سؤال لخبراء BYD F3

[f3_byd]

المشاركة الأصلية كتبت بواسطة Ahmed El Khawaga بعد اللف و الدوران و البحث و التنقيب استخرت الله و عقدت العزم على شراء الBYD سمعت عن مشاكل السخونه و التقفيل الرديء و التيل المضروب و قواعد الموتور و عضة الفتيس الغنيه عن التعريف و صوت الموتور العالي و الكاسيت المهيس و الخ الخ و لازلت غاوي اعك نفسي و قلت برده عربيه ممتازه بالنسبه لسعرها. بكلم نفسي و قول هاتشتري زيرو و تصلح؟ و تعمل شجيع السيما و تغير القطع الزيرو البايظه باستيراد ياباني او حتى جديد امال انت راكب زيرو ليه؟ ففكرت في فكره خطر, ال BYD F3R معروضه عليا جديده كاش بسعر مغري و تقفيل بره كمان يعني هاريح نفسي من و جع القلب و عيوب التقفيل المصري العويل. بس السؤال هنا: المكنه 1500 ليها قطع غيار متوفره؟ و هل اكسسوار ال F3R متوفرزي ال F3? ولا فانوس او اكصدام يتكسر او شنطه تتخبط و روح ابعت اجيبها من الصين؟ حيران حيران حيران دلوني يا ولاد الحلال

عندي byd تاكسي استلام 4/2011
العداد 40 الف كيلو متر و الصيانات بالتوكيل من اول صيانة ال 1000

مشكلة السخونة غير موجودة بالمرة

مشاكل التقفيل عادية زي الفرنا و اللانوس و الاسبرانزا و الصني و و و و كل التقفيل المصري كدة

التيل بجيبه برا التوكيل ارخص و احسن و برضه مش وحش الاصلي بتاعها

قواعد الموتور بعد 40 الف كيلو زي الفل مفيش شكوى منها

عضه الفتيس تقريبا مش موجودة و لو موجودة عالاول بس و تختفي مع ضبط رجلك عالدبرياج

صوت الموتور العالي مش عيب و زيه زي عربيات كتير مش عارف ده اسمه دلع و الله

اول مرة اسمع ان الكاسيت مهيس بصراحة

تمام كدة ؟؟؟ خد عندك بقا

40 الف كيلو في سنة و استخدام شاق و بتمشي في جميع مناطق القاهرة و الحمد لله مفيش اعطال نهاااااااااااااااااائي

مرة واحدة جهاز الانزار اتحرق و اتغير في الضمان

و ماستر الدبرياج باظ على 38 الف كيلو و والدي مشي بيها 2000 على عيب الدبرياج عادي جدا و لما دخل ال 40 الف اتغير في الضمان رغم انه من المستهلكات و ذلك لمواظبته عالصيانة في التوكيل

بعد الكلام ده هتلي عربية دكر في بلدك زيها

بطل تسمع الكلام و بس عشان متتعبش

[kimo10]

السيارة معى ليها اربع شهور ومفيش مشكلة كانت غير رزع الشنط وتشغيل الانذار واتحلت فى صيانة 1000 ولا توجد مشاكل حتى الان والحمد لله
ومليار مبروك مقدما

[Ahmed El Khawaga]

الف الف شكر للاستاذ الفاضل f3_byd و الاستاذ kimo 10 على الاهتمام و الرد
و احب احكي موقف صغير حاصل معايا النهارده.
كنت رايح المرور اخلص مخالفات عربيتي قبل ما ابدأ ابيعها و اجيب الحلوه انشاء الله فأخذت تاكسي من الدقي لحد مرور الدراسة و فضلت واقف في الشارع مستني تاكسي BYD اركبه حظي طلع حول علشان السواق كان ظريف جدا من النوبه و مشغل التكيف كمان. المهم قاعدين بندردش و ببص على التكييف لقيته مشغل الهواء سحب من الخارج فقلت احب انصحك بلاش تشغل سحب الهواء من الخارج لعدة اسباب: هيجيب كل العوادم و قرف الشارع جوه و هيسد الفلتر و ممكن الكويل كمان ده غير ان الكمبريسور هيعمل مجهود اكبر علشان يسقع الهواء السخن اللي بره ده.
الراجل حبيبنا قالي و الله ده كان في زبون قبلك راكب معايا و قالي خليه سحب من الخرج احسن بس تصدق يا استاذ انت عندك حق الهوا ساقع دلوقتي اكتر و كمان الحراره نزلت ؟؟؟؟؟؟؟

قلت في سري هي ايه حكايه الحراره دي ؟ هي الحراره ورايا ورايا؟؟؟؟
وسكت بقية الطريق و حبيت اشارككم التجربة و نحاول نفهم موضوع الحراره ده مع بعض

[mhamdy75]

الحرارة نزلت !!!

سحب الهواء من الخارج

مالوش علاقة

[Ahmed El Khawaga]

المشاركة الأصلية كتبت بواسطة mhamdy75 الحرارة نزلت !!! سحب الهواء من الخارج مالوش علاقة

مهندس محمد صباح الفل, انا مقتنع تماما بأن سحب الهواء من الخارج ملوش اي علاقه بارتفاع الحراره. انا كنت بنقل موقف حصل امامي. و قد نويت انشاء الله ابيع سيارتي العزيزه على (هوندا اكورد 1991) و اجيب ال BYD.
و طول مافي منتدى فعلا محترم و اعضاء محترمين هنقدر نساعد بعض في الخير دائما انشاء الرحمن.