طريقة عمل فلتر هواء لتكييف لانوس ... بدون تفاصيل!!!!!!!

[مصطفى-حسن]

طبعا كلنا عارفين ان دايو لانوس 1 و 2 بينزلو من غير فلتر تكييف هواء
ودة يعتبر عيب
او نقدر نقول انها امتياز او امكانية غير موجود فى لانوس 1 و 2
فمن هنا جت فى دماغى فكرة انى اعمل لها فلتر تكييف هواء

انا عارف ان انا مش اول واحد يفكر فى الموضوع دة
ومش اول واحد يحاول يعمل فلتر هوا
لكن فى النهاية.....
محدش وصل للفكرة الكاملة
ازاى نعمل فلتر تكييف هواء للانوس والاهم هيكون مكانة فين
وهيكون فلتر واحد ولا فلترين


بس الاول قبل ما اخش فى الموضوع لازم اشرح دورة الهوا فى تكييف لانوس
لان فية ناس معانا فى المنتدى كل اللى تعرفة عن تكييف عربيتة هو زرار A/C والبكر بتاع التوزيع اللى فوق الكاسيت وخلاص


وفى نفس الوقت عشان انا عايز الموضوع دة يكون تفاعلى

بمعنى

كل المواضيع اللى انا عملتها فى القسم دة كانت بالشرح والصور
ما عدا الموضوع دة
لازم يكون تفاعلى

لان بصراحة بصراحة انا اتسحلت على اما انتهيت منة

واخد معايا فترة طويلة (متقطعة) تفكير وتصميم والاهم المكان
واكتر من محاولة فاشلة
وكل محاولة كنت بصورها عشان لو نجحت ارفعها بالصور فى المنتدى
لكن للاسف فى الاخر كانت بتفشل
وايديا اتجرحت اكتر من مرة
دة غير ان انا كنت مجبور انى اتعامل مع الاعراض الجانبية السلبية اللى كانت بتحصل من كل محاولة فاشلة
لدرجة انى مرة فكيت العلبة اللى تحت التلاجة بالماتور (وكلنا عارفين مدى صعوبتها ورخامتها)
ومرة اضطريت انى افك الرفرف اليمن الامامى بتاع العربية (بعدين هقولكم لية)

وبصراحة من كتر ما انا تعبت فكرت انى اطرح الموضوع بشكل تجارى
بس كانت المشكلة انى طول موسم الصيف بكون مشغول فى شغلى وكمان فى تنظيم رحلات السنوركل والغطس الحر والتصوير تحت المية اللى فى الموضوع دة

http://www.masrmotors.com/vb/showthread.php?t=113179
ففعلا مكانش هيبقى عندى وقت
عشان كدة قلت هعملة مجانى للاعضاء
بس عشان انا تعبت فية بجد بجد
فقلت ضرورى الناس تتعب معايا شوية وتجتهد

وعشان تبقى الفكرة واضحة وكلامى واضح
انا هشرح دورة الهواء فى التكييف بالصور
وبعدين هستنى اراء الاعضاء وافكارهم فى 3 حاجات اساسية
الفلتر هيتعمل من اية (ودة الجزء السهل) ؟؟؟؟
وهيكون فلتر واحد ولا فلترين (ودة الجزء المحير) ؟؟؟؟؟
وهيكون مكانة فين (ودة اصل الفكرة) ؟؟؟؟؟

ولما حد من الاعضاء يقولى مثلا هنعملة من كذا وكذا
وهيكون مكانة فى الحتة الفلانية

مش هقولة انت صح ولا انت غلط
لكن هرد علية بالصور من كل المحاولات اللى انا عملتها
وهطلب منة التاكد من فكرتة بالصور بردو
وهنبهة على العقبات اللى هتقابلة
وهفكر معاة بصوت عالى وكل دة هيكون بالصور من واقع التجارب الفاشلة والتجربة الوحيدة الناجحة

لحد ما يوصل هوة او غيرة من الاعضاء للفكرة الكاملة
ساعتها هطرح الفكرة بالكامل وبالصور وبالتفاصيل المملة

هبدا الاول شرح دورة الهواء المبسطة فى التكييف

الاول دة شكل التابلوة


وبعدين هنشيل التابلوة خالص عشان نعرف الدنيا تحت ماشية ازاى
والارقام اللى انا هحطها على الصورة ركز فيها عشان هنحتاجها كتير فى الشرح وفى التفكير



لما بيكون الزرار دة على الوضعية دى


يبقى معنى كدة ان بداية دخول الهواء لدورة التكييف من داخل صالون العربية تحديدا من حوالين درج التابلوة من عند رقم 1


ولما بيكون على الوضعية دى


يبقى معنى كدة ان بداية دخول الهواء لدورة التكييف من برة العربية من عند الهوايات اللى تحت المساحات



فى الحالتين الهوا بيدخل على موتور المروحة رقم 2
اللى بنتحكم فى سرعتة من البكرة دى


وبعدين الهوا بيعدى على التلاجة اللى فى المكان رقم 3
يطلع هوا ساقع

يدخل بعد كدة على الغرفة بتاعة سربنتينة السخن رقم 4 اللى بتعتمد على دورة المية بتاعة الموتور فى تسخين نفسها

ودى الهوا مبيعديش منها ويتخلط بالسخن الا لو استخدمت البكرة دى عشان تخلط سخن ببارد


وهنا فية معلومة عايز اقولها
ان دورة الفريون بتكون شغالة علطول حتى لو استخدمت السخن فى الشتا لانك لو استخدمت السخن بس بدون تخليط الهوا البارد او تشغيل التكييف حتى ولو بنسبة بسيطة نسبة الرطوبة فى الكابينة بتزيد وتحس نفسك اتخنقت والصالون اتكتم والازاز يشبر من جوة بسرعة

بعد كدة الهوا بيدخل غرفة التوزيع رقم 5 واللى بنتحكم فيها من البكرة دى


هى دى ببساطة دورة الهوا فى تكييف العربية الانوس

طيب

سؤال مهم وبيطرح نفسة
هو الفلتر دة لزمتة اية؟؟؟؟؟؟
يعنى هوة رفاهية مثلا وترف؟؟؟؟؟؟
الاجابة
لا
الفلتر دة اساسى

لان بدون الفلتر التراب اللى بيدخل بيتجمع على التلاجة لانها بتكون رطبة اثناء التشغيل وبيسد الشرايح بتاعتها فمع مرور الوقت تلاقى التكييف شغال بنص قوتة الحقيقية لان الشرايح بتاعة التلاجة اتسدت

دة غير انك اول ما بتشغل التكييف بتلاقى ريحة عفونة طالعة من الفتحات وبتروح بعد دقيقة او دقيقتين من التشغيل

عشان كدة تلاقى ناس تشتكى ان التكييف بالنهار يادوب ملطف الجو بالعافية جوة العربية
لكن مبتسقعش من التكييف بالنهار ابدا
وتلاقى الناس تروح لبتاع التكييف تشتكى من ضعف التكييف ويشحن فريون ومش عارف اية ويقولة الكباس والجوانات ...الخ
والمشكلة كلها ان التلاجة مسدودة عشان مفيش فلتر هوا
عشان كدة عملت الموضوع دة

نيجى بقة لموضوعونا الرئيسى

الفلتر هيتعمل من اية (ودة الجزء السهل) ؟؟؟؟
وهيكون فلتر واحد ولا فلترين (ودة الجزء المحير) ؟؟؟؟؟
وهيكون مكانة فين (ودة اصل الفكرة) ؟؟؟؟؟

[elmo7areb]

مع ان مش معايا لانوس ولا نوبيرا بس الحوار دة جامد


متابع

[حسام البورسعيدى]

طبعا مشكور على المجهود الجبار اللى انت بذلته سواء فى التجارب المتتعدده الفاشله والتجربة الاخير الناجحة و كمان فى تصوير التجارب دى وقرارك بمشاركة المعلومة معانا وافادتنا بيها ..


انا مش دارس تابلوه الانوس اوى بس عاوز اقولك معلومه صغيره ..

دايما خلى زرار سحب الهواء على وضعيه اعاده التدوير .. بكده هتحافظ على نضافه التلاجه من الاتربة وخلافه وكمان هتلاقى اداء التكييف افضل واستهلاك البنزين كمان هيقل (لان الكمبريسور هيفصل فترات اطول) .. تمام ..

بالنسبة للفكره بتاعتك اظن انه هيكون فلتر واحد فى مدخل الهواء بتاع التلاجه فى مكان بعد التقاء مدخل الهواء الخارجى بالداخلى .. بس المشكله انك لما تحب تغيره لازم تفك الطبلوه تانى ودى طبعا شغلانه كبيره

يا اما تعمل فلتر على مدخل الهواء الداخلى (وده امره سهل جدا وممكن توصله بفك درج الطبلوه بس) وفلتر على المدخل الخارجى (وده مش عارف ممكن يبقى ازاى لان العربية مش ادامى)

ده تخيلى عن الموضوع .. ومستنى تعليقك ..

[مصطفى-حسن]

المشاركة الأصلية كتبت بواسطة elmo7areb مع ان مش معايا لانوس ولا نوبيرا بس الحوار دة جامد متابع

اشكرك على ردك ومتابعتك
بس بما انك مش معاك لانوس
فانا مش هعرف اسألك على حاجة

المشاركة الأصلية كتبت بواسطة حسام البورسعيدى طبعا مشكور على المجهود الجبار اللى انت بذلته سواء فى التجارب المتتعدده الفاشله والتجربة الاخير الناجحة و كمان فى تصوير التجارب دى وقرارك بمشاركة المعلومة معانا وافادتنا بيها .. انا مش دارس تابلوه الانوس اوى بس عاوز اقولك معلومه صغيره .. دايما خلى زرار سحب الهواء على وضعيه اعاده التدوير .. بكده هتحافظ على نضافه التلاجه من الاتربة وخلافه وكمان هتلاقى اداء التكييف افضل واستهلاك البنزين كمان هيقل (لان الكمبريسور هيفصل فترات اطول) .. تمام .. حتى لو عملت كدة التراب اللى موجود فى الدواسة بيطير ويدخل لبداية دور التبريد وعشان تتاكد من كلامى شغل مروحة التكييف على 3 او 4 وامسك سيجارة او عود بخور مكان اقدام اللى قاعد جنب السواق وشوف اللى هيحصل بالنسبة للفكره بتاعتك اظن انه هيكون فلتر واحد فى مدخل الهواء بتاع التلاجه فى مكان بعد التقاء مدخل الهواء الخارجى بالداخلى .. بس المشكله انك لما تحب تغيره لازم تفك الطبلوه تانى ودى طبعا شغلانه كبيره يا اما تعمل فلتر على مدخل الهواء الداخلى (وده امره سهل جدا وممكن توصله بفك درج الطبلوه بس) وفلتر على المدخل الخارجى (وده مش عارف ممكن يبقى ازاى لان العربية مش ادامى) طيب هتفك مسمارين درج التابلوة هتلاقى المنظر دة امسك الزرار دة وحركة يمين وشمال وقولى اية ملاحظاتك على المكان اللى انت رشحتة للفلتر الداخلى وبالنسبة لفكرتك عن فلتر هواء للمدخل الخارجى ادى الخطوات هستأذن حضرتك انك تختبر الافكار اللى طرحتها عن طريق الاتى هترفع الكبوت بتاع العربية وهتشيل الكاوتشة بايدك عادى وتفك ال 3 مسامير البلاستيك دول وارفع الفبرة وبعدين شيل مظراب توجية مية المطر والغسيل دة هتبقى الدنيا فاضية قدامك بص فى المكان دة كويس على مكان دخول الهواء لبداية دورة التكييف من برة العربية وحاول تدخل دراعك للاخر وتشوف مدى مجال ايدك ودراعك هيوصل لحد فين (عشان دى مهمة) وتخيل نفسك لو ماسك الفلتر بايدك هتقدر تتحكم فية وتوصلة لمكانة وتثبتة وقولى على كل ملاحظاتك بالاجمال بس فية تحذرين الاول حاول ما تجرحش ايدك التانى لو لقيت المكان دى كلة تراب وعفش وطينة متجمدة متحاولش تنضفة متحاولش تنضفة ادينى حذرت مرتين اهوة وهبقى اقول بعدين لية متحاولش تنضفة مستنى ملاحظاتك وتقريرك ده تخيلى عن الموضوع .. ومستنى تعليقك ..

[Hisham.Elgazzar]

هى الشبكة دى مكان دخول الهوا للتلاجة ؟


الله اعلم ازا كانت هيا ولا لأ بس ممكن يركب عليها فلتر وخلص الكلام
لكن ده ميمنعش ان التلاجة بتحتاج تتفك وتتغسل برضو حتى لو ركب لها 10 فلاتر