كيف حصلت علي رخصتك

[أحمد ال حجر]

السلام عليكم يا أهل المنتدى
ممكن كل واحد يحكلنا حكايته مع استخراج الرخصة؟ ... ودفع كام فلوس .. الرسمى وكام ترضية للسماسرة او البلطجية اللي جوا وحدات المرور ؟ وهل حد ارغمه علي دا ولا استسهال ؟ وهل العيب فينا احنا ولا في افراد المرور ؟
وتحياتى للجميع
حرقة دم

[AbOnOrA]

انا عن نفسى كنت بسوق كويس سنين قبلها ومكنتش متخيل انى محتاج واسطة غير علشان الوقت

وبالصدفة قبلها بتكلم مع جار لى وبقوله عايز اروح اطلع الرخصة قالى اعرف واسطة كويسة فى المرور بتاعك وهيطلعالك وانت واقف ومش هياخد فلوس قولت زى الفل

جيت يوميها روحت الصبح اتصلت بالراجل الواسطة ده لقيت تليفونة مبيردش فقولت كبر دماغك وخش انجز لواحدك

انا كنت خايف بس من امتحان الاشارات ولقيت كتاب الاشارات بيتباع فى المرور كان بخمسة جنية ساعتها جبتها وقعدت اذاكره ساعة كدة وانا قاعد فى المرور لحد ما حفظتة وقومت اخلص الورق

طلعو عينى تلاكيك فى الورق وده محتاج تاشيرة وده ناقص ورقة واى حوارات علشان ياخدو فلوس لحد ما الورق وقف خالص على امضاء ناقصة وقولت خلاص همشى واجى يوم تانى

ويادوب خرجت من المرور ومشيت شوية لقيت الراجل الواسطة بيتصل بيا
الو ايوه انت فين انا مشيت ده انا مستنيك فى المرور .. طب دقيقة وهرجعلك
روحت الراجل خد الملف بتاعى ودخل على مامور الوحدة راح ماضى عليه شخبطة مميزة كدة وقالى ارجع بيه للشباك الراجل شاف الشخبطة ديه راح مخلص كل حاجة تمام
هوب يلا علشان امتحان السواقة .. هوب افتكرت انى مش معايا عربيه اسوق عليها ولسه مش عارف هنجيب عربيه منين والراجل اللى كان معايا كان معاه اوتوماتيك وساعتها مكنتش بسوق غير مانيوال نعمل ايه نسوى ايه وكان يوم خميس نص يوم هوب خلاص مفيش امتحان سواقة خلص امتحنو شوية واكتفو وانا لسه بدور على حد معاه عربية مانيوال اسوقها

الراجل اللى معايا قالى ولا يهمك ودخلنا للمكتب تانى راح مشخبط على الملف تانى وقالى تعالى يوم السبت اتصور وخلاص كدة

وطلعت الرخصة من غير ولا مليم ومن غير عطلة بس بالواسطة

وفى الحقيقة انا مكنتش مبسوط بالرخصة ساعتها بالعكس كنت حزين جدا وحاسس بالظلم لانى شوفت الفارق الشاسع بين التعامل وانا ممعايش وسطة ووانا معايا

[نبيل عبدالرحمن]

أنا كان عندى فكرة بسيطة عن السواقه والإشارات وكده وإشتريت أول سيارة فى حياتى وكانت سيات 133 مستعملة وبحالة جيدة جداً وقعدت حوالى إسبوع أتمرن على سواقتها فى سموحه أيام ما كانت شوارعها فاضيه ورحت قدمت علشان الرخصه وفى نفس اليوم إمتحنت إشارات وجه دور السواقه ، وكانوا بيختبروا الناس على عربيه لادا بتاعتهم وللحظ عربيتهم اليوم ده إتعطلت فالظابط قال اللى معاه عربيه يجيبها يمتحن بيها وانا كنت رايح بيها فجبتها ونظراً لأن حجمها صغير فتجاوزت بها الإمتحان بكل سهوله ويسر وإستلمت الرخصه تانى يوم بدون واسطه ولا بقشيش ولا أى حاجه