ألف شكر للأسطى أحمد حنفي - وللمشرف المحترم sayed2077

[mohamed alaa zaazaa]

كان الأستاذ سيد أشار لمشكلة عربيتي (بيجو 405) في موضوع سابق ليه.
كنت رحت لواحد بتاع تكييف علشان يشحنلي التكييف، مع العلم إنه كان شغال السنين إللي فاتت، بعد ما عمل كل الحركات بتاعته في الآخر قالي إنت محتاج تغير الفلتر وحاجة كمان كده مش عارف هي إيه، طيب هتكلف كام قالي حوالي 500 جنيه غير مصاريف الشحن 180 جنيه.
دخلت على المنتدي، وقرأت موضوع الأستاذ سيد عن الأسطى أحمد حنفي في المعادي، أنا أساساً ساكن في أكتوبر، قلت خلاص مفيش مفر، شديت الرحيل على المعادي ورحت للأسطى أحمد حنفي، بس هو اليوم إللي أنا روحته ده كان مشغول جداً ومكانش حد من الصنايعية موجود معاه، قعدت معاه للمغرب، وجه يكبس دورة الفريون، لقينا خرطوم بينفس جامد جداً، روحنا غيرنا الخرطوم، وكبس هوا تاني، بعد ما فات ساعة لقينا المؤشر نقص حاجة بسيطة، مع إني بعد ما كبس بربع ساعه لقيت المؤشر تمام وقولتله كده تمام مفيش تسريب، بس هو قال خلينا نستنى شويه، وبعدين جرب بالماية والصابون علشان يعرف مكان التسريب معرفش، فقالي ده تسريب خبيث وكنا بعد العشاء، فقالي تعالالي يوم من أوله وكلمني قبل ما تيجي، ودفعت 100 جنيه تمن الخرطوم.
وطبعاً قابلت اليوم ده الأستاذ سيد، وكتر خيره كان معايا أغلب الوقت أنا وعضو آخر من المنتدى.
بعد ما فضيت روحلته يوم تاني، وخلى الصنيعي إللي معاه يبدأ يفك في البطارية وعمة الكاربراتير علشان يشوف لو في تسريب في ماسورة تحتهم، وهو كان يبجرب بميه وصابون على الكباس، ولقى تسريب خفيف جداً في الكباس، ففكه، وبعت الصنايعي إللي معاه علشان يجيب جوانين مكان القدام الموجودين في الكباس، ملقاش جوانات ليه، فالأسطى أحمد قالي هنحط سليكون وربنا ييسر، بعد ما حط السليكون وقفل الكباس واستنينا لما السليكون نشف، ركبه مكانه تاني، وكبسنا هواء، ولقينا الموضوع تمام، جه بقى وقت شحن الفريون.
قالي شغل العربية، وهو كان بيشحن الفريون، فلقى التكييف مش لاقط، كل شويه يقوم ويقف، فحط إيده على الماسوره إللي داخله في العربية لقاها سخنة، وهو ده إللي حصل معايا عند بتاع التكييف إللي قبله، وقالي ساعتها عايزين نغير حاجات، إللي قولت عليها فوق.
فالأسطى أحمد قالي غالباً الخرطومين إللي راكبين في الكباس معكوسين، وفعلاً طلع كلامه صح، وغير أماكنهم، وشحن، والحمد لله التكيف اشتغل تمام، وبرده اليوم ده كان الأستاذ سيد معايا ومسبنيش أنا وعضوين آخرين من المنتدى.

[mohamed alaa zaazaa]

الموضوع كلفنى في الآخر 250 جنيه مصنعية وشحن

[sayed2077]

استاذ محمد ازاى حضرتك عامل ايه يا باشا ربنا يخليك بجد
حضرتك انسان محترم وعموما ده واجبى انى اقف مع اى حد يجى من مصر موتورز
وكنت عاوز اكلم حضرتك والله اطمن على حضرتك وعلى التكيف بس معرفتش اخد رقمك خصوصا انى دايما باخد ارقام اى حد اقابله عند الاسطى احمد علشان اطمن على التكيف والحمد لله كله بيبقى مبسوط جدااا الحمد لله و بجد انا مبسوط جدااا ان حضرتك سعيد والحمد لله ناس كتير كلمتهم من المنتدى وكله الحمد لله بيبقى سعيد جداااا وهو ده اللى انا عاوزه فعلا فيه حديث نبوى محبب الى قلبى جدا وهو (إن لله عبادًا خلقهم لحوائج الناس، يفزع الناس إليهم في حوائجهم، أولئك هم الآمنون من عذاب الله. )



ف يارب اجعلنى من عبادك الذين خلقتهم لقضاء حوائج الناس


وعلى العموم الف مبروك يا استاذ محمد على تصليح التكيف



وعلى فكره الاعضاء اللى كانوا من مصر موتورز كلهم كلمتهم والحمد لله كله كان مبسوط



و بعتذر لو اى حد من الاعضاء راح عند الاسطى احمد وملقنيش لانى حاليا خدت الاجازة خلاص من الجامعه وعايش فى بيتنا التانى لوحدى (بعيد عن ورشة الاسطى احمد) وبحاول ادور على شغل اقضى بيه وقت فراغى ادعولى ربنا ييسر احوالى للافضل ان شاء الله


وعموما اى حد عاوز يستفسر عن اى استفسار او اى حاجه او واجهته اى مشكله ده تليفونى

01007490168 مفتوح فى اغلب الاوقات ولو مقفول بيبقى فاصل شحن بس او خارج الشبكه وان شاء الله كله خير
باذن الله


اخوكم فى الله سيد