مساعدة ومشكلة فى النور العالى والرعاش فى لانوس 2012

[iaman]

المشاركة الأصلية كتبت بواسطة احمد سويلم احمد ربنا انها جت فى الدراع لان دلوقتى العربيات الجديده اصبحت كلها عيوب والله

الأخوة الأفاضل فى المنتدى :

الحمد لله قمت بشراء لانوس 2013 و هى اصبحت شيفورليه كما يعلم الجميع و للأسف فوجئت باشياء لم اكن اتوقعها . العربيه منذ استلامها و بعد السير بها 350 كيلو و بدأت اشعر انها مراجيح هوائية و ليست بسيارة و زادت دهشتى عند الضغط على الفرامل شعرت بارتجاج فى كامل السيارة و اهتزاز غريب
و بالمصادفة اكتشف ابنى الصغير ان السقف من الأمام عند نهايته به عيب تشطيب و غير محكم التقفيل و هنا طلبت منه ان يقوم بالنظر الى نهاية السقف الخلفيه ايضاً و للأسف وجد انه غير محكم التقفيل ايضاً
بمعنى آخر (مفكوك من الأمام و الخلف ) و شراشيب القماش المقصوصه نازله منه . و بما ان العربيه جديده كنت رايح اشترى دواسات جديده طبعا و عند التركيب اكتشفنا ان الموكيت بتاع الأرضيه ناقص . بمعنى آخر

نهايتة عند البدال بتاع الفرامل و البنزين و قابب لبره بتاع 10 سنتى و متقفل ولا كأنه تحت الكوبرى

قولت ما بدهاش انا اروح على التوكيل و اعملهم فضيحة و للحق عندما ذهبت للوتكيل اللى فى شارع الطيران الناس متأخروش و قالولى نكشف و نشوف ايه مشكلة الفرامل طبعا الكلام ده من الساعه 8 و نصف صباحاً على بال ما حضر السيد الدكتور اللى هيكشف على العربيه و ياخدها فى تجربة قياده مأساوية رجع التوكيل و قال دى طنابير اماميه عايزه تتغير . هنا انا اندهشت و قولتله معقوله عربيه عامله 350 كيلو و تقولى طنابير طبعا كنت متضايق جداً ازاى عربيه جديده و يطلع فيها ده . المهم رضخت للأمر الواقع و تم تغيير الطنابير الأمامية و خرجنا فى تجربة مأساوية مره اخرى ( اللى كان بيسوق اظاهر نفسه كان يبقى سواق فى رالى عربيات ) و العيب برضه موجود و بعد تجارب عده قام قايل لا ( دى الطنابير الخلفيه هى اللى عايزه تتغير ) هنا اصابنى الذهول و قولت حسبى الله و نعم الوكيل

يا عالم اذاى اساسا عربيه تطلع من المصنع بالشكل ده و الأخ اللى بيقوم بلصق الملصق (FINAL OK )
بيلزقه على اى اساس ، و اذا كان موظف الجوده المسئول بيعمل كده امال العمال و الصنايعية بيعملوا ايه . المهم احب اقولكو ان التوكيل قالى للأسف الطنابير الخلفيه غير موجوده و هنكلمك اول ما تيجى عشان تيجى تغيرها. و ده بعد يومين

انهرده صحيت من بدرى . بدرى قوى و شديت الرحال على توكيل منصور شيفورليه اللى فى الهرم (انا فى مدينه نصر)
وصلت على الباب الساعه 8 و نص الأمن سالنى فى حجز قولتله لأ بس هيبقى فى حجز ليكم انتم (كنت شايط على الآخر) و طلبت اقابل اى مسئول المهم قابلت شخض مهذب اسمه المهندس محمد مش عارف باقى اسمه حكيتله على اللى حصل قام امر بدخولى و اول حاجه عملها ودانى ورشه الأصلاحات الخاصه بالسروجى (الفرش و ما الى ذلك) ندهو على اسطى من الأسطوات جه بص على الأرضيه قالى يا بيه عادى دى لسه مطبعتشى !!!!! قولتله ايه !!! هى ايه اللى مطبعتشى .. هو انت يتكلم واحد كان سايق كارو مثلا ً و دى اول عربيه فى حياته !!! بقولك الأرضيه قصيره و مش كامله لآخر الصدر من تحت بالضبط زى واحد طويل قوى ولابس بنطلون قصير قوى !!! هنا اتدخل المهندس المسئول عن الورشه و قال عندك حق يا بيه ، قولتله طيب و السقف اللى مفكوك ده قالى لأ ده برضه عندك حق فيه و هناك برضه جربه العربيه و خرج معايا واحد يسوقها و يجربها بس المره دى كان حنين و كويس فى سواقته و كان تقريره كالتالى

العربيه بتحدف شمال .. طارة الدركسيون معوجه يمين ... العجل محتاج ترصيص ووجود رعشه مع الفرامل اللى هيا الطنابير . ارضيه الدواسه مقصرة من قدام .. السقف ساقط من الأمام و الخلف و فى انتظار العرض على مهندس المصنع .

و طلبوا منى اسيب العربيه على ان اتصل بهم غداً لمعرفة ميعاد الأستلام سبت العربيه بالكامل بما تحتويه و خرجت من عندهم و انا محتاس هروح ازاى و انا كلى اصرار بمجرد وصولى اكتبلكم على اللى حصل عشان تاخدوا بالكم و تأكيداً على ان شيفورليه لانوس ولدت لتموت فى ذات الوقت .

احب اوضح لحضراتكم انى كنت امتلك دايو لانوس موديل 2007 و بعتها عروسه و الله و لم اذهب للتوكيل او عملت فيها اى شيء غير الصيانات الدورية العادية على مدار 5 سنين حتى عام 2012 و قررنا نبيعها و جبنا شيفورليه اوبترا .اوتوماتيك . هتقولولى طيب و تنزل من اوبترا اوتوماتيك و تجيب لانوس شيفورليه هقول اتقلبت رابع يوم رمضان الماضى و بعتها خرده و الحمد لله على كل شيء

انا حبيت انقل تجربتى ليكم عشان كل واحد ياخد باله و مستنى اشوف نتيجة الأصلاح ايه لأنى ناويلهم على نيه سوده .. و هشتكيهم فى جهاز حماية المستهلك . و هعلقلهم ورقه كبيره قوى على العربيه من ورا ان لانوس شيفورليه عربيه زباله و توكيلها ازبل و بيدور على الربح من خلال وضع مكونات غير مطابقه لمواصفات الجوده و رخيصة

بصراحه ندمت اشد الندم على شراءها و منصحشى حد يجيبها ولو بتفكر فى لانوس يبقى دايو مستعمل برقبتها و الأحسن تبعدو عن شيفورليه خالص لأنه بكده بيفقد مصداقيته

و اللى حابب يتابع حصل ايه معايا انا موجود .. و ماتنسونيش بالدعاء

[citroeen]

بشكر كل واحد شارك فى الموضوع وحاول يساعد فى الحالة الى عندى فى النور العالى والرعاش ويمكن فى ناس عندها بردة مشاكل فى اى عربيية تانية جديدة بردة مش لازم الانوس بالاخص وياريت بس كنت عايز اقول ان بجد ان التوكيل محترم جيدا وشهادة حق اقولـــــها قـــــدام ربنـــا ومش بيتأخروا على حد ودى الصراحة الى اقولها وانا روحت توكيل الصحراوى وهو التوكيل الرئيسى لمنصور شفرولية واوبل بس قبل ما اروح حجزت قبل ماروح بيومين وقولت امشى بأنتظام زى ما التوكيل بتاع شارع التحرير قالى و احجز قبل ماروح وكلمتهم فعلا ورحت بعد يومين _ الحجز لازم يكون بعد 48 ساعة يعنى متصلش وتانى يوم تروح لازم وقت عشان فى ضغط جامد فى التوكيل_ عمتا مش مهم بردة غصب عنهم لان كمية العربيات الى فى الشفرولية فى البلد كتيررررررة جيدا ورحت وفعلا لاقيت اسمى متسجل على الورقة برة ودخلت وقبلت مهندس جورج وبجد انسان محترم جيدا وقولتلة على مشكلة النور العالى والرعاش مش شغال قالى متقلقش كلة هيبقى تمام وقالى سيب العربية عقبال ما هنكلمك وقالى يومين كدة قولتلة مش كتير يومين على نور عربيية بايظ قالى لا احنا مش هنظبط حاجة احنا هنغير الدفيرة بالكامل بالدراع والمهندس قالى بصراحة سيب وقتهم لان كهربة العربيية مهمة جيدا وعايز عناية خاصة قولتلة خلاص يا مشمهندس انا تحت امرك وكلمنى لما تخلص قالى عنيا الاتنين ..... وروحت البيت ويوم وتنين ولقيت المهندس بيكلمنى وبيقولى كلة تمام وغيرنا كل حاجة وتعالا اتفضل استلم العربيية وقولتلة حاضر و متشكر جيدا وبكدة واخدة يومين تصليح قولت مش مشكلة طلما عندهم ضمير المهم روحت لقيت العربيية مركونة فى الجراج وكلة تمام ورحت الخزنة بصراحة انا قولت هدفع فلوس حتى لو كان رمزية لان وانا بستلم التقرير كتبين تغير دفيرة بالكامل ودراع نور فاقولت دة شكلة هدفع مبلغ لان اسمع فى توكيلات تانية بيدفعوا الناس حتى لو كان فى الضمان بالصدفة الراجل بقولة كام ضحك وقالى عيب عليك اكيد و لا مليم انتا فى الضمان وبصراحة استريحت لان ياما سمعت حورات على توكيلات منصور و غبور وغيرهم فى المنتديات الى انا دخلت وشوفتها فى حياتى وفعلا روحت استلمت العربية من الجراج و الحمدالله كلة اتظبط ونشكر ربنا ونحمدة وبصراحة لما شوفت التبلو بتاع العربيية انا قولت هيبقى باين نكة مفكوك متخربش وحلتة زى القرف بصراحة و لا أبرة فى و لا خربوشة و لا اكنة شالوة وهى دى حكيتى مع المشكلة ... وحكاية تانية وانا ماشى من التوكيل ودى المفاجاءة وانشاءالله هكتبها فى موضوع لوحدها