يوميات سيترونتى........ الـ AX

[sawy22]

السلام عليكم ايه اخبركم يا شباب ال AX
انا لسه مغير فلتر هواء ب 40 جنيه وجبت رداغ ب 120 جنيه وطقم سيور دينموا وتقسيمه وتكيف الواحد عامي 70 جنيه وغيرت مساعديين قدام و ورا كله عمل 950 جنيه بعد طلوع الروح في الفصال و تيال فرامل خلفي 120 جنيه وامامي 75 جنيه

[aymangalal]

المشاركة الأصلية كتبت بواسطة pazoka81 والله يا ايمن انا بقالي اكتر من ساعة قاعد ادام الموضوع بتاعك وعاوز اقوم انام لكن مش قاااااااااادر عشان الموضوع شيق جدا جدا جدا جدااااااااااااااااااااااا وكنت حاسس اني بشتغل معاك في العربية .... بس بجد بقت جامدة اخر حاجة وربنا يباركلك فيها ويهديك خيرها ويكفيك شرها

يا باشا ده وسام على صدرى ان يكون موضوعى عجبك للدرجة دى
والف شكر على مجاملتك الرقيقة

المشاركة الأصلية كتبت بواسطة sawy22 السلام عليكم ايه اخبركم يا شباب ال AX انا لسه مغير فلتر هواء ب 40 جنيه وجبت رداغ ب 120 جنيه وطقم سيور دينموا وتقسيمه وتكيف الواحد عامي 70 جنيه وغيرت مساعديين قدام و ورا كله عمل 950 جنيه بعد طلوع الروح في الفصال و تيال فرامل خلفي 120 جنيه وامامي 75 جنيه

بالتوفيق يا عمنا وان شاء الله الاداء يبقى تمام
ملحوظة سريعة كده ... ياريت تحط قطع الغيار دى واسعارها فى الموضوع الشامل ده عن قطع غيار ستروين AX وده الرابط
اسعار بعض قطع غيار ستروين AX
وال ف شكر يا باشا على اهتمامك بالمشاركة والافادة عن الاسعار

[salah89]

السلام عليكم اولا ودى اول مرة ادخل المنتدى عشان كنت بدور على اى حاجة على ستروين لان معروضه عليه عربية ستروين ax 95 ب12000 من غير تكييف الفيتيس عند الاولانى بينط والاكصدام الامامى خارج شوية من الجنب وشايف شوية زيت على الماتور بس صاحبى قالى ده جوان التيكهات عاوز يتغير ودى حاجه بسيطة وفانوانيسها القدام مش مربطة كويس بس شغاله والعدادات مشغالة الباب الخلفى الشمال خارج بره شوية بس بيقفل والسنتر لوك شغال والزجاج الكهربا الامامى سليم الصالون متبهدل حاجه بسيطةبس مش وحش جربنا العربية على الطريق صاحبى الساق بيقول حلوه بتسحب حلو الكلام الاخير انا مبعرف اسوق فجبت صاحبى شاقهالى وساقها وقالى بالنسبه لسعرها جميله وعاوزه مصاريف بسيطة هتبقى كويسه سالت واحد قريبى وكان معاه ميكانيكى من غير ما يشوفها قالى دى عربيه مخيفه ومش اى حد يشتغل فيها وقطع غيارها غاليه ومش متوفرة بس هى بصراحة عاجبنى شكلها وسعرها احسن من الفيات بصراحة محتار ايه رايك يا اخ ايمن فى العربيه لانك الوحيد البيتكلم عليها على النت بحماس لو فيه مصدر تانى يقولى ظروف العربية حد يعرفنى بالله عليكم قبل ما اقابل الراجل الاسبوع القادم ولكم جزيل الشكر واسف على الاطالة

[aymangalal]

المشاركة الأصلية كتبت بواسطة salah89 السلام عليكم اولا ودى اول مرة ادخل المنتدى عشان كنت بدور على اى حاجة على ستروين لان معروضه عليه عربية ستروين ax 95 ب12000 من غير تكييف الفيتيس عند الاولانى بينط والاكصدام الامامى خارج شوية من الجنب وشايف شوية زيت على الماتور بس صاحبى قالى ده جوان التيكهات عاوز يتغير ودى حاجه بسيطة وفانوانيسها القدام مش مربطة كويس بس شغاله والعدادات مشغالة الباب الخلفى الشمال خارج بره شوية بس بيقفل والسنتر لوك شغال والزجاج الكهربا الامامى سليم الصالون متبهدل حاجه بسيطةبس مش وحش جربنا العربية على الطريق صاحبى الساق بيقول حلوه بتسحب حلو الكلام الاخير انا مبعرف اسوق فجبت صاحبى شاقهالى وساقها وقالى بالنسبه لسعرها جميله وعاوزه مصاريف بسيطة هتبقى كويسه سالت واحد قريبى وكان معاه ميكانيكى من غير ما يشوفها قالى دى عربيه مخيفه ومش اى حد يشتغل فيها وقطع غيارها غاليه ومش متوفرة بس هى بصراحة عاجبنى شكلها وسعرها احسن من الفيات بصراحة محتار ايه رايك يا اخ ايمن فى العربيه لانك الوحيد البيتكلم عليها على النت بحماس لو فيه مصدر تانى يقولى ظروف العربية حد يعرفنى بالله عليكم قبل ما اقابل الراجل الاسبوع القادم ولكم جزيل الشكر واسف على الاطالة

متأسف جدا جدا جدا يا استاذ صلاح على تأخرى فى الرد لانى ماشوفتش مشاركة حضرتك غير دلوقتى ارجو قبول اعتذارى (لانى بزعل جدا لو اتأخرت عن حد سألنى فى حاجه... اانا اسف)
ارد على اسئلتلك ولو مش هاتفيدك دلوقتى (واعتقد ان وقتها عدى) يمكن تفيدك بعد كده
حضرتك بتقول العربية من غير تكييف ... هل تقصد ان الموديل بدون تكييف (موتورها 1100 سى سى ؟؟ والتابلوه بدون هوايات تكييف جانبيه؟؟؟؟ ولا تقصد انها 1400 والتابلوه بهاويات فى الجنب لكن مش راكب بها تكييف...؟؟؟
معلش دى نقطة مهمة لانها تقريبا الفيصل فى موضوع الموتور اذا كان 1100 بدون تكييف ولا 1400 ابوتكييف (الفرق عموما فى موديل العربية ) بالنسبة للفتيس مش هايعرف ايه اللى فيه بالظبط غير الميكانيكى لان النقطة دى متعلقة بتخصص ميكانيكى بحت بالاضافة لموضوع التاكيهات دى - واكن فى اسوأ الاحوال لو الموتور مش تمام يبقى ممكن تغير بواحد استيراد فى حدود من 1500 الى 2000 لكن مش عارف هاتبقى ايه مكوناته بالظبط (فى عضة معانا هنا اسمها صحبة خير كانت مغيرة موتور من فترة قريبة من الحرفيين) ممكن تتابع موضوعها وتعرف تفاصيل اكتر
الاكصدام طبعا امره سهل لانه فايبر وفى نفس الوقت قوى يعنى اى اعجواج فيه هايبقى بسيط وسهل انه يتركب فى مكانه صح
الحالة العامة لوصف حضرتك بيقول ان العربية ماشية وسعرها كويس جدا لو 1400 سى سى اما لو 1100 (اللى بيقولوا عليها 1200 سى سى) يبقى ده العادى
يتبقى نظرة حضرتك فى المطلوب عشان تركب العربية على كيفك عنى هل ناوى تظبطها وتجدد (سمكرة ودوكو وتظبيط ميكانيكا وابواب و....و.... الخ؟؟؟) ده طبعا يرجع لحضرتك وعموما التوضيب العام اللى انا كنت فيه بدون (ميكانيكا وعفشة) اخد حوالى 6000 جنية منهم الكماليات كمان
قطع الغيار ماهياش غالية بالشكل المرعب يعنى لكنها بتعيش معاك يعنى ركب الحته وانساها
اقترح لو ليك ميول فيها يبقى استخير واشترى واتعلم عليها شوية واتمكن منها واتعلم فيها برضه لغاية ما تبقى تمام وتاخد فكرة كمان عن الصيانة بع ما تكون بتسوق كويس وحوش مبلغ لا يقل عن 5000 بالوسع يعنى عشان تظبط براحتك وهتلاقيها وقفت عليك بـ 17 الف ولا حاجه بس هاتكن حاجه تانية ولو هاتركب تكييف يبقى بالكتير 20 الف بما فيهم سعرها وفى النهاية هتلاقى نفسك راكب عربية فول اوبشن مكيفة واداء قوى وسحب ممتاز وبمبلغ معقول جدا
اتمنى اكون افادتك

[aymangalal]

يوم جديد من يوميات سيتروينتى
نظرا لضائقة مالية(ربنا يسد ماعلينا ويكفينا شر الدين والالتزامات)
قررت بيع سيتروينتى الغالية عليا جدا واللى ماحيلتيش اغلى منها (زى حصان مدبولى فى فيلم مولد يا دنيا....هههههه)
ولله الحمد حالتها فوق الممتاز من كله
الظاهر انها حست ان ممكن حد يركبها غيرى .... فا بدئت تتدلع وتعمل حركات عشان اصرف نظر عن البيع
اولها صوت تصفير خفيف(مايسمعهوش غير صاحب العربية عشان ودنة خدت على صوت المكنة) بيروح وييجى مع دوسة الدبرياج وبالصدفة كنت عند الكهربائى قولت اعرض علية الامر واخد رأية(وكنت عملت موضوع فى قسم الميكانيكا عشان الصوت ده) وبعد تدقيق شديد اخد باله من الصوت وقالى ده يا زيت فتيس ناقص او بلية الدبرياج عايزة تتغير
ماكدبتش خبر وروحت للميكانيكى وبعد محاولات اصدر قرار بأن السبب هو بلية الدبرياج
وفى هذه الاثناء العربية حست انى فى طريقى لحل المشكله فا بقت تلاعبنى من وقت للتانى بطقة خفيفة احيانا فى الكبالن(على الرغم انى لسه مغيرهم من كام شهر ومصينهم ومشيك عليهم من شهرين) بس قالت تلخمنى فى حاجه تانية الكبالن
خلينا فى البلية الاول الميكانيكى قالى هات بلية ونغيرها والعربية هاتقعد طول اليوم عشان حل الفتيس وتركيبة ... قولت وماله اخذ اجازة من الشغل وطلعت علية .... فك الفتيس اخد حوالى 2:30 وروحت جبت البلية وعرفت ان البلية القديمة كانت خشنة وبتعمل صوت التصفير ده والراجل ركب البلية وغشل الفتيس وعمل كل اللازم وقفل كل حاجه تمام(فى هذه الاثناء كان فك الكبالن طبعا فأخدتم وروحت لبتاع الكبالن وخليته يشوف مالهم قالى واحد كويس والتانى فيه سنة بوش عشان كده بيطقطق احيانا مش على طول) طب والعمل يا عم قالى نظبه قولت له ظبط واخدتهم وروحت للمياكنيكى عشان يقفل والحمد لله الامور تمام لكن المارش اخد منه شوية وقت فى تركيبة لغاسة ما ظبطه والحمد لله اتظبط
طلعت اجرب حاسس بحاجه غريبة فى الدواسة -مجرد ما ارفع رجلى سنة من على الدبرياج ومن غير ما ازود الاقى العربية تبطل- من هنا لهنا عرفت ان الدبرياج واطى ولأول مره اقدر احكم على الدبرياج اذا كان عالى او واطى (هيه هيه هيه اتعلمت حاجه جديدة)
قولت الف لفة واجرب وانا ماشى والطريق واقف فجأه لقيت العربية سخنت والمؤشر رايح على 100 بطلت فى نص الطريق وفتحت الشنطة ووقفت واحد صاحبى بدل المثلث العاكس هههههه) واستنيت لما العربية هديت كده وفتحت لقيت الميه كويسة الله امال سخن ليه؟؟؟؟

حد يقولى سخنت ليه ؟؟؟؟ اتارى الميكانيكة وهو بيفك او يركب وقع فيشة المروحة ههههههههه الحمد لله ان السبب بسيط كده ولحسن الحظ ان عندى مفتاح احتياطى للمروحة عشان الطوارىء دى شغلت المروحة العربية بردت مشيت بأمان لغاية حته حدوء وفحصت تانى وركبت الفيشة وكل شىء رجع تمام
باقى حاجتين الدبرياج عالى وصوت كركرة بدل صوت التصفير اللى كان موجود
رجعت له قيته قاااااااااااااافل؟؟؟؟؟؟ اصله كان شغال فى عربيتى يوم الاحد وطبعا خلص وماسهرش عشان يروح يرتاح روحت له تانى يوم يوم قالى الصوت بسبب ان زيت الفتيس ناقص يعنى عايز يتزود وده صوت التروس بدليل انى لما بدوس دبرياج التروس بتفك والصوت يختفى قولت تمام ازود زيت الفتيس طيب والدبرياج قالى اعليهولك وعلاه من تحت كده واعتقد انه موضوع بسيط هادور على قراره واقولكم ازاى بيتعمل ومنين بالظبط بعد ما علا الدبرياج حسيت انه الاول كان احسن وسألت واحد صاحبى قديم ايهما افضل الدبرياج عالى ولا واطى ؟؟؟؟؟ قالى الواطى افضل لانه مبيحمل على الاسطوانة ومابيجهدهاش بسبب قصر مشوار الدواسة والعكس وبالعكس اقتنعت بكلامه وقولت اروح للمياكنيكى يوطية واشوفه واقولكم وكمان اغير زيت الفتيس خالص لانى حطيت كيلو واحد زيت تقيل 140 بس برضه الصوت موجود وسألت ميكانيكى مخضرم فى الستروين قالى الفتيس بياخد 2 كيلو وزيت خفيف 90 مش 140 لان التقيل غلط على التروس برضه هو ادرى فانا دلوقتى مستنى افضى واروح اغير زيت واوطى الدبرياج وده كان يوم من يوميات سيترونتى