تجربتي في تعلية الax

[tejani]

تجربه مريرة ومكلفه لغاية لما قدرت اعلى ال ax بدون مشاكل حبيت انقلهلكم عشان محدش يتكلف الفلوس اللي انا دفعتها
اول حاجه كنت عاوز اعليها من وره عشان كانت بتحك في المطبات لما يركب ناس ورا في الكنبه الخلفيه وكمان لما كنت بركن جنب رصيف عالي مكنش الباب يفتح واضطر اركن بعيد عن الرصيف عشان اعرف انزل
المهم رحت لعفشجي جنب البيت كان غيرلي شوية حاجات في العفشه اول ما شتريت العربيه المهم فك العجل وقالي العربيه دي على حاجه اسمها مسمار عزم قلت ده فاهم فك العجل وجه يفك المسامير عشان يعلي لقى المسامير الانكيه نجمه وحاول يفكها اربع ساعات معرفش
عرفت انه مش صنايعي (مش عارف يفك مسمار) يبقى هيعرف يعليها
المهم وانا عند الحاج فرج في جسرالسويس قلتله عليهالي قالي هتدب معاك ومرديش يعليها
قعدت اطقس على عفشجي يكون فاهم جنبي في امبابه لغاية لما واحد صديق من المنتدى دلني على راجل كويس اسمه عم صلاح
روحت لعم صلاح عم صلاح طلع اسطى صنايعي وعرف يفك المسامير وعلى العربيه وخليته بالمره عملي شوية شغل في علبة الدركسيون بدل ما اغيرها
المهم العربيه بقت عاليه قوي من ورا وواطيه من قدام شكلها مكانش ظريف
وكمان بقت ترزع جامد في المطبات من ورا قلت ده يبقى الحاج فرج عنده حق
رجعت لعم صلاح قلتله بتخبط جامد من ورا قالي ما اتا نسيت اقولكان المساعدين دول مش بتوعها دول ناشفين وانت عاوز مساعدين طريه عشان متدبش من هنا بدات افقد الثقه في عم صلاح لاني متاكد ان المساعدين دول فرنساوي اصلي وجداد كمان مش استيراد حتى
المهم قلتله اعمل الصح على راي الفيلم
وسيبت العربيه عشان كان عندي شغل ورجعتله بالليل لقيته خلص وخت العربيه بعد ما غير المساعدين اللي ورا وعلاها من قدام عشان تمشي مع الاعلو الوراني وكانت زي الفل
ونسيت اقولكم اني اخذت المساعدين القدام احتياطي والحمد لله اني عملت كده
يومين بالضبط ولقيت العربيه بتشخلل بكل ما في الكلمه من معاني من ورا
قلت لا مش هرجعله تاني
وقلت خلاص هرجع العربيه تاني زي الاول واطيه عند اي حد واركب المساعدين القدام ما دام موضوع التعليه ده هيقرفني
المهم لفيت على عفشجيه امبابه واحد واحد كله يقولي روح للي علاهالك
لغايه لما وصلت للاسطى محمود
الاسطى محمود قالي وانت عاوز توطيها ليه العلو ده حلو قوي المهم حكيتله الحكايه قالي طيب خلاص نعالج الموضوع من غير ما نوطي
قلتله اذا كان كده ماشي
المهم نزل تحتت العربيه وقالي المساعدين دول سايبين خالص قلتله ازاي دول راكبين من اسبوع
قالي دول مش بتوعها قلت في عقل بالي الله يحرق الصنايعيه كل واحد هيقولي دول مش بتوعها
المهم قالي طيب هات المساعدين القدام ووراني الفرق
الحلقات اللي في اول المساعد الجديد اوسع بكتير من القديم والمسمار بيلق فيها وطبعا كان مقرط عليه جامد ولما مشيت بيها ابتدى يبوش ويشخلل جامد قلتله والحل ما المساعدين القدام كانوا بيرزعوا جامد
قالي خلاص احنا نطولهم
قلتا في عقل بالي دخلنا في الفتي من جديد والاختراعات بقى
قلتله لا يا عم رجع كل حاجه زي ما كانت وخلاص المهم قعد يقنع فيا لغاية لما وافقت على مضض
اشترينا مساعد قديم بايظ ب 10 جنيه
وقطعنا الحلقتين اللي في طرفه عند الحداد ونطرنا الجلب اللي في المساعد الاصلي وركبناهم في الحلقتين المقطعوين ولحمناهم في طرف المساعدين الاصليين وكده يبقى المساعد طول بمقدار طول الحلقه الملحومه
المهم العمليه دي خدت نص ساعه عند الخراط واخد 25 جنيه ورجعنا الورشه بتاعة الاسطى محمود وركبنا المساعدين بعد عملية الاطاله والحمد لله العربيه لسه عاليه ومبقاش في اي تخبيط ولا شخلله خالص ورا
حكايايه طويله بس قلت اعرضها عليكم للاستفاده
نسيت اقولكم الاسطى محمود اخد 30 جنيه مصنعيه

[aymangalal]

دى قصة طويلة وتجربة مريرة يا دكتور الله يكون فى عونك(من فتى الصنايعية) هل تقبل رأيى؟؟؟؟
افترض انك قبلت وهقول:
(العربية متصممة على ارتفاع معين فى وجود مكونات معينة )المساعدين والسوست وكده....فا لما تغير فى الارتفاع ده ولو سم وحد اكيد هتغير منظومة التصميم كلها رأيى الشخصى لو العربية بتعلى او توطى من كنترول معين(زى مفتاح او ريجلاش كده مثلا) بدون تغيير شىء يبقى نعلى ونوطى بدون ضرر لكن لو اى تغيير هؤدى الى اى اضرار اعتقد مالوش لازمة وبصراحة اجد ان رأى الاسطى فرج صح الصح نتجنب الحك فى المطبات بإيه؟ بالحذر والهدوء على المطب ده غير انك مش بتحمل العربية وبتبقى مليانة بإستمرار وكمان مش طول مانت ماشى هتبقى ماشى فوق مطبات اكيد فى كده وكده وده عن تجربة احد اصدقائى قالى كنت مركب ناس معايا من الوزن التقيل وكانت بتحك فى المطب من ورا بس ده كان اضطرارى وماحصلش غير فى الموقف ده بس معنى كده ان العربية فى الحالة العادية بتبقى مظبوطة بالنسبة لقطع الغيار الجديدة لو مش نفس مواصفات ومقاسات الاصلية يبقى الاستيراد احسن مع جودة تصنيع الاستيراد طبعا لذلك فى جزئية العفشة والقطع التقيلة دى يفضل الاستيراد (اعتقد ذلك)
انا بقى كنت عاوز تقولنا بالتفصيل(ان امكن ) ايه المساعدينات اللى غيرتها وكام مره وكل مره بتجيب جديد ولا استيراد وبكام ؟؟؟؟؟؟
عشان انا جبت مساعدين قدام بعد ما القديم سرب زيت وابتدت تخبط فى المطبات(طبعا استيراد زى الاصلى بالظبط) كان بـ 120 ج واللى همنى فى وقتها انى احل المشكله وخصوصا ان الصنايعى قدر يتصرف ويجيبة استيراد فى وقتها(ودى صعبة طبعا بالنسبة للـ ax) انك تلاقى حاجه عايزة تتغير وتغيرها فى-مش استنى لبكرة او لما نجيبة ....- طبعا مافكرتش بكام والحمد لله ربنا كان ساترها معايا فى وقتها وغيرته ومشيت وحسيت بالفرق والحمد لله كنت راضى تمام

ارجو الاجابة عن تساؤلاتى معلش بتقل عليك

[tejani]

هو طبعا في مسمار بتعلى وتوطى منه العربيه بس المشكله انه علاها قوي عشان كده احتجت اطول المساعدين
بالنسبه للمساعدين هم اللي راكبين فيها كانوا جداد لان العربيه كانت بتاعة واحد صاحبي وكان شا ريهم قبل ما اشتريها منه بشهرين وكانوا على ما افتكر ب 360 جداد من نافع في شارع دمشق
اللي ركبهم العفشجي دول طلعوا مش بتوعها بتوع 405
وطبعا انا اتكلفت ثمنهم على الفاضي

[aymangalal]

معلش يا دكتور ادينا بنتعلم واحدة واحدة لغاية ما نتقى شر تأليف الصنايعية
هو المساعدين يعنى 2 (يمين وشمال مش كده؟؟)
وكل اللى حضرتك بتتكلم فيه بالجوز ؟؟؟ صح وقدام بس؟؟؟ ولا ورا وقدام ؟؟؟ وهل السعر فرق بين ورا وقدام؟؟

[tejani]

الاتنين يعني شمال ويمين
واعتقد ما بين ورا وقدام الفرق مش كبير