استفسار بخصوص تغير ماء الردياتير

[MITSUBISHI MAN]

أنا معايا لانسر 2006 ماشيه 57 الف كيلو
وانا بمون العربية من كالتكس عملولي كشف على ميه الردياتير والراجل قالي انه الميه عايزة تتغير لانها قديمه وفيها شوائب ورواسب

أنا مغيرتش الميه من يوم ما جبت العربيه ولا حتى نقصت وزودتها ... يعني تقدروا تقولوا مفتحتش الردياتير ده قبل كده اصلا

هل فعلا ميه الردياتير دي بتتغير كل فتره معينه ؟ و لو حبيت اغيرها اجيب نوع ايه ؟ واللانسر بتاخد كام لتر ؟

[tham1010]

أنت بتحط ماية خضراء ولا ماء عادى؟

فى حاجة أسمها تنظيف ريدياتير وهى بتكون بتفريغ الريدياتير من الماية تماما من خلال الحنفية الموجودة أسفل الردياتير وبالخرطوم تحط الخرطوم فى فتحة الردياتير من فوق وتسيب الماية تغسل كذا مرة. فى ناس بتستخدم مواد تنظف بيها. وبعد ما تخلص الحكاية دى تسك الحنفية وتحط الماية الخضراء. الماية الخضراء عادة لا تتسبب فى الرواسب ولكن محتمل مع المدة الطويلة يحصل صدأ. أعتقد تنظيف الريديايتر كل كام سنة يبقى كويس.

[RenaultMan]

الراجل دا نصَّاب و لو طاوعته ، كان باع لك ماء الرادياتير ، نصف اللتر ب 20 جنيه و هي كلها ممكن تتعمل ب 60 جنيه - 80 جنيه بالإكراميات و أقنعك إنه بيعمل غسيل رادياتير ، أنا حصل معايا الموقف دا بالضبط مع سيارة Renault Megane- Caltex 6 أكتوبر ، داخل أملأ بنزين ، قال لي ماء الرادياتير محتاج تغيير ، رغم إن العربية جديدة و متغيَّر ماء الرادياتير قبل كدا في توكيل بيجو.

[محمد فيصل]

ماء الرداتير الاخضر من النوع الاصلى او الموجود فى السيارة اصلاً
لابد من تغيرة على الاقل كل 30الف كم /سنتان ايهما اقرب
لان بعد عدد الكم او المدة الزمنية تفقد مياة الرداتير المعالجة خواصها وبالتالى تصبح مثل ماء الحنفية
وتسبب الاضرار المعروفة
عليك بشراء جالون ماء اخضر من موبيل وتغير الماء فى مركز الصيانة الذى تتعامل معه او عند اى ميكانيكى تثق فيه

[sameh2555]

ماية الريداتير مابتغيرش الا لو الميكانيكي عملك شغل في المحرك وساعتها بتشتري 4 لتر ميه مقطره - او لو عندك تكييف ميته ممتازه للعربيات لانها مبتعملش اكسده - او اشتري 4 لتر ميه معدنية وهتفي بالغرض