والسلام يدعيلى و يعمل لايك الموضوع مش منقول وحاولت بقدر إستطاعتى انى اوضح وبإذن الله هنفضفض تانى وإلى لقاء قريب

رابط قديم
http://www.masrmotors.com/vb/showpos...88&postcount=4
: 12A96E~160:

[miam0502788391]

كل الشكر للأخ الكريم هشام الجزار على الشرح الوافى
جزاك الله خيرا و جعله الله فى ميزان حسناتك
سؤوال : التاكيهات يتم ضبطها صيفا وشتاءا لكن الميكانيكى اللى كنت بتعامل معاه بييقول انا بظبط تظبيطة واحده , يعنى تنفع للصيف والشتا
هل ده صحيح وسليم من الناحية الميكانيكية ؟؟

[Hisham.Elgazzar]

المشاركة الأصلية كتبت بواسطة miam0502788391 كل الشكر للأخ الكريم هشام الجزار على الشرح الوافى جزاك الله خيرا و جعله الله فى ميزان حسناتك سؤوال : التاكيهات يتم ضبطها صيفا وشتاءا لكن الميكانيكى اللى كنت بتعامل معاه بييقول انا بظبط تظبيطة واحده , يعنى تنفع للصيف والشتا هل ده صحيح وسليم من الناحية الميكانيكية ؟؟

فعلا يا دكتور فى ناس بتظبط ظبطة وسط تمشى مع حضرتك صيف وشتاء
لكنبتفرق برضو حسب نوع العربية ، بالكيلومتر
او لحالات معينة زى تغيير جوان الوش بتمشى بالعربية شوية وبعدين بنوقفها نعيد تربيط على الوش ونظبط تاكيهات تانى

وده بيختلف من سيارة لأخرى ومن ميكانيكى للآخر

[bebonet]

الله ينور يا باشا