معاك 128 وعاوز تظبط شكلها ومش عارف تعمل ايه بارخص الاسعار ادخل وهتعرف

[sayed2077]

السلام عليكم ورحمة الله وبركاته

دلوقت كلنا عارفين ان ال 128 و هى من 40 سنه وهى عربية الشعب المصرى لاسباب كتير جدا منها رخص سعرها اولا و توافر قطع الغيار و كثرة الناس اللى بيعرفو فيها ويعرفوا يشتغلوا فيها فطبعا ناس كتيير بيبقوا عاوزين يظبطوا شكلها اوووى على اد ما يقدرو بسعر كويس وفى نفس الوقت يخليك تحب العربيه وتستمتع بيها وحتى لو تعمل كل حاجه واحده واحده ومره مع مره هتلاقى العربيه شكلها تحفة وفى نفس الوقت تكون ميزت العربيه عن غيرها
الحاجات اللى هقولها ديه بأفتراض ان العربيه فاضيه خالص ومفيهاش اى حاجه

1:فرش للكراسى :وده بيريحك جدا لان لو الكراسى جلد فى فصل الصيف مش هتعرف تخرج مشوار لان هتعرق فى هدومك وهتلاقى ابيضت من الملح اللى فى جسمك وده سعره فى حدود:150الى 300 وفيه اغلى بس ده فى الحدود المعقوله والكويسه

2:مفرش بيتحط على التابلوه وفى المكان اللى بيتحط فيه السماعات ورا عند الكنبة وده بيخلى منظر العربيه شيك ويفضل لو تجيبه زى اللى عامل زى الفرو وفيه منه اشكال تحفة وسعره: 20 - 40

3:تجيب كام مكعبات قماش كده بتتلزق فى الازاز وتحطهم فى الزجاج الخلفى وسعر الواحد: 2 جنية

4:تجيب دوده قماش الطويلة وتحطها فى المكان اللى بتعلق السماعات ورا (تابلوه السماعات اللى عند الكنبة) وبيدى منظر جميل جدا للعربيه برضوا سعرها: 40 جنية

5:تجيب شكل قماش نضيف تحط فيه علبة المناديل وبرضوا بيدى شكل جميل وسعره :15-30 جنية

6:تجيب جى ام ابو فلاشه وبيشغل راديوا وفلاشه وكرت ميمورى وينفع توصل عليه شاشة عرض وتشغل عليه قران انا برى منك لو شغلت اغانى : 120 جنية

7:جوز سماعت صينى نضيف : 175 جنية

8:شاشة عرض صور وديه رخيصه ومناسبه جدا لينا وبالريموت وبتتوصل مع الجى ام وتشتغل مع سماعات العربيه : 175 جنية

9: الاستاند بتاع الشاشة ب : 25 جنية

10 :طقم دواسات ارضيه : 30-50 جنية

11:طقم دواسات بنزين وفرامل ودبرياج عادى : 10 جنية

12 : كفر للطارة (الدركسيون) وده فعلا بيسهل عليك حركة الدركسيون جامد لان طارة ال 128 فعلا بتوجع الايد و بتخليها تورم : 15-50 جنية

ده كده اغلب الحاجات اللى ممكن تعملها فى صالون العربيه
نيجى بقى للحاجات اللى ممكن تتعمل بره

1:طقم دواير الرفارف (بتاع بلاستيك بيركب على الرفرف ) القم ب: 40-50 جنية
2:لو الشبكه بايظة بتجيب واحده جديده ب : 40 جنية
3:لو قعدة الفانوس بايظة (حديده بيركب عليها الفانوس لو بايظه مش هيركب عدل وهيبقى شكل العربيه زى الواحد الاحول ) بتجيب قاعده جديده ب : 10 جنية
4: لو فانوس بايظ او معتم الواحد الجديد ب : 20 جنية
5:الضوافر اللى بتركب على الاكصدام جوز الظوافر ب : 10 جنية
6:وارة بين الفانوسين الخلفى بيبقى فيه بتاعه بلاستيك كده بتركب وبيكون فيها نور بيشتغل مع الوضع اليلى والبتاعه ديه بتغير شكل العربيه جامد وبتديها منظر حلو : 25 جنية
7:سبويلر مطاط خامه نضيفه بتاع ال 128 : 90 - 100 جنية
بيبقى فيه سبويلارات ب 45 جنية وحشة جداااا وبحظر منها بتبوظ على طول

8:ممكن تجيب اريال كهرباء الاريال بيطلع وبينزل مع تشغيل الراديو ب : 30-50

ولو عملت الحاجات ديه عربيتك هيبقى شكلها مميز جدااا ومش هتبقى مهكعه زى ال 128 اللى بنشوفها غير كده انت نفسك هتبقى مستريح للعربيه وهيبقى شكل العربيه يفتح نفسك للسواقه

وكل اللى احنا قولنا عليه حاجات مشروعه ومش ممكن تاخد مخلفة عليها

وانا بحظر من التفيم والاستيكرات الكبيرة لانك هتدفع فيها فلوس ولو اتقفشت بيهم فى لجنة لازم تشيلهم وترميهم ويبقى خسارة الفلوس اللى انت دفعتها فعلا

ومش لازم تنزل تجيب كل ده مره واحده لا كل شهر هات حاجه حاجه مع كل قبض مثلا هات الشهر ده الفرش الشهر اللى بعده التسجيل والسماعات وكده بقى وكل شهر زود حاجه وفعلا هتلاقى العربيه بتتغير معاك واحده واحده وهتلاقيها فرقت معاك جامد فى استايل العربيه

ويالا بقى ورونا صور عربياتكم لما تعملوا فيها الحاجات ديه

[momen_bondok]

موضوع جميل جداً ومميز
جزاك الله خيراً

[msm_classic]

تسلم ايدك ياباشا على الموضوع الجميل
اضيف :
ممكن نجيب طارة اسبور وديه اشكهالها تحفه بالتوفيقيه بسعر 75 جنيه +قاعده 25 جنيه
وفي الكساحع الي بتحط ادام بتغير شكل العربيه بـ : 90 جنيه وفيه خامه وحشه 50 جنيه
فيه طاسات للعجل نيكل منظرها تحفه وبتدي منظر الجنوط الاسبور بـ 75 حنيه او ممكن نجيب طارة نيكل وسرة نيكل بتتركب في العجل بس مش عارف السعر كام بتبقى حلوة بردة خاصه لو رشيت الجنت اسود هاتنورة
وشكرا على الموضوع الجميل .

[محمد اشرف]

:C HUBBY~36:

[ريهام79]

جزاك الله خيرا على الافكار والاسعار
وعجبنى جدا انك برئ من اللى هايشغل اغانى
وماشاء الله كل مجهودك فى القسم ملحوظ جدا ربنا يوفقك