تووووبه ان أجرت عربيه تاني (مشكله كبيره)

[shadowmaster]

ربنا يسترها معاك ويخلص الموضوع على خير ان شاء الله

[horas3000]

المشاركة الأصلية كتبت بواسطة Rekaa ماضيلو علي وصل امانه وعقد ايجار العربيه والعربيه مشيت حوالي 70 كيلو

زي ما توقعت و هو ده اللي كنت خايف منه
و طبعا وصل الامانة بتمن العربية و اكيد لسه ما اخدتوش
للاسف انت مضطر تسايسة عشان هو اللي موقف القوة
و راي حاول تديلوا اي مبلغ و تخلص من الموضوع ده
و بعد ما ربنا يعديها لك علي خير ان شاء الله واجبك تعملة سمعة و تصيلتله و تعرفة ان الله حق و ان النصب مش هيبفعه
و متخليش واحد نصاب و حرامي زي ده يمنعك من حاجة و مش عشان حتة كلب طمعان في كام جنية هيطلعوا حار و نار علي جتتة و لسه حسابة عند ربك تقول مش هأجر تاني.

الله يكون في عونك و بقي طمنا

[@واحد من الناس@]

بص حضرتك هيه الإيجار ده غالبا يا تضحك على اللي مؤجر يا تضحك على المستأجر نادر لما تلاقي ناس محترمة في الشغلانة دي أنا علمت الحوار ده ثلاث مرات في حياتي
الأولي فيرنا موديل سنتها لسه متكيسه قالي العربية دي ومكنتش أنا اللي ماضي الشيك كان واحد صحبي قرص على العربية وحكت منه جامد ودفع 200جنية فوق سعر الإيجار وكان إنسان محترم جدا

تاني مرة في فرح وحبيت أوجب نزلنا أجرنا بس لما روحنا كان اللي باعتنا للمكتب عضو مجلس شعب عندنا أول ماروحت للراجل قلتله المهندس فلان هوه اللي باعتنا فقالي بجد سلملي عليه طيب فوت علي العصر أسلمك العربية قولتله ليه مهو عندك راكنه بره لانسر أهيه قالي لا اللنسر اللي بره دي بيني وبينك أنا مضمنهاش دي طالع عينيها دي ممكن تفصل منك أي حاجة فيها وأنت اللي تلبسها لا بص أنا هديها لواحد تاني أما أنت تعالي العصر وأنا هديك عربية زيرو

المرة الثالثة أجرت من واحد محترم جدا ولحد دلوقتي لو حبيت أأجر عربية بروحلة الراجل إبن ناس ذوق في المعاملة سلمني ماتركس وقالي بص العربية فيها كذا وكذا بايظ وكذا قريب هيبوظ يعني الكلام ده تبعي أما بقيت العربية سليكة قلتله شكرا ومشيت قضيت مصلحتي ومشيت بيها زيادة عن ما كان محددلي رجعت ركنتها تحت البيت طلعت خدت دوش و إتعشيت وقلت أروح أسلمها نزلت لقيت واحد محترم خبطي الإكصدام اللي بالخلف خدت العربية و غسلتها في المغسلة واإطمنت على كل حاجة فيها تمام وروحت مزود الميه وبنزين و روحتلة قولتله مفاتيح عربيتك بس قطع الشيكات الأول قالي تمام أهيه قولتله إطمن على العربية لا لا خلاص باين مفيش حاجة قولتله لا ركز كويس فضحك وقالي هوه في حاجة أه الخبطة دي لا بص أنا راجل محترم ومقبلش على نفسي قرش حرام رشيتها ب20 جنيه أ{بعين في الرنج ده بص سيب عشرين وخلاص قولتله بس قالي بس قولتله يعني مش هتقولي أغير إكصدام ولا الكلام ده قالي لا طبعا ليه يعني ده نصيبها وخدته

سا عتها بس قارنت بينه وبين النصاب الأوالاني الأكثر نصب منه التاني وقولتله ربنا يباركلك ويكثر من أمثالك قالي الله يخليك مشيت من عنده بس خدت قرار مش أهجر بعد كده غير عربية بسواق تبع المكتب المؤجر عشان حتي لو أنا سواقتي حلوة ممكن واحد غبي يخبطهالي حتى وأنا راكن زي محصل معاية وكان ممكن يدفعني دم قلبي بس الحمد لله ربنا ستر

أخر حاجة حل مشكلتك تطلع على القسم وتجيب ضابط محترم معاك وتقوله التالي بص يا باشا انا مأجر رجعت العربية سليمه خدها وغاب جوه ومجبش الوصل ولحد دلوقتي بيذلني بيه وبيتبلي على ومتجيبلوش سيرة الدخان والكلام الفاضي ده وبص الموضوع لو فضلت ماشي فيه كده كل شوية هيطلعلك بلوة فيها خش شمال علطول إنشاله تجيب بلطجيه يخدو الوصل بالعفيه ودي غلطتك و إعذرني لازم تعترف القانون لا يحمي المغفلين يعهني تحاول بطرق ملتوية تاخد الوصل لأنه غلط يفضل معاه إنشاله تجيب ظابط يلبسه أي قضيه وتقرفه وتاخد منه الوصل واللي حصلك ده حصل لإبن عمتي وجاب إتنين رجاله محترمين وراحوا عملو حوار على الراجل وخد منه المفتاح بتاع العربية وخد روحوا بيها وخبوها لحد مكبر الموضوع راحوا القسم الضابط قال العربية مقابل اتلوصل وإنسي كل حاجة تانية وعدت على خير الحمد لله

[homosh]

علي فكره يا باشا ده نصاب وبلطجي وكلهم كده بصراحه الا من رحم ربي مقابلتش منهم غير واحد بس محترم وكان رائد شرطه بس كان فاتح مكتب ومخللي ابن اختو يديرو وكانو ناس فس قمة الادبfficeffice" />
االموقف بتاع حضرتك ده انا كنت فيه من خمس سنين كنت لسه في مصر وكان عندي شغلانه في الفيوم لازم بس عايزه لف من المحافظه للمركز وكده فأجرت عربيه هيونداي اكسيل موديل 96 ودي الوحيده اللي رضي يديهالي عداد مفتوح عشان كده اختها طبعا انا استلمتها 12بليل قالي ارجعها الساعه 6 ووافقت
نزلت من الفجر خلصت كل حاجه وأتأخرت نص ساعه لانو سفر طبعا وبعد كل المشاوير دي تليفوني فصل شحن طبعا البيه بيكلمني والتليفون مقفول راح واخد العنوان من البطاقه وراحلي البيت وسأل عليا قالولو مسافر بعدها كلموني في البيت علي تليفون الشخص اللي كان معايا وقالولي روحتلو شايط ومش شايف قدامي وزعقت فيه ورمتلو المفتاح في وشو قاللي عايز اجرب العربيه قولتلو خمس دقايق تبقي قدامي عشان عايز اخرج من المكان ده ....
غاب ساعه الا ربع كامله لانه راح يوديها لميكانيكي يكشف عليها وجالي قالي العربيه سخنت منك وممكن يكون وش السلندر ضرب وممكن وممكن ساعتها طبعا كنت انا خلاص جبت اخري من كل الليه حصل مش دخلت في شمال انا كنت هحطو تحت التاير بتاع العربيه وادوس عليه قولتلو الشيك قاللي لما نشوف العربيه طبعا انفجرت فيه تاني ولما عرف ليا خال رئيس محكمه مع شويه الشتايم اللي اخدهم اتحولت التكشيره اللي في وشو لابتسامه وطلب شاي ودخلت السكرتيره بالشاي ومعاها الشيك واخدتو واديتو الكلمتين اللي فيهم النصيب وانا خارج مع العلم ان حكايه ليا خال رئيس محكمه دي غير حقيقيه بالمره بس سير الموقف اضطرني اقول كده مع الدخله اللي دخلتها فيه وده اللي كن المفروض تعملو من الاول بس ملحوقه خللي المعامله معا ناشفه جدا ومتديلوش وش وجمد قلبك هوا اللي يهمو انو يقفش فلوس مش انو يودي الشيك النيابه . اخرو بيحط الشيك في الخزنه حتي لو مدفعتلوش حاجه
اهدي كده و اطمن واتصرف بالعقل وحاول تدخل اي حد كبير في الموضوع بس طبعا ميكونش والدك يعني ولا عمك عشان ميتبهدلوش مع الاشكال دي اقصد ابن عمك ابن خالتك او حتي واحد صاحبك ويعملو معمله جامده شويه وبلاش يا باشا وحضرتك دي وان شاء الله قريب هنلاقيه كاتبلنا ان الحوار خلص,,,... بس متعملهاش تاني

[Rekaa]

لسه الموضوع شغــال

ياشباب انا عندي 19 سنه يعني لسه قاصر

الاخوه المحاميين الي معانا بالمنتدي

لو رفع الشيكات ايه الي هيحصل؟