الى اصحاب الخبرة | LADA 2107 VS FIAT 132

[anwss]

سلام عليكم يا شباب ، انا عضو جديد فى مصر موتورز ، اسمى انس من اسكندرية ، بما اني ان شاء الله هشتري عربية ، اشتركت فى الموقع عشان اكيد هزورو كتيير الفترة اللي جاية ونستفيد بخبراتكم القوية
نويت اشتري عربية ، لكن محتاج نصيحة منكم | اشتري لادا 2107 ولا فايت 132 ؟؟ مع ذكر العيوب والمميزات فى النوعين .
وشكرا جزيلاً لكم ... تقبلو تحياتي

[أيمن الروبي]

المشاركة الأصلية كتبت بواسطة anwss سلام عليكم يا شباب ، انا عضو جديد فى مصر موتورز ، اسمى انس من اسكندرية ، بما اني ان شاء الله هشتري عربية ، اشتركت فى الموقع عشان اكيد هزورو كتيير الفترة اللي جاية ونستفيد بخبراتكم القوية نويت اشتري عربية ، لكن محتاج نصيحة منكم | اشتري لادا 2107 ولا فايت 132 ؟؟ مع ذكر العيوب والمميزات فى النوعين . وشكرا جزيلاً لكم ... تقبلو تحياتي

اهلا بيك في المنتدي وهحاول اجاوبك وافيدك علي قد ما اقدر
اولا ياريت تشاركنا في رابطة ال محبي السفينه 132 وده الرابط بتاعها
http://masrmotors.com/vb/showthread....80993&page=194

اولا الفيات 132 كانت ومازالت اسطوره من اساطير الفيات
اولا حجم السياره مصنف من السيارات العائليه - العربيه كركوبه تحس انها ركوبه وحاجه محترمه وفخمه عكس اللادا تماما - لو جبت واحده نضيفه وعملت عفشتها كلها مره واحده الماني او بولندي انساها تماما تحس انك راكب فعلا مرسيدس
موتورها لايقارن بالادا تماما موتور اتنين كامه ناعم عن اللادا جدا جدا اتنين كامه يعني جبار ومتصدقش انها بتاكل بنزين لو الموتور مظبوط بتعمل 180 في الصفيحه دي لو 2000 سي سي حتي الموتور لو مظبوط وسليم اعطاله نادره عكس اللادا
متصدقش حد ان حاجتها غاليه كله موجود الصاج هو اللي ممكن يكون غالي شويه وفي الاستثماري سعره معقول
يبقي الموتور افضل من اللادا
العفشه اقوي من اللادا واريح ومتعه بجد
سهل انك تجيب بيها سرعات عاليه 140-150-160 وياسلام لو 2000 سي سي ممكن لحد 180 واكتر
ثبات لو الشاسيه سليم ممتاز الصالون اوسع وافخم من اللادا بس يكون صالون 2000 او كداب 2000
شكلها مقبول عن اللادا تماما
عفشتها لو سليمه اعطالها قليلة بالنسبه لللادا وخصوصا حكاية البيض المقرفه اللي بيملص في اللادا انت من اسكندريه واللادا كتير هناك اه وبتاعت شغل اه ممنكرش ده
بس كركوبه ومتعه وراحه ونعومه وفخامه ال 132 ومحدش يخوفك من قطع غيارها احنا راكبنها ومفيش ادني مشكله وبتاعت سفر اكتر من اللادا
وانا من رأيي اركب دي ودي وسوقهم وهتعرف ان كلامي صح وممكن تركبلها تكييف عادي جدا وممزاتها كتير بس انا كلامي مش مترتب حاليا وطبعا كانت بتنزل بجنوط اسبور مروحه وياريت تشاركنا في الرابطه وانت تعرف كل حاجه عنها وانت لو نازل القاهره بلغنا في الرابطه ونتقابل ولو عرفنا نجيلك اسكندريه هنقابلك برده
بس اهم حاجه انك تجيب عربيه شاسيه وبودي سليم وانت تتمتع بيها

[anwss]

الف شكر aimooo ، على الرد وان شاء الله هاخد بنصيحتك

[abokoko]

ملحوظه بسيطه
ممكن يكون الكلام اللى فوق صح
لكن
ال لادا لسه بتنتج الى الان وبالتالى قطع غيارها هتكون موجوده وحديثه
ال132 اعتقد انتهت اواخر الثمانينات بالتالى قطع الغيار كل شويه هتقل
ولو مش فارقه معاك يبقي فى الحاله دى سيبك من الاتنين وهات لك بيجو 504

[محمدصلاح القاضى]

الفيات 132 اسطوره
انا عندى واحده وايمن معاه واحده ومصطفى عاطف معاه واحده

انا عندى 2000 سى سى مكيفه باور وسنتر وازاز كهربا واعطال بسيطه جدااا لا تذكر

تصدق ان عربيتى لحد دلوقتى لسه معمرتش والموتور بسم الله ما شاء الله شغال بنسبه 95 % وبكفاءه عاليه لدرجه انى النهارده الصبح كنت فى مشوار الساعه 6 الصبح وكنت مقفل الامبير ماشى 180 كيلو وعديت توياتا واكسنت ار بى وبصيت فى المرايا وشوفت مدى التعجب على وشهم من ان عربيه 132 ماشيه فى مصر بقالها 32 سنه ولسه فيها عزم وقوه
انا اقولك اشترى 132 اساسيات سليمه وانت هتدعيلى