عملت حادثة وعايز إصلح عربيتي

[Ahmedosama123]

يا جماعة انا عملت حادثة علي الدائري والحمد لله على كل شيء، بس دلوقتي عايز أصلح العربية مش عارف ابدا منين ولا اروح فين ، انا عارف انها هاتكلف فعايز حد يقول لي التكلفة المبدئية للعربية لو عشان اعرف معايا يكفي ولا ايه ، وياريت لو يفيدنا عن سعر ماتور اللانسر 1300 ، واجيب ربع علي بعضه ولا ايه !! مع العلم العربية من اول باب لغاية الشنطة سليمة وبتقفل، والشاسيه من تحت سليم لان الخبطة كلها من فوق ،أدام بقي زي ما انتم شايفين

[AbOnOrA]

الف سلامة عليك يا احمد باشا قدر الله وماشاء فعل .. ان شاء الله بسيطة انت تقريبا دخلت بوش العربية تحت عربية نقل قشطت الوش كده
مبدئيا احنا محتاجين نغير كبوت وجوز رفارف (( الصور مش مبينة الجنب اليمين اخبارة ايه )) بس حسب كلامك من اول الباب الدنيا سليمة وتحت تمام
فاحنا هنفك الرفارف والكبوت ونرفع الموتور ونشوف حالة الحوض لو تمام او محتاج زراجين خفيفه يبقى مش محتاجين نجيب ربع ولا حاجة
المكنة برضو ممكن متكونش بالسوء اللى باين من الصورة ممكن بعد ما تتحل تغير قواعد وشوية اكسسوارات وتبقى الدنيا تمام
انت بدايتك مع السمكرى اللى هيفور العربية والميكانيكى اللى هيبص على المكنة ولازم الاتنين يكونو ولاد حلال ويتابع معاهم حد فاهم علشان ميعملوش عليك شغل ويفتحولك الدنيا
الاسعار كل يوم بحال دلوقتى فمحتاجة لفة فى الحرفيين وفصال جامد بس لما نعرف الحالة ايه بالظبط وايه اللى هنشترية

ان شاء الله بسيطة وقضى اخف من قضى شوف بس الاول السمكرى اللى هيشتغل مين ورايه ايه وهنتابع معاك ان شاء الله ولو عايز سمكرى قولى ابعتك لحد تبعنا

[Ahmedosama123]

المشاركة الأصلية كتبت بواسطة AbOnOrA الف سلامة عليك يا احمد باشا قدر الله وماشاء فعل .. ان شاء الله بسيطة انت تقريبا دخلت بوش العربية تحت عربية نقل قشطت الوش كده مبدئيا احنا محتاجين نغير كبوت وجوز رفارف (( الصور مش مبينة الجنب اليمين اخبارة ايه )) بس حسب كلامك من اول الباب الدنيا سليمة وتحت تمام فاحنا هنفك الرفارف والكبوت ونرفع الموتور ونشوف حالة الحوض لو تمام او محتاج زراجين خفيفه يبقى مش محتاجين نجيب ربع ولا حاجة المكنة برضو ممكن متكونش بالسوء اللى باين من الصورة ممكن بعد ما تتحل تغير قواعد وشوية اكسسوارات وتبقى الدنيا تمام انت بدايتك مع السمكرى اللى هيفور العربية والميكانيكى اللى هيبص على المكنة ولازم الاتنين يكونو ولاد حلال ويتابع معاهم حد فاهم علشان ميعملوش عليك شغل ويفتحولك الدنيا الاسعار كل يوم بحال دلوقتى فمحتاجة لفة فى الحرفيين وفصال جامد بس لما نعرف الحالة ايه بالظبط وايه اللى هنشترية ان شاء الله بسيطة وقضى اخف من قضى شوف بس الاول السمكرى اللى هيشتغل مين ورايه ايه وهنتابع معاك ان شاء الله ولو عايز سمكرى قولى ابعتك لحد تبعنا

ربنا يخليك ويصلح لك حالك والله ريحت قلبي عن الاول بس معلش كنت عايز اسئلك برضو ، العقل بتاع الماتور اللي بيكون في علبه خضراء وراء البطارية ده عامل كام لاني شايفه خلص