عايز معلومات عن لادا اليكو

[الغزاوى]

شكرا على الرد بس عايز اعرف اقتصادية فى البنزين وقطع الغيار غالية ولا رخيصة وانا ادامى واحدة موديل91 اشتريها ولالأ

[tareksakr]

استهلاك البنزين هيبقي متوسط 016 ل 170 كيلو في الصفيحة داخل المدينة و200 كيلو خارج المدينة لو الكربراتير مظبوط
قطع الغيار الميكانيكية زي تيل الفرامل والسيور والعفشة كلها اسعارها معقولة جدا زي اللادا بالضبط وزي ما قلت قطع الغيار الخارجية زي الفوانيس والصاج متوفرة عند ناس معينة في اسكندرية والقاهرة زي حمدي لادا في شارع دمشق في مصر الجديدة الفيصل في الشراء هو الحالة العامة للسيارة لو حالتها العامة ممتازة زي الموتور والعفشة ومش محتاجة مصاريف كتير يبقي توكل علي الله واشتريها

[الغزاوى]

الشكر الجزيل لطارق باشا على الاهتمام والرد

[Dr. Shanawany]

الأليكو مع والدي من زمان
العربيه لو حالتها كويسه وموتورها كويس هاتها
العربيه عزمها حلو وبتشد كويس جدا
عيبها زي ما اتقال في عدم توفر بعض قطع الغيار الخارجية
لو حضرتك بره القاهره منصحكش بيها
الصنايعيه هيبهدلوها لإن صنايعيه كتير مش هيرضوا يلفوا على قطع غيارها
مشكله كمان إن التابلوه بتاعها بيتهز جامد وانتا سايقها
لو جبتها انزل بيها لسروجي كويس يبطنلك التابلوه
العربيه كويسه
لكن شوف ميكانيكي كويس جدا يكشفلك عليها
لان اغلب اللي بيجيبوا اليكو بيركبوا فيها قطع غياؤ مش بتاعتها
فلازم يتكشف عليها كويس وتتأكد من القطع اللي فيها
لإن دا هيفرق في سعرها جاااامد
واهم حاجات تتاكد منها حاله الموتور
والصدأ
وربنا يوفقك فيها إن شاء الله لو كانت كويسه

وياريت تقولنا مطلوب فيها كام والموتور كام في الميه

[Dr. Shanawany]

أعتذر
نسيت أقول لحضرتك أهم حاجه
الأليكو صاحبه أتقل دركسيون في مصر كلها
أتقل أتقل بجد
دركسيون أتقل من الـ 128 ومن اللادا ومن الدوجان ومن الشاهين
أنا جربت دا كله وبجد مفيش أتقل من الأليكو
أنا لما أنزل بيها مشوار لازم أروح دراعي بيوجعني من الدركسيون
فيه ناس متفرقش معاهم النقطه دي
بس فيه ناس تفرق جدااااا
بالذات لو حضرتك متزوج وفيه مدام ممكن تسوق العربيه
في الحاله دي مستحيييييل
أنا قلت أقول لحضرتك وحضرتك تحدد أهميه المسأله