ايهما افضل فى حدود (60 الف ) يا اهل الخبرة ???مستعمل

[jokar]

قررت ان اشترى سيارة والحمد لله فى حدود 60 الف (مستعملة) عاوز عربية معقولة واسعار قطع غيار معقولة وتنفع شبابية وعائلية للبيت بس مش عارف اجيب ايه بالظبط فى ناس رشحتلى

1- نيسان صنى 2004:2001 (لانها تقفيل يابانى يابانى)

2-لانسر 2003 اولانسر كريستاله (يابانى ومعقولة وعملية)

3-اوبل استرا 2005:2000

4-اوبل فيكترا2002:1998 (المانى ويستحمل بس خايف من قطع الغيار)

5- نوبيرا او لانوس ( كورى ورخيص وبرده بيستحمل قطع غيار عند البقال)

6- تويتا كورولا اواخر التسعينات

7- اوبترا 2006

او اى حاجة تكون افضل من وجهة نظركم

انا خلاص احترت ومش عارف اختار عشان حتى لما انزل السوق اعرف ابص على ايه

[AbOnOrA]

كلهم حلوين كلهم طعمين بس الاهم الحالة لاننا مش بنقارن عربيات زيرو ببعضها ده مستعمل
يعنى مثلا انا افضل النيسان والانسر عن الانوس بس لو الانوس حالتها ممتازة والكريستاله حالتها جيدة يبقى الانوس افضل

تانى حاجة فى الاهمية بعد الحالة فروق السعر لان فيه فروق كبيره بين الموديلات ديه وبعضها تصل ل 15 الف جنيه وده مش مبلغ قليل فاكيد فرق السعر برضو هيرجح كفه عن كفه تانيه

تالت حاجة فرق الموديل مع التاكيد ان لو فرق الموديل لا تعكسه حالة العربيه يبقى ملوش لازمة لكن لو عربيتين حالتهم جيدة مثلاً وافترضنا ان السعر واحد برضو يبقى الافضليه لاعلى موديل

اخر حاجة لما تلاقى النقط ديه متساويه او متوازنه تقارن بين العربيات فنياً وبعضها

النيسان صنى والتويوتا كرولا الموديلات ديه كانت تحفه واعتماديتها عاليه جداً وقطع غيارها منتشره ومتوفره
بعديهم تيجى الانسر كريستاله لانها اقلهم فى قوة الموتور
لعديهم تجى النوبيرا والانوس لفارق الاداء فى كل حاجة
وكل دول فى كفة والالمانى فى كفه تانيه لان حسبته بتختلف لاختلاف تكاليف الصيانة وقطع الغيار عن اليابانى والكورى يعنى نقدر نقول انها حسبه تانيه شويه لكن افضل تتجنب الاسترا لان ناس كتير اشتكت منها وقطع غيارها غاليه جداً واقل انتشاراً من الفيكترا

الاوبترا برضو حسبه تالته لانها حسبه الافضليه فيها للحالة اللى المفروض تكون من جيدة جداً للمتازة مع كون الموديل عالى وديه ميزات مهمة

علشان كده فنياً صعب نرجح عربيه عن التانيه بشكل نهائى لكن الحسبه لازم يخش فيها كل الاعتبارات اللى قولتها ديه
معلش ممكن اكون لخبطتك بس اللى عياز اقوله ان فى المستعمل القرار لازم يكون بناء على واقع فعلى عربيات قدامى بحالة كذا بسعر كذا لكن مقارنه موديلات وماركات بس مش هتبقى عمليه او صحيحة اطلاقاً

[MO]

متوسط كل الكلام
مثلا يعني هات اللانسر 2003 بسعر معقول
و انت حاول ترجعها جديدة
"عفشة و فرامل و كل الكلام ده و رشة نظافة و انوار و فونيس ,...الخ
هتحتاج شوية وقت بس في الاخر كل الكلام ده هيكون في صالحك

[MEMOO_1ST]

هوا فعلاً الفيصل في الكلام دا هوا الحالة لكن انا لو مكانك ادور في اللانسر 2003 عربية محترمة وقطع غيار منتشرة وياباني.

[jokar]

يا جماعة انا متشكر قوى بس عيبى انى متردد شوية وخايف احسن الوالد يرجع فى قراره ويدينى نص الفلوس بس واروح اركب بيهم حاجة بـ 30 الف عاوز اقرر بسرعة اعتبروا انكم هتشتروا العربية لنفسكم

انا بحب الاوبل فيكترا جدا بس خايف بسبب اسعار قطع الغيار واعادة البيع
وبحترم اليابانى جدا بس برده خايف من اسعار قطع الغيار احسن تكون غالية
وخايف ترسى فى الاخر على الكورى حبيبة الميكانيكية

وشكـــــــــــــرا