للاهمية:هل من مساعدة ؟ نفسى اظبط الكربيراتير بنفسى

[Mohamed,Allam]

بسم الله والصلاة والسلام على رسول الله

اخوانى الاعزاء
كل يومين تلاتة اروح عن الميكانيكى عشان يظبطلى الكربيراتير او ينظفة من البنزين الى مش نظيف ويأخد عشرين جنية فى حاجة ان شايف انها ممكن انا اعملها بنفسى بحاول اشوف هو بيعمل اية بالظبط ويعنى عرفت بعض الحاجات لكن بصراحة خايف اجرب ابوظ حاجة مع العلم انى مليش خبرة بميكانيكا السيارات خالص حيث انى اول مرة اشترى عربية قديمة معايا ريجياتا 85 فبرجاء الافادة للاهمية
بالتوفيق للجميع ....

[eng/walaaeldeen]

السلام عليكم
جرب مش هتخسر حاجه العمليه محتاجه شوية جراءه في الأول وبعدين هتلاقيها بسيطه
والله المستعان

[zing0]

بص يا باشا
أنا لما إشتريت العربية (من حوالى 9 شهور كنت مبعرفش أسوق و مأعرفش الفرق بين الكبوت و الإكصدام !!! يعنى لما الكبوت بيتفتح بأتفرج على شوية حديد و كابلات و خلاص)

أكثر المشاكل إللى بتقابل كل إصحاب العربيات القديمة هى ضبط الكربراتير و الكهرباء.
تنضيف الكربراتير معمول علية موضوع كامل بالصور, المهم حاول تجرب بإيدك. و لازم تتأكد أنك فهمت قبل التجربه يا إما تتراجع و تسأل , و هنا من فضل الله علينا عندنا مليون واحد يفيدك, ناس خبرة بجد.

ده موضوع لضبط الكهرباء
http://www.masrmotors.com/vb/showthread.php?t=94651

و ده عن الكربراتير
http://masrmotors.com/vb/showthread.php?t=25236


و ده كلام مفيد منقول من منتدى آخر

عمليات ضبط المغذى (الكربوراتير ) ========================= ===== 1-أربط مسمار الهواء حتى قاعدته للنهايه بهدوء ..... 2-فك المسمار مره ثانيه بمقدار 3 لفات .... 3- شغل المكنه وأدر مسمار البنزين حتى الوصول لأقل سرعه منتظمه ..... 4- أدر مسمار الهواء بمقدار 90 درجه للداخل (رباط يعنى ).... 5- فك مسمار الهواء مره تانيه بمقدار نصف لفه (180 درجه ).... 6- كده خلاص ظبطنا مسمار الهواء وملناش دعوه بيه .... 7- من خلال مسمار البنزين نظبط على السرعه اللى تعجبنا ( الرباط عليه تزويد سرعه .....وفكه العكس ). ....طبعا حنلعب فى مسمار البنزين للوصول للوضع اللى أحنا عاوزينه ( سلانسيه عالى أو واطى ). س - أيه اللى يحصل لو الخليط كان غنى أو فقيرا ج - الخليط الغنى يؤدى الى 1- زيادة سرعة السلانسيه 2- زيادة أستهلاك البنزين على السلانسيه 3- قد يحدث تهبيب للبوجيهات مع زيادة نسبة غنى الخليط (أذا زاد الشىء عن حده أنقلب الى ضده ) 4- لما ينقلب لضده والبوجيهات تهبب مع الغنى الفاحش .....حتقابلك صعوبه فى الدواره بعد كده وخروج عادم مسود مائل للبياض وقت الدواره الخليط الفقير يؤدى الى 2- عدم ثبات سرعة المكنه وقت السلانسيه 2- حريق هزيل وقت السلانسيه مع حدوث رعشه وأهتزاز بالمكنه وقد يحدث تبطيل للمكنه مع فقر الخليط الشديد 3- طبعا ده حيوفر معاك بنزين وقت السلانسيه .....ومن هنا نلاحظ لا الغنى مطلوب ولا الفقر مطلوب .....وكل اللى مطلوب الوسطيه وليس المثاليه لأن الوصول للمثاليه صعب جدا .....بل مستحيل فى كل الأحوال .....والكمال لله سبحانه وتعالى فقط

[Mohamed,Allam]

على رايك يا بشمهندس ولاء انا فعلا هجرب وان شاء الله مش هندم وبعدين بعد المعلومات القيمة الى قالهالى الاستاذ Zing0 والى بشكره عليها جدا من كل قلبى جعلها الله فى ميزان حسناتو ويعتبر ان كل قرش بوفرة من الميكانيكة الى هيخربو بيتى يعتبر كل قرش صدقة من غير ما يعرف تضاف الى رصيدة وشكرا لكم جميعا وهحاول اجرب وبعد فترة هقولوكو ان وصلت لحد فين
بالتوفيق للجميع

[Hisham.Elgazzar]

موفق يا محمد باشا وقريبا بإذن الله هعمل فديو تفصيلى عن تنضيف الكربراتير