أنا كرهت جاك بسبب توكيلها ,, اللي عنده شكوى منهم يا ريت يكتبها هنا

[ahm2020]

السلام عليكم

أولاً وحشتوني بقالي فترة كبيرة مشاركتش معاكم

لكن أنا من كتر مابقيت بكره التوكيل بقيت مش عاوز أكتب علشان ماغلطش في العربية
و بصراحة وصلت لمرحلة إن أي حد بيسألني عن العربية بقول له إبعد عنها

توكيل مش بيعمل حاجة حتى في العيوب البسيطة المتكررة و قطع غيار مش موجودة و سوري يعني حاجة تقرف

أنا بستغرب هنعمل إيه لما العربيات دي تقدم و تحتاج صيانة وقطع غيار باستمرار

مع احترامي لكل اللي بيحب العربية دي و بيدافع عنها
أنا رأيي غير كده خالص ودي شهادة حق ,, لآني كل ما بروح التوكيل مش بشوف حد خارج مبسوط ولا حد راضي عن الشغل اللي اتعمل في عربيته

مع احترامي لجميع العاملين في التوكيل و خاصة مهندس رضا مدير التوكيل هو بصراحة راجل قمة في الأخلاق و الأدب لكن النتيجة في الأخر إن محدش راضي عن الشغل

أنا عندي مجموعة من الشكاوى كل ما أروح لازم أقول لهم عليها و مفيش حاجة بتحصل
و أكيد في عيوب من دي عند بعضكم
زي تزييق بسيط جداُ في التابلوة مع المطبات و الفرامل الجامدة ,, قالوا لي ده طبيعي
تزييق في الباب الشمال ورا السواق كل مره أقول لهم عليه و يعملوه و يرجع بعدها بكام يوم
ضهر كرسي السواق بيقع لو رجعت الضهر لورا وقالوا لي إن مكان الكلبسات مكسور و إن الضهر مش موجود
ومرة كنت عندهم و كان في واحد عنده صوت خبطة غريبة على ما أعتقد بتظهر في الملفات بعد ما قالوا له إنها حاجة تبع المساعدين و إنه لازم يتحمل تمنها لأن ضمانها خلص طلع الكتيب اللي فيه فترات الضمان ولقى ان المساعد ضمانه 6 شهور و هو لسة مكملش 6 شهور لما قال لهم كده دخلوا و خرجوا بعد شوية قالوا له احنا لقينا ان العيب مش من المساعدين ده من علبة الدريكسون و هي مش موجودة

و أخيراً بقى كشاف الإشارة الصغير اللي في المراية عندي الوش بتاعه اتكسر كسر بسيط هو مش مؤثر لكن بيدخل ميه جوا الكشاف و شكله وحش بيقولوا لي لازم أغير المراية كلها لأ و كمان المراية مش موجودة

وكمان نسيت أقول لكم إني لما استلمت العربية ,, استلمتها بمفتاح واحد و التاني قالوا لي هتاخدوا من التوكيل و انت بتعمل الصيانه ,, اكتشفت ان المفتاح التاني كان ضايع وهما طلعوا لي عليه ودفعوني تمن برمجة الريموت و خلوني أعمل السنون بتاعة المفتاح عند حد بتاع مفاتيح برة

ومرة لقيت زيت مبهدل الحتة اللي تحت علبة زيت الباور فكتبت في الورقة اللي بنملاها الأول قبل الصيانة إن أنا عندي تسريب زيت تحت علبة زيت الباور قام المهندس أسامة اللي كل الناس بتتخانق معاه ده طلع زعلان أوي بيقول ده غطا علبة الزيت مش مقفول كويس متقولش في تسريب, طيب ما هو أخر حد اشتغل في الغطا ده ومقفلوش كويس هما عمال الصيانة,

وطبعاً و أنا هناك بسمع حكايات كتير أكبر من كده بس أنا بكتب اللي شوفته بنفسي,

من الآخر أنا غير راضي عن العربية ولا مركز الخدمة يمكن لو التوكيل كويس كنت رضيت عن العربية لكن كده بصراحة أنا بقيت قلقان منها جداً يعني تخيلوا لو حاجة من اللي أنا قلتهم دول كانت موقفة العربية كنت عملت إيه, كنت ركنتها و قعدت جنبها ,,,



نيسان صني أو أفيو أو نيو أكسنت أحسن منها ولو اني عارف ان كلامي ده هيزعل ناس كتير,

[syd]

الله يكون في عونك يا باشا .. و في مصر
ياما ماركات اتخفست بسبب التوكيل ..

[ahmedchina]

و الله إحنا ملاك الجاك إتكلمنا قبل كدة فى الموضوع دة كتير ! المشكلة مش فى العربية العربية أكثر من ممتازة
التوكيل مش فارق معاه موضوع تجارة العربيات على ما يبدو
لا تطوير فى الاداء
أى مشكلة هى مشكلة العميل مش مشكلة العربية أو عيب صنايعى
كل حاجة طبيعى زى ما يكون راكبين العربية على طول زينا و عارفين إية طبيعى و إية مش طبيعى

[drasd]

السلام عليكم
العيب ليس في العربية كل اللي انت بتقول عليه بيحصل في الافيو وفي النيو اكسنت وممكن النيسان الفرق بين العربيات دي وبين عربيتك هو الصيااااااااااااااااانة ( ضهر الكرسي وباب بيزيق وتسريب زيت وكشاف مرايا ) ليست عيوب ماتور او نظام تعليق او فرامل او عيب يعطل العربية زي مانت كاتب انا مش بدافع عن مركز الخدمة انا شايف العيوب دي صغيرة في حق عربية كويسة زي الجاك بس انت متضايق من الحاجات الصغيرة دي لانها كتيرة وباينة في شكل العربية او مأثرة عليك وحاسس انك اخدت مقلب لان العربية مش منتشرة بس احب اقولك ان دا كان نفس احساس اول واحد اشتري عربية هيوانداي سنة 1994 واحساس اول واحد اشترى اسبرانزا سنة 2006 ( وشوف العربيات دي دلوقتي بقت منتشرة وقطع غيارعا عاملة ازاي دلوقت )ماتقلقش ان شاء الله الموضوع هايتحل بس ماتسكتش على حقك واتجمعموا مع بعض انتو كملاك وقدموا شكوى جماعية واطلبو تعويض مادي كبير عن الاضرار اللي انتم عانيتم منها وانكم هاتشهرور بيهم على صفات الجرائد وهاتبعتو للشركة الام تشتكو من سوؤ المعاملة وعدم الاهتمام وعدم توفر قطع الغيار وووو وإن شاء الله هايعمللكوا اللي انتو عايزينه ربنا معاك

[aymanlaw]

المشاركة الأصلية كتبت بواسطة drasd السلام عليكم العيب ليس في العربية كل اللي انت بتقول عليه بيحصل في الافيو وفي النيو اكسنت وممكن النيسان الفرق بين العربيات دي وبين عربيتك هو الصيااااااااااااااااانة ( ضهر الكرسي وباب بيزيق وتسريب زيت وكشاف مرايا ) ليست عيوب ماتور او نظام تعليق او فرامل او عيب يعطل العربية زي مانت كاتب انا مش بدافع عن مركز الخدمة انا شايف العيوب دي صغيرة في حق عربية كويسة زي الجاك بس انت متضايق من الحاجات الصغيرة دي لانها كتيرة وباينة في شكل العربية او مأثرة عليك وحاسس انك اخدت مقلب لان العربية مش منتشرة بس احب اقولك ان دا كان نفس احساس اول واحد اشتري عربية هيوانداي سنة 1994 واحساس اول واحد اشترى اسبرانزا سنة 2006 ( وشوف العربيات دي دلوقتي بقت منتشرة وقطع غيارعا عاملة ازاي دلوقت )ماتقلقش ان شاء الله الموضوع هايتحل بس ماتسكتش على حقك واتجمعموا مع بعض انتو كملاك وقدموا شكوى جماعية واطلبو تعويض مادي كبير عن الاضرار اللي انتم عانيتم منها وانكم هاتشهرور بيهم على صفات الجرائد وهاتبعتو للشركة الام تشتكو من سوؤ المعاملة وعدم الاهتمام وعدم توفر قطع الغيار وووو وإن شاء الله هايعمللكوا اللي انتو عايزينه ربنا معاك

كلام حضرتك تمام جداً,كما انى احمل صاحب الشكوى سبب كل مايحدث له من عدم اهتمام ,فكان يجب الا يستلم نسخة المفتاح الثانية بكل هذه السخافات التى يفتعلها هذا التوكيل وفوق ذلك يطلب من الأخ العزيز ان يذهب ويعمل هو الأسنان الخاصة بلمفتاح وكأنه يدفع ثمن احترامه لنفسه وانتظاره على ماهم يتكرموا ويفتكروا ان له حق استلامه النسخة الأصلية للمفتاح ولكن بكل بجاحة واسف على التشبيه (يعطوه بومبه ) ويسلموه مفتاح عمولة او بلغة السوق ,بلدى...كان يجب يااستاذى العزيز ترفض الأستلام وتضع كل هذه المهترات فى محضر لدى النيابة التابع لها التوكيل على مااصابك من ايلام نفسى ومعنوى وهو صدمتك فى سيارتك بأن يتعامل معك توكيل لبيع السيارات بمثل هذا الأسلوب العارى تماماً من المسئولية والحرفية فى تسويق سلعة مش اى حد يطرق مجالها ثم قلت سيادتك,والكلام لصاحب الموضوع ,انك قابلتك مشاكل أخرى من عدم الأهتمام بباقى الشكاوى او المشاكل التى قابلتك,وأهمها هو عدم توفر قطع الغيار على الرغم من ان السيارة لم تنتشر بشكل كبير ولم يتم استهلاك قطع الغيار حيث ان السيارة لسه جديدة فمنطقى ان تكون قطع الغيار متوفرة لقلة السحب على هذه القطع...
الخلاصة كما نوه الأخ العزيز الذى اتشرف بأقتباس رده المدرج عاليه,يجب ان نتحد جميعاً وقبل فوات الأوان على اتخاذ موقف ضد هذا التوكيل ولانسكت على اى تقصير يصدر منه تجاه سياراتنا ,كما انى اهيب باالأستاذ....احمد تشاينا بما ان سيادته له صلة بلصين عن طريق عمله ان يجد لنا آلية للأتصال بلشركة الأم وعرض الموقف عليها لأتخاذ الازم ,وعليه يجب علينا جميعاً أن نأخذ تليفوناتنا وذلك للتنسيق فى اتخاذ اى موقف خاص بهذا الموضوع ونوحد الهدف والمطالب,والله الموفق
الأسم:ايمن عبد المنعم محمد
الأقامة:بورفؤاد(محافظة بورسعيد)
السيارة:جاك b15 تاريخ الشراء 27 /5 /2010
التليفون:0186990980
واسأل الله التوفيق لنا جميعاً