مساعدة عاجلة في شراء فيرنا

[Tota El Masry]

المشاركة الأصلية كتبت بواسطة dr_eslam_66 هنا على امنتدى كان فيه عضو وشغال في قسم المبيعات جديد وكان بيقول عن إني فيه زيادة متوقعة بحدود 3000 جنيه على بعض موديلات الهايونداي. بالنسبة للأكسنت مش حلوة أوتو لأنها قديمة قوي والمستعمل في الأوتو مش مستحب. الفيرنا عين العقل صدقيني بالنسبة لطلباتك منها. وبالتوفيق إنشاء الله. لو تلحقي تخلصي ورقك بسرعة مع البنك هيكون أفضل إنتي اولى بأي زيادة منهم. وشجع المنتج الوطني براحتك حتى بعد الزيادة بردو.

أكيد بإذن الله يا دكتور إسلام
جزاكم الله خيراً
أكيد المنتج المصري أفضل على الأقل فاتح بيوتنا و إلا كلنا حنستورد كل حاجة و لا قدر الله حتكون بداية النهاية

و عند حضرتك حق دكتور إسلام
الأكسنت هي الفيرنا بس الخواجة بتاعها
و الزيرو أكيد أفضل يعني لما اشتري عربية زيرو و أحب أبعها بعد خمس سنين حيبقى عمرها خمس سنين لكن لما أشتري مستعمل و لو كان ألماني و لا ياباني مش كوري حيكون عمره + 5 سنين يعني خسارة فوق خسارة بيع السيارة

نسألكم الدعاء لأختكم توتة بإن ربنا ييسر لها الحال في موضوع السيارة و يعطيها أفضل حاجة أنا صليت استخارة و طلب الحاجة و فوضت أمري لله تعالى في موضوع العربية

أنا خلااااااااااااااااااااااص دماغي صواميلها فكت و كل شوية حد يجيب مفك و يلعبلي فيها كل ما أستقر على الفيرنا ألاقي حد يقولي
بيكانتو أوتو هاف
صني مانيوال
بونتو كلاسيك
مع إني مشمن النوع إللي ممكن يغير رأيه بسهولة بس الكلام كثير

يا ريت مغاوير المنتدى الأفاضل يثبتوني على حاجة محددة في حدود 85 أو 88 لأني كده حكون بعت ثلاجة البيبسي بتاعت عم حسن إللي تحت البيت و استلفت حتى من سواقين التوكتوك إللي بركب معاهم
جزاكم الل خيراً يا أحسن أخوات في مصر موتورز

[Mr.Mamo]

طلبك عندي علي فكره

[ماء السماء]

ياااااه انتى حصلك نفسى اللى حصلى بالظبط
انا كمان عازه اجيب عربيه لكن بسبب الصواميل اللى بتقولى عليها مش عارفه اعمل ايه
اجيب زيرو واقسط يقولولى هاتدفعى كتير
اجيب مستعمل يقولوا عيوب المستعمل كتير من خساره فى اعادة البيع لمشاكل ممكن تقابليها فى العربيه خصوصا وانها اتوماتيك ويوم ماتقف مش هاتتحرك
ويجيلك اللى يقولك مافيش احسن من المستعمل سعر بسيط على امكانيات اكتر
الواحد اعصابه تعبت ووقفت محلك سر مابقتش عارفه اعمل ايه
سألت على الفيرنا الاتوماتيك طلعت ب 80 الف ولو جبتها تقسيط هاتعمل 98 الف طب ده مش حرام ولا حلال
طب انزل اجيب مستعمل تلاقى اللى بقولك المستعمل حرامى واللى يقولك هاتى نيو اكسنت مستعمل اتوماتيك ومش هاتندمى ابدا
مابقتش عارفه اعمل ايه

[Ahmed Salah ahmed]

الحمد لله انا معايا الفيرنا اوتوماتيك من 5/1/2011

ودي كانت العربيه الاولي ليا ، يعني اتعلمت عليها ، انا ماشي بيها لحد دلوقتي 35000 كم

عربيه زي الفل والحمد لله رب العالمين ماعطلتش مني ولا مره

الصيانه بتاعتها اي حد ممكن يعملها ولو في التوكيل برضه الاسعار مش غاليه اوي

يوم ما اشترتها كانت عامله 76250

بعد ما بعتولي عرض السعر للبنك برقم الشاسيه والموتور تاني يوم قالولي حظك حلو دي غليت 1000 جنيه

ودلوقتي باسمع انها بقت ب 79000 تقريبا

عربيه كويسه وابعادها واضحه جدا

الحقيقه برضه من فتره سمعت عن عربيه BYD اوتوماتيك برضه عفشه تويوتا كورولا وموتور متسوبيشي بيقولوا انها عربيه ممتازه واوبشن عالي خالص وشغاله تاكسي زي الفل

ربنا يشفيكي ويوفقك لكن نصيحه ابعدي عن المستعمل لو تقدري علي الزيرو

بنك ناصر لو دفعتي تقريبا 60% من تمن العربيه هتستلمي في نفس اليوم بدون ضامن وبدون تأمين وبفائده 6% علي 5 سنين او 7.5 سنه

[dr_eslam_66]

المشاركة الأصلية كتبت بواسطة Ahmed Salah ahmed الحمد لله انا معايا الفيرنا اوتوماتيك من 5/1/2011 ودي كانت العربيه الاولي ليا ، يعني اتعلمت عليها ، انا ماشي بيها لحد دلوقتي 35000 كم عربيه زي الفل والحمد لله رب العالمين ماعطلتش مني ولا مره الصيانه بتاعتها اي حد ممكن يعملها ولو في التوكيل برضه الاسعار مش غاليه اوي يوم ما اشترتها كانت عامله 76250 بعد ما بعتولي عرض السعر للبنك برقم الشاسيه والموتور تاني يوم قالولي حظك حلو دي غليت 1000 جنيه ودلوقتي باسمع انها بقت ب 79000 تقريبا عربيه كويسه وابعادها واضحه جدا الحقيقه برضه من فتره سمعت عن عربيه BYD اوتوماتيك برضه عفشه تويوتا كورولا وموتور متسوبيشي بيقولوا انها عربيه ممتازه واوبشن عالي خالص وشغاله تاكسي زي الفل ربنا يشفيكي ويوفقك لكن نصيحه ابعدي عن المستعمل لو تقدري علي الزيرو بنك ناصر لو دفعتي تقريبا 60% من تمن العربيه هتستلمي في نفس اليوم بدون ضامن وبدون تأمين وبفائده 6% علي 5 سنين او 7.5 سنه

أنا شايف الرأي دا متزن جدا وممتاز وعن تجربة واقعية وقريبة حتى لنفس الظروف.
شكرا يا اخي وربنا يباركلك في عربيتك إنشاء الله.